Yoshua

3 Chocho, Yoshua yalimeneka chimenemene, iye ni A-Izalele eswe, yakatuka ku Shitime yaheta ku Yordau. Yapombako ufuku umuwika shimbu te kanda achizauka Yordau.

2 Ha kupalika cha matangwa atatu, akwa-lutwe ja atu yapalika mu chilombo 3 ni kulweza atu ngwo: “Muze munumona mushete wa usendo wa Yehova Zambi yenu kanaumbata kuli asasendote A-Levi, nwatamba kukatuka kuze nuli hanga nuukaule. 4 Alioze nwatamba kulisela tando* 2,000. Kunwatambile kukundama kuli ayo, chino muchinukwasa kunyingika jila yize munuya mumu kanda nuchipalika kama mu jila yacho.”

5 Mba Yoshua yalweza atu ngwenyi: “Lipemesenu, mumu hamene Yehova malinga yikomokeso mukachi kenu.”

6 Chocho, Yoshua yalweza asasendote ngwenyi: “Andenu mushete wa usendo, tetekelenu kulutwe lia atu.” Hachino, ayo yanda mushete wa usendo, yatetekela kulutwe lia atu.

7 Yehova yamba kuli Yoshua ngwenyi: “Chize musono mungukunangamisa kumeso ja A-Izalele eswe, hanga anyingike ngwo, nguli hamwe ni yena ngwe chize napwile ni Mose. 8 Watamba kulweza asasendote waze anambata mushete wa usendo ngwe: ‘Muze maheta ku sesa lia lwiji Yordau, katamba kumana mu meya a lwiji Yordau.’”

9 Yoshua yalweza A-Izalele ngwenyi: “Tweyenu nupanjike maliji a Yehova Zambi yenu.” 10 Yoshua yamba nawa ngwenyi: “Ha chikuma chino munukanyingika ngwenu, kuli umwe Zambi wa mwono mukachi kenu, iye makahuma mukachi kenu A-Kanana, A-Hete, A-Hevwe, A-Perize, A-Ngikashe, A-Amore ni A-Yepushe. 11 Talenu! Mushete wa usendo wa Mwene wa hashi heswe unapalika kulutwe lienu, kanayi nawo mukachi ka Yordau. 12 Haliapwila, sakulenu malunga 12 a minyachi ya A-Izalele, ku munyachi ni munyachi lunga umuwika. 13 Muze yiliato ya asasendote waze anambata Mushete wa Yehova, Mwene wa hashi heswe, muyiliata mu meya a Yordau, meya a mu Yordau waze aneza ku tunda mamana ngwe chikalakala.”

14 Kashika, muze atu akatukile mu mambalaka jo azauke Yordau, asasendote waze te anambata Mushete wa usendo, yatetekela kulutwe lia atu. 15 Muze asasendote waze te anambata mushete ahetele ku Yordau ni kusa yiliato yo mu meya, (mumu ha matangwa eswe a kucha mbuto, Yordau te kakuzala ni kupukumuna meya ku sesa lia lwiji), 16 meya waze te akwiza ku tunda yamana. Yazunduka ngwe chikalakala, kusuku ni ayo, ku Alama, chifuchi chize chili hakamwihi ni Zaretane. Mba meya waze te anapalumuka, anayi ku Kalunga-Lwiji wa Arapa, mu Kalunga-Lwiji wa Mungwa yapatuka ngwi. Chocho, atu yazauka hashi homu hakamwihi ni Yeriku. 17 Muze asasendote waze te anambata mushete wa usendo wa Yehova amanyine hashi homu mukachi ka Yordau, A-Izalele eswe yazauka hashi homu ndo muze ayo eswe azaukile Yordau.