Kuli A-Roma
1 Yami Paulu ndungo ya Kristu Yesu, angusanyikine* hanga ngukapwe postolo ni kwambujola sango jipema ja Zambi, 2 jize iye alakenyene kupalikila muli aprofeta mu Yisoneko yisandu, 3 hakutwala kuli Mwanenyi, yoze wasemukine ku munyachi* wa Ndawichi kulita ni musunya, 4 alioze ku ndundo amuvulukile ngwo Mwana wa Zambi kulita ni spiritu ya usandu, ha kumuhindwisa hakachi ka afu—ewa, iye Yesu Kristu, Mwene wetu. 5 Kupalikila muli iye, twatambwile chawana cha keke ni upostolo, wakuneha kwononoka cha ufulielo hakachi ka mavungu eswe mumu ha jina lienyi, 6 hakachi ko ni yenu nawa hananutambika hanga nukapwe ambala a Kristu— 7 ngunanusonekena yenu nwatwama mu Roma, yenu eswe waze Zambi akuzanga waze atambikile hanga nukapwe asandu:
Chawana cha keke ni sambukila ya kuli Zambi Tata yetu, ni ya Mwene Yesu Kristu yikapwe hamwe ni yenu.
8 Chitangu, ngunasakwilila kuli Zambi yami, mu jina lia Yesu Kristu hali yenu eswe, mumu ufulielo wenu kakuwambujola hashi heswe. 9 Mumu Zambi yoze nakulingila milimo yisandu ni mbunge* yami yeswe, ha kwambujola sango jipema hakutwala kuli Mwanenyi, iye kali chela chami ngwo, chishi kulitwamina kunutongola mu yilemba yami, 10 ni kuliumba ngwami, nyi muchilita ni upale wa Zambi, nguhase kama kunumeneka. 11 Mumu ngunazange chinji kunumona ngukalianyine ni yenu chimwe chawana cha uspiritu hanga nukajikize; 12 hanji ngwami, hanga tukalitakamise umwe ni mukwo, kupalikila mu ufulielo wetu, ufulielo wa yami ni wa yenu akwetu.
13 Mandumbu, ngunazange nunyingike ngwenu, ha yisuho yinji nazangile kwiza ni kunumeneka hanga ngulongese atu a koko ni kwapwisa tumbaji ngwe chize nakulinga ku mavungu anji, alioze yimwe yinangukwiki ndo haliapwila. 14 Kongo nguli nalio kuli A-Ngresia ni kuli tundaka,* kuli akwa-mana ni kuli waze hi akwa-mana* ko; 15 kashika, ngunazange chinji kwambujola sango jipema kuli yenu nawa nuli mu Roma. 16 Chishi kwivwa sonyi ha sango jipema. Mumu kujapwa ndundo ja Zambi ha ulamwino kuli mweswe mafuliela, hatangu kuli A-Yunda ni kuli A-Ngresia nawa. 17 Mumu mwenamo munasoloka ululi wa Zambi mu ufulielo ni ha kufuliela, se chinasonewa ngwo: “Mukwa-ululi kumakatwama ni mwono mumu lia ufulielo.”
18 Mumu utenu wa Zambi wakusoloka chize mwilu ha yilinga yeswe yakuhona kuvwila Zambi woma ni ha yuma yeswe ya uhenge yize atu akulinga ya kukinda umwenemwene hanga achine kuunyingika. 19 Chikwo nawa, yeswe yize mahasa kunyingika hakutwala kuli Zambi, kuyinasoloka mumu Zambi hanayisolola zwalala kuli ayo. 20 Mumu yitanga yenyi yize kuyishi kumoneka, chipwe ndundo jenyi ja mutolo ni Uzambi wenyi, yakusoloka zwalala chize ku uputukilo wa yitangiwa mumu twakuyimona kupalikila mu yuma yize atangile, chocho o keshi kaliongelo niumwe. 21 Mumu chipwe ngwe kananyingika Zambi, alioze keshi kumulemesa, keshi kumuchichimieka ngwe chize Zambi atela. Alioze mu manyonga jo hanalumuka yihepuke, mbunge jo kujishi mana, hijinalaa pwi. 22 Chipwe ngwe kakuliamba ngwo kali akwa-mana, nihindu hanapu yihepuke. 23 Alumwine uhenya wa Zambi yoze keshi kufwa* mu yuma ngwe tuponya waze alifwa ni mutu wakufwa, ni tujila, ni tushitu waze akwete molu awana, ni waze akukalala.
24 Kashika, Zambi waechele ku usolo wa mbunge jo ja luchisa hanga akachise ni kulelesa mujimba wo ene. 25 Kakusumbakenya umwenemwene wa Zambi ni mahuza, kakuwayila ni kuvumbika chize Zambi atangile kuhiana mwe Sakatanga yoze chatamba kuhalisa ku miaka yeswe. Amene. 26 Kashika, Zambi waechele hanga akaule usolo wo upi wa yuma ya sonyi, mumu chipwe mapwo jo hanalumuna chize chinalite ni mijimba yo, ni chize kuchalitele. 27 Chizechene nawa, ni malunga hanehuka chize chinalite kulinga* ni mapwo, hanalivwila usolo upi lunga ni lunga ha kulinga yitanga ya sonyi umwe ni mukwo. Kashika akumona lamba* kulita ni yitanga yo yipi.
28 Muze alitunyine kunyingika Zambi,* kashika Zambi waakunjikile ku manyonga a kulumbuka ni kulinga yize kuyalitele. 29 Azalile too ni uhenge weswe, ni ungulungulu, ni kuzo, ni uhuka, ni lufwachinda, ni ungalwe, ni vunda, ni kalimbalimba, ni kuzanga kumwesa akwo lamba, apwile akwa-saki, 30 akwa-kulamikiza, akwa-kuvwila Zambi kole, akwa-kaleleso, akwa-kulisuta, akwa-kulizata, akwa-kutomba yuma yipi,* keshi kwononokena yisemi jo, 31 keshi malinjekela, keshi kushishika ku yilakenyo, keshi zango lia atu, keshi keke. 32 Wano eswe, chipwe ngwe kananyingika kanawa upatwilo wa ululi wa Zambi uze unambe ngwo, atu waze akulinga yuma ngwe yino kanatela kufwa, hindu keshi kununga wika ni kuyilinga, alioze kakutayiza nawa atu waze akuyilinga.