Yoshua

24 Yoshua yakungulula minyachi yeswe ya Izalele ku Shekeme, yasanyika makulwana a Izalele, akwa-lutwe, ngaji ni tupitau a maswalale. Ayo yasoloka kumeso ja Zambi wamwenemwene. 2 Yoshua yalweza atu eswe ngwenyi: “Chocho anambe Yehova, Zambi ya Izalele ngwenyi: ‘Tulamba jenu, hamuwika ni Tera tato ya Apalahama ni Nehore, ha miaka yinji katwamine mu sali lia lwiji Ufrateze. Ayo te kakuwayila tuzambi eka.

3 “‘Ha kupalika cha mashimbu, yinguchiza kalamba kenu Apalahama mu sali likwo lia lwiji Ufrateze, yingumwendesa mu chifuchi cheswe cha Kanana ni kwokesa munyachi wenyi. Yingumwaha Izake, 4 Izake yingumwaha Yakomba ni Esau. Mba yinguhana chifuchi cha ku Mulundu wa Sere kuli Esau hanga chipwe chihinga chenyi. Yakomba ni ana jenyi yapalumuka mu Engitu. 5 Kulutwe, yingutuma Mose ni Arone, yingumwesa A-Engitu lamba ni yilungo, mba yingunuchizamo. 6 Muze nachijile yisemi jenu mu Engitu ni muze nwahetele ku kalunga-lwiji, A-Engitu yakaula yisemi jenu ni matemba a jita ni akwa-kwendesa tuvwalu ndo ku Kalunga-Lwiji Muchila. 7 Chocho tulamba jenu yaputuka kwita ukwaso kuli Yehova, yingusa milima hakachi kenu ni A-Engitu, yingwalundumwina meya a mu kalunga-lwiji ni kwafuka, meso jenu kamwene yize nalingile kuli A-Engitu. Hachino, yinutwama miaka yinji mu puya.

8 “‘Yingunutwala mu chifuchi cha A-Amore waze te atwama mu sali lia Yordau, ayo yasa jita ni yenu. Alioze, yingwakunjika mu moko jenu hanga nutambule chifuchi cho, yingwanongesa kumeso jenu. 9 Chocho, Mbalake, mwana wa Zepore, mwanangana wa Moape, yakatuka yasa jita ni A-Izalele. Iye yasanyika Mbalau mwana wa Mbeore hanga anushinge. 10 Alioze yami chakapanjikile Mbalau. Chocho iye yanuwahisa ha yisuho yinji, yingunupulula ku moko jo.

11 “‘Yenu yinuzauka Yordau, yinuheta mu Yeriku. Mba tusongo a ku Yeriku, chizechene ngwe A-Amore, A-Perize, A-Kanana, A-Hete, A-Ngikashe, A-Hevwe, ni A-Yepushe yasa jita ni yenu, alioze yingwakunjika mu moko jenu. 12 Yingwavwisa mwongo, yingwahanga kumeso jenu ngwe chizechene nalingile ni mianangana aali A-Amore. Chino chakachilingile ni katana chipwe ni uta wenu. 13 Mba, yingunwaha chifuchi chize nanukwashile kukumba, yinutwama mu mambonge waze kunwatungile. Nunali uva ni olevwe yize kunwatumbile.’

14 “Kashika, vwilenu Yehova woma, mulingilenu ni mbunge yimuwika ni kushishika. Chizenu mukachi kenu tuzambi waze tulamba jenu apwile ni kuwayila mu sali lia lwiji Ufrateze ni mu Engitu, wayilenu wika Yehova. 15 Haliapwila, nyi kunwazangile kuwayila Yehova, sakulenu musono yoze munuwayila, nyi tuzambi waze tulamba jenu apwile ni kuwayila mu sali lia lwiji Ufrateze nyi tuzambi twa A-Amore a mu chifuchi muze nunatwama. Alioze, yami ni akwa-zuwo liami mutuwayila Yehova.”

16 Chocho atu yakumbulula ngwo: “Chikapwe kusuku ni yetu kuhichika Yehova hanga tuwayile tuzambi akwo. 17 Yehova, Zambi yetu, mwe watuchijile mu chifuchi cha Engitu hamwika ni yisemi jetu, chifuchi cha undungo. Iye mwe walingile yikomokeso yinene kumeso jetu ni kutufunga mu majila eswe waze twendele ni mukachi ka atu eswe waze twapalikile. 18 Yehova yahuma atu eswe, kuchingako ni A-Amore waze te atwama mu chifuchi chino. Kashika, ni yetu mutuwayila Yehova mumu iye kali Zambi yetu.”

19 Mba Yoshua yalweza atu ngwenyi: “Yenu kunuchi kuhasa kulingila Yehova, mumu iye kali Zambi musandu, Zambi yoze wakuzanga hanga amuwayile wika iye. Kechi kukonekena uhulia ni shili yenu. 20 Nyi munwehuka Yehova ni kulingila tuzambi a yilambala, iye malimika ni yenu ni kununongesa, chipwe ngwe hananulingila yuma yipema.”

21 Chocho, atu yamba kuli Yoshua ngwo: “Ka, yetu mutulingila Yehova!” 22 Yoshua yamba kuli atu ngwenyi: “Yenu ene nuli yela ha yize nwamba, ku zango lienu hinwasakula kulingila Yehova.” Ayo yakumbulula ngwo: “Ewa, tuli yela!”

23 “Kashika, chizenu tuzambi a yilambala waze ali mukachi kenu, talikisenu mbunge jenu kuli Yehova, Zambi ya Izalele.” 24 Atu yamba kuli Yoshua ngwo: “Mutulingila Yehova, Zambi yetu ni kwononokena liji lienyi!”

25 Mba ha tangwa liacho, Yoshua yalinga usendo ni A-Izalele, yaaha shimbi ni chiyulo ku Shekeme. 26 Hachino, Yoshua yasoneka maliji wano mu mukanda wa Shimbi ya Zambi. Mba yanda liwe linene yalisa mushi lia mutondo unene uze wapwile hakamwihi ni muma musandu mwa Yehova.

27 Yoshua yanunga ni kulweza atu eswe ngwenyi: “Talenu! Liwe lino mulikapwa chela hakachi ketu, mumu lievwa yeswe yize Yehova atulweza. Mulikapwa nawa chela hakachi kenu hanga nuchine kulituna Zambi yenu.” 28 Mba Yoshua yalweza atu hanga aye kwo, mutu ni mutu yaya ku chihinga chenyi.

29 Kulutwe lia yuma yino, Yoshua, mwana wa Nune, kavumbi ka Yehova, yafwa ni miaka 110. 30 Yamufunda mu njiza ya chihinga chenyi, ku Timna-Sera, yize yili ku chifuchi cha ku milundu ya Eframe, ku sango ya mulundu wa Ngasha. 31 A-Izalele yanunga ni kulingila Yehova ha matangwa eswe a Yoshua ni ha matangwa eswe a makulwana waze anungine muze Yoshua te hafwa, waze anyingikine yitanga yeswe yize Yehova asolwele kuli A-Izalele.

32 Yifwaha ya Yosefwe, yize A-Izalele ejile nayo ku Engitu, yayifunda ku Shekeme mu munda uze Yakomba alanjile kuli ana ja Hamore, tato ya Shekeme, ha 100 wa mbongo; mba munda wacho yiupwa chihinga cha ana ja Yosefwe.

33 Eliazare, mwana wa Arone, neye yafwa. Yamufunjila ku chifuchi cha ku milundu cha mwanenyi Finehase, chifuchi chize ahanyine kuli mwanenyi, ku milundu ya Eframe.