Asonekene Luka
17 Yesu yalweza tumbaji ngwenyi: “Yuma yize yakutalingisa muyipwako mashimbu eswe. Alioze, lamba kuli yoze maneha yuma yacho! 2 Muchipema kuli iye kumuzezeleka liwe linene lia kutwa nalio ni kumumbila mu kalunga-lwiji, kuhiana iye atalingise umwe wa kuli wano akepe. 3 Kanyamenu yenwene. Nyi ndumbwe makuvulumuna, mulweze upi wenyi, nyi malikonyeka, mukonekene. 4 Chipwe iye makuvulumuna yisuho shimbiali ha tangwa limuwika, mba mafuna kuli yena yisuho shimbiali ni kwamba ngwenyi: ‘Ngukonekene kama, watamba kumukonekena.”
5 Apostolo yamba kuli Mwene ngwo: “Tuwezele kama ufulielo.” 6 Mwene yamba ngwenyi: “Nyi munupwa ni ufulielo ngwe luchichi wa mosetate, kachi munwamba ku mutondo* uno ngwenu: ‘Tutuluka ulitumbe mu kalunga-lwiji!’ newo kumuunwononokena.
7 “Iya wa kuli yenu, nyi ndungo yenyi kanalimi hanji kanafunga mapanga, muze makatuka ku munda meza ku zuwo, mamulweza ngwenyi: ‘Tweya kawashi utwame ku mesa hanga ulie’? 8 Shimbu ambe chocho, shina kechi kwamba kuli iye ngwenyi: ‘Ngululiekele kulia, lijichike muya hanga ungukalakalile ndo haze munguhwishila kulia ni kunwa, mba ni yena mulia, munwa’? 9 Shina masakwilila ndungo yenyi ha kulinga yize amutuma? 10 Chizechene nawa, muze hinwalinga yuma yeswe yize anutuma, ambenu ngwenu: ‘Tuli ndungo amokomoko. Twalinga yize te twatamba kulinga.’”
11 Muze te anayi ku Yerusaleme, Yesu yapalika ndusu mu Samaria ni Ngalileya. 12 Muze te ananjila mu chimwe chihunda, kumi lia malunga akwa-mbumba yaya ni kulitakana nenyi, alioze, ayo te kanamanyina kusuku. 13 Mba yakololoka ngwo: “Yesu, Longeshi, tuvwile kama keke!” 14 Muze iye haamona, yaalweza ngwenyi: “Yeenu nulisolole kuli asasendote.” Muze ayo te anayi, yaapemesa ku mbumba yo. 15 Umwe wa kuli ayo, muze hamona ngwenyi kamuuka, yahiluka ni kuhalisa Zambi ni liji mwilu. 16 Mba yafulamana hashi ku molu ja Yesu ni kumusakwilila. Lunga wacho te Ka-Samaria. 17 Yesu yakumbulula ngwenyi: “Ngwami kumi napemesanga nyi? Mba akwo livwa kulihi ali? 18 Nyi umwe wa kuli ayo wafunyine hanga ahalise Zambi wakuhi, shina wika lunga yono chilambala?” 19 Mba Yesu yamulweza ngwenyi: “Katuka uye, ufulielo we wakuuka.”
20 A-Fwariseu yamuhula tangwa lize Wanangana wa Zambi muwiza, iye yaakumbulula ngwenyi: “Wanangana wa Zambi kuuchi kwiza mu mulali uze atu eswe maumona ni meso, 21 chipwe atu kechi kamba ngwo: ‘Talenu, uli kuno!’ hanji, ‘Uli akuze!’ Alioze nyingikenu ngwenu, Wanangana wa Zambi uli mukachi kenu.”
22 Mba iye yamba kuli tumbaji twenyi ngwenyi: “Matangwa kumakeza muze munukazanga kumona chipwe tangwa limuwika lia Mwana-mutu, alioze, kunuchi kalimona. 23 Atu makanulweza ngwo: ‘Talenu, kali akuze!’ hanji ngwo: ‘Talenu, kuno ali!’ Alioze kanda nutuhuka chipwe kwakaula. 24 Mumu ngwe chizechene muhenyo wakuhenya mwilu sali ni sali, che muchikapwa kuli Mwana-mutu ha tangwa lienyi. 25 Alioze, chitangu iye katamba kumona lamba linji ni kulitunaye kuli atu a chisemuko chino. 26 Chikwo nawa, ngwe chizechene chapwile ha matangwa ja Noa, che muchikapwa nawa ha matangwa ja Mwana-mutu: 27 atu apwile ni kulialia, ni kunwanwa, malunga apwile ni kumbata, mapwo apwile ni kwahangisa ku malo, ndo tangwa lize Noa anjilile mu ulungu, Sanga lia Meya yiliza, yilinongesa atu eswe. 28 Ngwe chizechene nawa chalingiwile ha matangwa ja Lote, atu kapwile ni kulia, ni kunwa, ni kulanda, ni kulanjisa, ni kutumba, ni kutunga. 29 Alioze, ha tangwa lize Lote atuhukile mu Sondome, yikunoka kahia ni fundanga mwilu, yikanongesa eswe. 30 Che muchikalingiwa nawa ha tangwa lize makasolola Mwana-mutu.
31 “Ha tangwa liacho, yoze makapwa ha fulumba, kanda akasunuka hanga akande yikwata yenyi yili mu zuwo, chizechene nawa, yoze makapwa ku munda, kanda akahilukila yuma yize yasala kunyima. 32 Iwulukenu pwo lia Lote. 33 Yoze mafupa kulamwina mwono wenyi, kumakautokesa, alioze, yoze matokesa mwono wenyi, makaulamwina. 34 Ngunanulweze ngwami, ha ufuku wacho, atu aali makapwa ha muhela, umwe makaya nenyi, alioze mukwo makamuhichika. 35 Mapwo aali makatwa ku utwilo umuwika, umwe makaya nenyi, alioze mukwo makamuhichika.” 36* —— 37 Hachino, yamuhula ngwo: “Mwene kulihi?” Iye yaakumbulula ngwenyi: “Kweswako mukukapwa mujimba, kwenako nawa pupa makakunguluka.”