Yoshua

6 Mbonge ya Yeriku yapwile ya kuyika mumu lia A-Izalele; niumwe yoze te wakunjila hanji kufwambukamo wakuhi.

2 Yehova yalweza Yoshua ngwenyi: “Tala, hinakwaha Yeriku ni mwanangana wamo ni tujita jenyi a hamu. 3 Yenu eswe tujita, nwatamba kujinga mbonge kamuwika. Nwatamba kuchilinga ha matangwa asambano. 4 Sakula asasendote shimbiali hanga ambate yitavwi shimbiali ya mbinga ja kuji a panga ni kutetekela kulutwe lia Mushete. Alioze, ha tangwa liamuchishimbiali, yenu nwatamba kujinga mbonge ha yisuho shimbiali, asasendote katamba kwimba yitavwi. 5 Muze memba yitavwi ya mbinga ja kuji a panga, muze munwivwa zungo lia yitavwi, atu eswe katamba kukololoka ngwe kukololoka cha waze ali mu jita, mba chipanga cha mbonge muchiwuzuka. Atu eswe katamba kunjila mu mbonge.”

6 Chocho, Yoshua mwana wa Nune, yakungulula asasendote ni kwalweza ngwenyi: “Andenu Mushete wa usendo, asasendote shimbiali katamba kumbata yitavwi shimbiali ya mbinga ja kuji a panga ni kupalika kulutwe lia Mushete wa Yehova.” 7 Iye yalweza atu ngwenyi: “Yeenu, jingenu mbonge, maswalale waze ali ni mata katamba kutetekela kulutwe lia Mushete wa Yehova.” 8 Ngwe chize Yoshua alwezele atu, asasendote shimbiali waze te ali ni yitavwi shimbiali ya mbinga ja kuji a panga, yatetekela kumeso ja Yehova ni kwimba yitavwi, waze te anambata mushete wa usendo wa Yehova te kanakaula kunyima. 9 Maswalale waze apwile ni mata yatetekela kulutwe lia asasendote waze te anembi yitavwi, alioze maswalale akwo waze apwile kunyima yakaula Mushete aku asasendote te kananungu ni kwimba yitavwi.

10 Yoshua yalweza atu ngwenyi: “Kanda nukololoka chipwe liji lienu katambile kulivwa. Liji nilimwe kuliatambile kutuhuka mu kanwa lienu ndo ha tangwa lize mungunulweza ngwami: ‘Kololokenu!’ Mba munukololoka.” 11 Ayo yajinga mbonge yeswe ni Mushete wa Yehova, mba yafuna mu chilombo yapombamo.

12 Muze te hikwacha, Yoshua yahinduka chimenemene, asasendote yazundula Mushete wa Yehova. 13 Malunga waze apwile ni mata yaya kulutwe, asasendote shimbiali waze te ali ni yitavwi shimbiali ya mbinga ja kuji a panga ni waze te anambata Mushete wa Yehova yapwa mukachi. Chizavu chikwo cha maswalale yichikaula kunyima lia Mushete wa Yehova. Asasendote yanunga ni kwimba yitavwi. 14 Ha tangwa liamuchiali, ayo yajinga mbonge kamuwika mba yahiluka mu chilombo. Chino kachilingile ha matangwa asambano.

15 Ha tangwa liamuchishimbiali, yahinduka chimenemene, yajinga mbonge ha yisuho shimbiali. Ha tangwa liacho lie wika ajingile mbonge yisuho shimbiali. 16 Ha chisuho chamuchishimbiali, muze asasendote embile yitavwi, Yoshua yalweza atu ngwenyi: “Kololokenu, mumu Yehova hanwaha mbonge! 17 Mbonge ni yeswe yize yilimo nwatamba kuyinongesa, mumu yambala ya Yehova. Alioze, hichikenu ni mwono Rahape mwe chikoi ni waze eswe ali no ku zuwo lienyi, mumu kanakasweka ngendeshi waze tunakatuma. 18 Alioze, kanda nukwata ku yuma yize atamba kunongesa hanga nuchine kuzanga yuma yacho ni kuyanda. Mumu nyi nwanda yuma yacho, mununeha lamba mu chilombo cha Izalele. 19 Alioze prata yeswe, oru ni yikwata yeswe ya unengu ni utale yapwa yisandu, yambala ya Yehova. Nwatamba kuyitwala mu mushete wa upite wa Yehova.”

20 Muze embile yitavwi, atu yakololoka. Muze atu evwile zungo lia yitavwi ni kukololoka chinji ngwe zungo lia jita, chipanga yichiwuzuka. Hazehene, atu yanjila mu mbonge ni kuyikumba. 21 Yanongesa ni katana yuma yeswe yize yapwile mu mbonge ngwe: Malunga, mapwo, akweze, tushinakaji, ngombe, mapanga ni yimbulu.

22 Yoshua yalweza malunga aali waze ayile ni kwendesa chifuchi ngwenyi: “Njilenu mu zuwo lia mwe chikoi, munehenu haze hamwe ni eswe waze ali nenyi, ngwe chize nwalishingile.” 23 Chocho, akweze ngendeshi yatuhuka ni Rahape, tato, naye, mandumbu jenyi ni akwa-zuwo lienyi eswe. Yatuhwisa asoko jenyi eswe, yaatwala haze lia chilombo cha Izalele.

24 Mba yocha mbonge ni yeswe yize yapwilemo. Alioze, prata, oru, yikwata ya unengu ni utale yayisa mu mushete wa upite wa mu zuwo lia Yehova. 25 Yoshua kahichikile wika ni mwono chikoi Rahape, akwa-zuwo lia tato ni akwa-zuwo lienyi eswe; iye katwama mu Izalele ndo musono, mumu kaswekele ngendeshi waze Yoshua atumine hanga endese mbonge ya Yeriku.

26 Ha shimbu liacho, Yoshua yalishinga* ngwenyi: “Akashingiwe kumeso ja Yehova mutu yoze meseka kutungulula mbonge yino ya Yeriku. Nyi makasamo fundamentu yamo, makafwisa mwanenyi mutangu, nyi makasamo yikolo yamo, makafwisa mwanenyi wa kasula songo.”

27 Yehova kapwile hamwe ni Yoshua, lufuma wenyi kahetele hashi heswe.