Asonekene Mateu
12 Ha shimbu lize, Yesu yapalika mu minda ya tiliku ha tangwa lia Sambata. Tumbaji twenyi yevwa zala, kashika ayo yaputuka kuhulula mitwe ya tiliku hanga alie. 2 Muze A-Fwariseu achimwene, yamba kuli Yesu ngwo: “Tala! Tumbaji twe kanalingi yuma yize kuchatelele kulinga ha tangwa lia Sambata.” 3 Iye yaakumbulula ngwenyi: “Shina kanda nuchitanga kama yuma yize Ndawichi alingile muze iye ni atu waze apwile nenyi evwile zala? 4 Chize iye anjilile mu zuwo lia Zambi, ayo yalia mbolo ja kutumbieka, jize te kulita ni shimbi niumwe katambile kujilia, chipwe iye, chipwe atu jenyi, alioze asasendote wika? 5 Nyi kunwatangile nawa mu Shimbi ngwo, ha tangwa lia Sambata, asasendote mu tembele kakwehuka shimbi ya Sambata, alioze keshi kwasuma mulonga? 6 Alioze, ngunanulweze pundu ngwami, munene wahiana tembele, hano ali. 7 Kashika, nyi te nunanyingika ulumbunwiso wa maliji anambe ngwo: ‘Ngunazange keke hi mulambu ko, kachi kunushi kuhisa waze keshi chitela. 8 Mumu Mwana-mutu mwe Mwenya-Sambata.”
9 Muze hakatuka ku chihela chize, yanjila mu sunangonga yo, 10 mwapwile umwe lunga ni kwoko lia sosewa. Mba ahase kumusuma mulonga, A-Fwariseu yamuhula ngwo, “Shina chinalite ni shimbi kuuka ha tangwa lia Sambata?” 11 Iye yaalweza ngwenyi: “Nyi umwe wa kuli yenu kali ni panga umuwika, mba panga wacho maholokela mu wina ha tangwa lia Sambata, shina kechi kumuchizamo? 12 Mutu kali mulemu chinji kuhiana panga. Kashika, chinalite ni shimbi kulinga chuma chipema ha tangwa lia Sambata.” 13 Chocho Yesu yamba kuli mwe lunga ngwenyi: “Olola kwoko lie.” Iye yaliolola, mba kwoko yilihinduka ngwe likwo. 14 Alioze A-Fwariseu yatuhuka, yaputuka kumutwama punga hanga amushihe. 15 Muze Yesu hachinyingika, yakatukaho yaya kweka, atu anji yamukaula; mba iye yaauka eswe. 16 Alioze yaakanjisa chikolo hanga ahone kumusolola kuli akwo, 17 hanga maliji a profeta Izaia amanunuke, anambe ngwo:
18 “Talenu kavumbi kami, yoze hingunasakula, namuzanga chikolo, muli iye ngunawahilila! Mungukasa spiritu yami hali iye, mba makasolola kuli akwa-mavungu chize ululi wamwenemwene wapwa. 19 Kechi kazwela, chipwe kukololoka; niumwe kechi kevwa liji lienyi mu matapalo. 20 Kechi kafwenya lumbungu wa makuka, chipwe kujima muya wa ndeya uze unafwinda mwishi, ndo muze maneha ululi. 21 Chamwenemwene, akwa-mavungu makashimbwila mu jina lienyi.”
22 Yamunehena umwe lunga yoze te uli ni ndemoniu, kapuputa chikwo nawa kamama, iye yamuwuka, lunga wacho yaputuka kuhanjika ni kumona. 23 Mbunga yeswe yakomoka ni kwamba ngwo: “Yono hi Mwana wa Ndawichi ko?” 24 Muze A-Fwariseu achivwile, yamba ngwo: “Lunga yono kakutuhwisa andemoniu ni ukwaso wa Mbelezepu, mwata wa andemoniu.” 25 Yesu hakunyingika manyonga jo, yaamba ngwenyi: “Wanangana weswe walihandununa wene wakunonga, ni mbonge yeswe hanji zuwo lize lialihandununa liene, kulichi kukola. 26 Chizechene nawa, nyi Satana matuhwisa Satana, kalihandununa mwene, mba kuchi wanangana wenyi muukola? 27 Chikwo nawa, nyi yami nakutuhwisa andemoniu ni ukwaso wa Mbelezepu, mba ana jenu ni ukwaso waya akutuhwisa andemoniu? Kashika, ayo makanusopesa. 28 Alioze, nyi nakutuhwisa andemoniu ni ukwaso wa spiritu ya Zambi, pundu lume, Wanangana wa Zambi hiuneza kuli yenu. 29 Kuchi mutu mahasa kunjila mu zuwo lia umwe chitakame hanga amwiye yikumba yenyi, nyi chitangu kakashile chitakame wacho? Nyi machilinga, mba mahasa kwiya yikumba yenyi. 30 Mutu yoze keshi sali liami, kali mukwa-kole yami, yoze keshi kukunga hamwe ni yami, kakumwanga.
31 “Kashika, ngunambe kuli yenu ngwami: Zambi makakonekena atu milonga yo yeswe ni kushililika cho cheswe, alioze yoze mashililika spiritu, kechi kamukonekena. 32 Chakutalilaho, mweswawo mamba liji lia kulimika ni Mwana-mutu, makamukonekena; alioze yoze mahanjika maliji akulimika ni spiritu yisandu, kechi kamukonekena, ka, chipwe haliapwila chipwe kulutwe lia matangwa.
33 “Nyi munutumba mutondo upema, muwima mihuko yipema, nyi munutumba mutondo upi, muwima mihuko yipi. Mutondo kakuunyingika kanawa ku mihuko yawo. 34 Yenu vungu lia yihili, kuchi munuhasa kwamba yuma yipema, se nuli api? Mumu kanwa liakuhanjika yize yinalumbama mu mbunge. 35 Mutu mupema, kakutuhwisa yuma yipema ku upite wenyi, mutu mupi kakutuhwisa yuma yipi ku upite wenyi. 36 Ngunanulweze ngwami, ha Tangwa lia Upatwilo atu makaasopesa kulita ni maliji jo a uhepuke; 37 mumu ku maliji je, kumakakusambisa, ni ku maliji je makakuhisa.”
38 Hohene, amwe alongeshi a shimbi ni A-Fwariseu yamba ngwo: “Longeshi, tunazange kumona chimwe chilayi che.” 39 Yesu yaakumbulula ngwenyi: “Chisemuko chipi, cha atu waze keshi kushishika kuli Zambi, nunanungu ni kufupa chilayi; alioze nichimwe chilayi kechi kunwahacho, shina wika chilayi cha profeta Yona. 40 Mumu ngwe chizechene Yona apwile mu jimo lia yishi munene ha matangwa atatu ni ufuku utatu; chocho nawa mwe Mwana-mutu makapwa mu fuka ha matangwa atatu ni ufuku utatu. 41 Atu a ku Ninive makahinduka ha tangwa lia upatwilo hamuwika ni chisemuko chino, makachihisa, mumu kanakalikonyeka ha yize Yona anakambujola. Alioze talenu, mutu munene wahiana Yona kali hano. 42 Mwazovu* wa ku sule makamuhindwisa ha tangwa lia upatwilo hamuwika ni chisemuko chino, makachihisa, mumu iye kakatukile kusuku hanga aye ni kwivwa maliji a mana ja Solomone. Alioze talenu, mutu munene wahiana Solomone kali hano.
43 “Muze spiritu ya luchisa yakutuhuka muli mutu, yakupalika mu puya ni kufupa uhwimino, alioze kuyishi kuwana chihela nichimwe. 44 Mba muyamba ngwo: ‘Munguhiluka mu zuwo liami natuhukile,’ muze muyiheta, muyiwana zuwo liacho lia washi, lia kukomba, lia kululieka kanawa. 45 Chocho, muyiya ni kusaka maspiritu akwo shimbiali alisa, api chinji kuhiana iye. Muze muyinjila, muyitungamo; mba kutwama cha yono mutu muchipiha chinji kuhiana ku uputukilo. Yino ye muyikalingiwa ku chisemuko chino chipi.”
46 Muze te machihanjika ni mbunga, naye ni ana-kwo te kanamana haze, kanafupu kuhanjika nenyi. 47 Mba umwe mutu yamulweza ngwenyi: “Talenu, noko ni ana-kwenu kali haze kanafupu kuhanjika ni yena.” 48 Yesu yamukumbulula ngwenyi: “Mama iya, ana-kwetu aya? 49 Yesu yamika kwoko kuli tumbaji twenyi ngwenyi: “Mama ni ana-kwetu wano! 50 Mumu yoze wakulinga upale wa Tata uli mu malilu, mwe ndumbwami wa lunga, ndumbwami wa pwo ni mama.”