Kuli A-Roma
8 Waze hanalinungu ni Kristu Yesu keshi kwahisa. 2 Mumu shimbi ya spiritu yize yakuhana mwono ha kulinunga ni Kristu Yesu hiyinakutusula ku shimbi ya shili ni kufwa. 3 Shimbi ya Mose te kuyishi ni ndundo ja kunutusula mumu atu kali alelu chikwo nawa akwa-shili. Alioze Zambi te matusula hakutuma Mwanenyi mukulifwa cha atu akwa-shili hanga ahwise shili. Chocho Zambi yahisa shili ya ku musunya, 4 hanga ululi wa Shimbi ukamanunuke muli yetu waze kutushi kwenda kulita ni musunya, alioze kulita ni spiritu. 5 Mumu waze akutwama kulita ni musunya, kakunyonga ku yuma ya musunya, alioze waze akutwama kulita ni spiritu, kakunyonga ku yuma ya spiritu. 6 Kashika, kunyonga ku yuma ya musunya chinalumbunuka kufwa. Alioze kunyonga ku yuma ya ku spiritu chinalumbunuka mwono ni sambukila. 7 Mumu kunyonga ku yuma ya musunya, chinalumbunuka kulipwisa akwa-kole ja Zambi. Se musunya kuushi kwononokena shimbi ya Zambi, kwamba umwenemwene kuuchi kuhasa kuchilinga. 8 Kashika waze akutwama kulita ni musunya kechi kupemena kuli Zambi.
9 Alioze mandumbu, nyi chamwenemwene lume spiritu ya Zambi yatwama muli yenu, chino chinalumbunuka ngwo kunwatwamine kulita ni musunya alioze ni spiritu. Kashika, nyi umwe katwamine ni spiritu ya Kristu au hi ni wenyi ko. 10 Nyi Kristu hanalinungu hamwe ni yenu, spiritu yakunwaha mwono mumu lia ululi, chipwe ngwe mijimba yenu hiyinafu mumu lia shili. 11 Alioze, nyi spiritu ya yoze wahindwishile Yesu hakachi ka afu yatwama muli yenu, yoze wahindwishile Kristu Yesu hakachi ka afu, makahana nawa mwono ku mijimba yenu yakufwa kupalikila mu spiritu yenyi yize yatwama muli yenu.
12 Kashika mandumbu kutwatambile kwononokena mujimba wetu wa shili; 13 mumu nyi munutwama kulita ni musunya, kumunukafwa; alioze, nyi kupalikila mu spiritu munushiha yitanga yenu yipi, munukapwa ni mwono. 14 Waze eswe akwasongwela ni spiritu ya Zambi, kali pundu ana ja Zambi. 15 Mumu spiritu yize nwatambwile hi yakunupwisa ko ndungo ni kunuvwisa woma, alioze yili spiritu yize yakunupwisa ana ja Zambi, mba kupalikila mu spiritu yacho twakwamba ngwetu: “Abba* Tata!” 16 Spiritu yene yakuhana uchela hamwe ni spiritu yetu ngwo, tuli ana ja Zambi. 17 Kashika, nyi tuli ana jenyi, tuli nawa swana—swana ja Zambi ni maswana-ni-akwo a Kristu, nyi chamwenemwene mutumona lamba hamwe nenyi hanga tukapwe ni uhenya hamwe nenyi.
18 Nakumona ngwami lamba lize twakumona ha mwakwono lili liamokomoko nyi twalitesa ni uhenya uze makatusolwela. 19 Mumu yitangiwa yeswe yakushimbwila ni kutalatala hanga Zambi asolole ana jenyi. 20 Yuma yeswe yize Zambi atangile ayipwishile yamokomoko hi ku upale wa ayo ene ko alioze ku upale* wa yoze wayizeyesele ha kuhana kutalatala 21 Zambi mwene kanyingikine ngwenyi, yitangiwa yeswe te muyitusuka ku undungo wa kupola ni kupwa ni utuswilo wa uhenya wa ana ja Zambi. 22 Mumu tunanyingika ngwetu yitangiwa yeswe muyichinunga ni kutwa mikuma ni kwivwa yikola ndo haliapwila. 23 Hi yino wika ko, alioze chipwe yetwene nawa, yetu tuli ni mihuko yitangu ya spiritu, twakutwa mikuma mu mbunge muze tunashimbwila tangwa lia kutusolola ngwe ana. Henaho makatukuula mu mijimba yetu kupalikila mu ukuule. 24 Mumu katulamwinyine kupalikila mu kutalatala chino. Alioze kutalatala chize chakumoneka, hi kutalatala ko, mumu iya matalatala chize anamono? 25 Alioze nyi twatalatala ku yuma yize kuyishi kumoneka, mutununga ni kushimbwila ni uhumikizo ni kunyongonona.
26 Chikwo nawa, spiritu yisandu muyihasa kutukwasa muze tunalele; yetu tunanyingika ngwetu twatamba kulemba alioze kutwanyingikine yize mutwamba mu yilemba. Ha chikuma chino, spiritu yisandu yakutuhakwila muze tunatu mikuma yize kutuchi kuhasa kulumbununa ni maliji. 27 Alioze Zambi yoze wakuhengwola mbunge jetu, kananyingika yize spiritu yisandu yakwita mu jina lia asandu jenyi mumu chino chinalite ni upale wa Zambi.
28 Tunanyingika ngwetu, Zambi kakulinga hanga yitangiwa yenyi yeswe yikalakale hamuwika mu kukwasa waze akumuzanga, waze iye akutambika kulita ni upale wenyi. 29 Mumu waze iye aliangile kutayiza, wano nawa watesele akalifwe ni Mwanenyi, hanga iye nawa akapwe mwana mutangu hakachi ka mandumbu anji. 30 Waze iye aliangile kutongola, yaatambika nawa, waze atambikile, yaapwisa akwa-ululi. Waze apwishile akwa-ululi yaaha uhenya wenyi.
31 Yika mba mutwamba ha yuma yino? Nyi Zambi mapwa hamwe ni yetu iya yoze mahasa kulimika ni yetu? 32 Nyi iye kakalitunyine kutwaha Mwanenyi mwene, alioze yamukunjika hali yetu eswe, shina kechi kutwaha yuma yikwo yeswe chawana hamwe nenyi nyi? 33 Iya masuma mulonga waze Zambi hanatongola? Zambi mwene mwe wakwapwisa akwa-ululi. 34 Iya yoze mahasa kwahisa? Niumwe, mumu Kristu Yesu yoze wafwile, yoze ahindwishile hakachi ka afu kali ku kwoko lia chindume cha Zambi iye nawa kakutuhakwila.
35 Iya mahasa kutuhandununa ku zango lia Kristu? Shina lamba, yinyengo, yihungumiona, zala, uvu, ponde nyi katana? 36 Ngwe chize chinasonewa ngwo: “Mumu hali yena kakutukunjika ku kufwa tangwa lieswe; kakutumona ngwe mapanga waze mashiha.” 37 Alioze mu yuma yino yeswe, twakukumba kuhiana mumu lia ndundo ja yoze watuzangile. 38 Mumu nguli ni shindakenyo ngwami, chipwe kufwa, chipwe mwono, chipwe angelo, chipwe manguvulu, chipwe yuma ya haliapwila, chipwe yuma yize muyizaho, chipwe ndundo, 39 chipwe usuku kwilu, chipwe usuku kwishi, chipwe chitangiwa chikwo cheswacho, chichi kuhasa kutuhandununa ku zango lia Zambi lize lili muli Kristu Yesu Mwene wetu.