Yoshua

15 Chihinga chize ahanyine kuli munyachi wa Yunda kulita ni asoko jo, chahetele ndo mu njiza ya Endome mu puya ya Zini ni ku songo lia sango ya Nengeve. 2 Njiza ya chifuchi chacho ku uto, te yakuputukila ku songo lia Kalunga-Lwiji wa Mungwa, kukatuka ku tunda yinatale ku uto. 3 Yiyipalika ku uto ya ukandukilo wa Akarabimi ni Zini yiyikanduka ku uto ya Kandeshe-Mbania, mba yiyipalika ku Hezerone, yiyikanduka ndo ku Andare, yiyitalikisa ku Karika. 4 Mba yiyiya ku Azamone, yiyituhukila ku lwiji wa Engitu, yiyisulila ku Kalunga-Lwiji. Ayi ye yapwile njiza ya ku uto.

5 Njiza ya ku chivumbuko yapwile Kalunga-Lwiji wa Mungwa ndo ku chihata cha Lwiji Yordau. Ku sango, njiza ya chifuchi chacho te yakuputukila ku tunda ya Kalunga-Lwiji, ku chihata cha Lwiji Yordau. 6 Njiza yiyikanduka ndo ku Mbete-Hogala, yiyipalika ku sango ya Mbete-Arapa, yiyikanduka ndo ku liwe lia Mbohane mwana wa Rupene. 7 Njiza yacho yiyinunga ni kukanduka ndo ku Ndebire, ku chikulo cha Akore ni kutalikisa ku sango ni kuya ku Ngilingali yatwama kulutwe lia mulundu wa Andumime ku uto ya chikulo. Njiza yacho yiyipalika ndo ku meya a Ene-Shemeshe yiyisulila ku Ene-Rogele. 8 Njiza yiyiya ndo ku chikulo cha mwana wa Hinome, ndo ku sesa lia mulundu wa Yepushe ku uto, chekwamba, Yerusaleme. Njiza yiyikanduka ndo ku songo lia mulundu uze wapwile kulutwe lia chikulo cha Himone, ku chitokelo, ku uto wa chikulo cha Refane. 9 Mba njiza yiyiya chize ku songo lia mulundu ndo ku fuji lia meya a Nefatoa. Yiyinunga ndo mu mambonge a ku Mulundu Efrone, yiyiya ndo ku Mbaala chekwamba, ku Kiriate-Yerimi. 10 Ku Mbaala, njiza yiyitalikisa ku chitokelo ndo ku Mulundu Sere ni kupalika ku sesa lia Mulundu Yerimi, chekwamba, Chesalone, ni kupalumuka ndo ku Mbete-Shemeshe ni kupalika ku Timna. 11 Njiza yiyiya ku sesa lia sango ya Ekrone, yiyilitanda ndo ku Shikerone, yiyipalika ku Mulundu wa Mbaala, yiyinunga ndo ku Njabanele, yiyisulila ku kalunga-lwiji.

12 Njiza ya ku chitokelo yapwile ku sesa lia Kalunga-Lwiji Munene. Yino yapwile njiza yeswe ya chifuchi cha munyachi wa A-Yunda kulita ni usoko wo.

13 Yoshua yahana kuli Kalemba mwana wa Yefune, chimwe chihanda hakachi ka munyachi wa A-Yunda, kulita ni shimbi yize Yehova ahanyine kuli Yoshua. Yamwaha Kiriate-Arpa, che kwamba, Heprone (Arpa kapwile tato ya Anake.) 14 Chocho, Kalemba yahuma mu chifuchi chacho ana atatu ja Anake: Sheshai, Ahimane ni Talamai. Ayo eswe kali a ku munyachi wa Anake. 15 Chize haze, yaya ni kwasa jita ni Akwa-Ndebire. (Ku mashimbu a kunyima jina Ndebire liapwile Kiriate-Zefa.) 16 Kalemba yamba ngwenyi: “Lunga yoze makumba Kiriate-Zefa ni kuyitambula, mungumwaha mwanami Aksa akapwe pwo lienyi.” 17 Oteniele, mwana wa Kenaze, mwana-kwo ya Kalemba, yakumba mbonge, mba Kalemba yamwaha mwanenyi Aksa hanga apwe mukwo-pwo. 18 Muze Aksa te anayi ku zuwo lienyi, yazangisa mukwo-lunga Oteniele hanga ete munda kuli tato. Chocho Aksa yasunuka ha chimbulu, mba Kalemba yamuhula ngwenyi: “Yika unazange?” 19 Aksa yakumbulula ngwenyi: “Lisesa, ngwehenu kama chawana, mumu hinunangwehe chihela ku uto. Haliapwila ngwehenu nawa mashima a meya.” Chocho, Kalemba yamwaha Mashima a ku Tunda ni a ku Mwanda.

20 Chino chapwile chihinga cha munyachi wa A-Yunda kulita ni asoko jo.

21 Mambonge a munyachi wa Yunda waze apwile ku uto ni kutalikisa ku njiza ya Endome kapwile wano: Kabzele, Edere, Njagura, 22 Kina, Ndimona, Adada, 23 Kendeshe, Hazore, Itinane, 24 Zifa, Teleme, Bialote, 25 Hazore-Hadata, Keriote-Hezerone, chekwamba, Hazore, 26 Amame, Shema, Molada, 27 Haza-Ngada, Heshemone, Mbete-Pelete, 28 Haza-Shuale, Mbia-Shipa, Mbiziota, 29 Mbaala, Imi, Ezeme, 30 Ele-Tolade, Chesili, Horoma, 31 Zikalage, Madamana, Sanasana, 32 Lebaote, Shilime, Ayine, Rimone—mambonge wano eswe kapwile 29 hamwe ni yihunda yamo.

33 Mambonge a mu Yana kapwile wano: Esheteole, Zora, Asena, 34 Zanoa, Ene-Nganime, Tapua, Ename, 35 Yaramuta, Ndulame, Soko, Azeka, 36 Sharaime, Aditaime, Gedera, Gederotaime—mambonge wano eswe kapwile 14 hamwe ni yihunda yamo.

37 Zenana, Hadasha, Migidalingate, 38 Diliane, Mizepa, Yokatele, 39 Lakishi, Bozakata, Eglone, 40 Kabone, Lamama, Chitilishi, 41 Gederote, Mbete-Ndagone, Namahe ni Makeda—mambonge wano eswe kapwile 16 ni yihunda yamo.

42 Libna, Etere, Ashane, 43 Ifita, Asena, Neziba, 44 Kela, Akaziba, ni Maresa—mambonge wano eswe kapwile 9 ni yihunda yamo.

45 Ekrone hamwe ni membo jamo ni yihunda yamo. 46 Chize ku Ekrone ni kutalikisa ku chitokelo ni yeswe yize yapwile sali lia Ashedode ni yihunda yamo.

47 Ashedode, membo jamo ni yihunda yamo; Ngaza membo jamo ni yihunda yamo ndo ku lwiji wa Engitu, Kalunga-Lwiji Munene ni yihunda yize yalisulangana nayo.

48 Mu chifuchi cha ku mulundu mwapwile Shamiri, Yatiri, Soko, 49 Ndana ni Kiriate-Sana, che kwamba, Ndebire, 50 Anape, Eshetemo, Anime, 51 Ngoshone, Holone ni Ngilo—mambonge wano eswe kapwile 11 ni yihunda yamo.

52 Aripa, Nduma, Eshane, 53 Yanimi, Mbete-Tapua, Afeka, 54 Humata, Kiriate-Arpa, chekwamba, Heprone ni Ziore—mambonge wano eswe kapwile 9 ni yihunda yamo.

55 Mayone, Karmela, Zifa, Yuta, 56 Yezerele, Yokadime, Zanoa 57 Kene, Ngibia ni Timna—mambonge wano eswe kapwile 10 ni yihunda yamo.

58 Halahula, Mbete-Zure, Gedore, 59 Marata, Mbete-Anote ni Eletekone—mambonge wano eswe kapwile 6 ni yihunda yamo.

60 Kiriate-Mbale, chekwamba, Kiriate-Yerimi ni Raba—mambonge wano eswe kapwile 2 ni yihunda yamo.

61 Mu puya mwapwile Mbete-Arapa, Midini, Sekaka, 62 Nibishane, mbonge ya Mungwa ni Engedi—mambonge wano eswe kapwile 6 ni yihunda yamo.

63 Hakutwala kuli A-Yepushe waze te atwama mu Yerusaleme, A-Yunda kakahashile kwahangamo. Kashika A-Yepushe ananungu ni kutwama ni A-Yunda mu Yerusaleme ndo musono.