Mukanda Utangu wa A-Korindu

3 Kashika mandumbu, chahashile kuhanjika ni yenu ngwe atu a ku spiritu, alioze ngwe atu a ku musunya, ngwe twanuke muli Kristu. 2 Yenu te kanda nuchikola ku spiritu, chipwe haliapwila kanda nuchikola ku spiritu. Kashika, nanunwishine yamwa chakuhona kunwaha kulia. 3 Mumu nuchili akwa-musunya, chikwo nawa, hakachi kenu hachili ukwa ni vunda. Shina hi umwenemwene ko ngwo, nuli akwa-musunya ni kwenda ngwe chize atu akwenda? 4 Mumu muze umwe mamba ngwenyi: “Ami nguli wa Paulu,” alioze mukwo ngwenyi: “Ami nguli wa Apolu,” shina kunushi kusolola yitanga ya ku musunya nyi?

5 Mwe Apolu iya? Hanji, Paulu iya? Yetu tuli wika tuvumbi waze anulongesele kufuliela, mumu mutu ni mutu hakachi ketu tunalingi yize Mwene atuhele kulinga. 6 Yami natumbile mbuto, Apolu mwe wahinjilile, alioze Zambi mwe wayitatwishile, 7 chocho, chipwe mukwa-kutumba hanji mukwa-kuhinjila hi alemu ko, mumu Zambi mwe wakutatwisa. 8 Yoze wakutumba ni yoze wakuhinjila kanapu amuwika,* alioze mutu ni mutu kumakatambula fweto yenyi mwene kulita ni mulimo wenyi. 9 Mumu tuli akwa-milimo-ni-akwo a Zambi. Atu kali munda wa Zambi uze iye analimi, ni zuwo lize iye anatungu.

10 Kulita ni chawana cha keke chize Zambi anguhele, yami nasele fundamentu ngwe chilangaji mupema, alioze mutu mukwo yatungaho. Kashika mutu ni mutu akanyame ha chize matungaho. 11 Mumu niumwe mahasa kusa fundamentu yikwo wakuhi, shina yize hanase kulu, yenayo Yesu Kristu. 12 Alioze, nyi umwe matunga ha fundamentu ni oru, hanji ni prata, hanji ni mawe a ndando, hanji ni mitondo, hanji ni mwambu, 13 mulimo wa mutu ni mutu uze alingile, makausolola muze tangwa mulikeza, mumu kahia mukasolola mulimo wa mutu ni mutu nyi wapwile upema hanji upi. 14 Nyi mulimo uze umwe atungile ha fundamentu muununga, iye makatambula fweto; 15 nyi mulimo wa umwe muuwema upu, iye kumatokesa yuma yinji, alioze mwene makamulamwina; chocho, muchipwa ngwe mutu yoze unatuhuka mu kahia.

16 Te kunwanyingikine ngwenu, yenu nuli tembele ya Zambi ni spiritu ya Zambi yatwama muli yenu nyi? 17 Kashika, nyi umwe monwona tembele ya Zambi, ni Zambi makamwonwona; mumu tembele ya Zambi yili yisandu, yenu nuli tembele yacho.

18 Niumwe kanda alionga iye mwene: Nyi umwe hakachi kenu manyonga kupwa mukwa-mana a mwakono,* apwe chihepuke hanga akapwe mukwa-mana. 19 Mumu mana a hano hashi kapwa uhepuke kuli Zambi. Mumu chinasonewa ngwo: “Iye kakwoza akwa-mana mu ukanyame wo ene.” 20 Cheka nawa ngwo: “Yehova* kananyingika ngwenyi manyonga ja akwa-mana kali amokomoko.” 21 Kashika niumwe kanda alisamba muli atu; mumu yuma yeswe ni yenu, 22 chipwe Paulu, hanji Apolu, hanji Sefwa, hanji hano hashi, hanji mwono, hanji kufwa, hanji yuma ya haliapwila hanji yuma yize muyizaho, yeswe yili ni yenu; 23 yenu nuli a Kristu; ni Kristu kali wa Zambi.