Yilinga ya Apostolo
17 Muze te hapalika ndusu mu Afwipoli ni Apolonya, yaaheta ku Tesalonika kuze te kwatwama sunangonga ya A-Yunda. 2 Paulu kulita ni ndako yenyi, yanjila mu sunangonga yaya ni kuhanjika no. Mba ha Sambata jitatu waakwashile kupalikila mu Yisoneko. 3 Yaalumbunwina pundu kulita ni chize chinasonewa ngwo, Kristu chamutamba kumona lamba ni kumuhindwisa hakachi ka afu. Iye wambile ngwenyi: “Yono Yesu ngunanwambulwila, iye mwe Kristu.” 4 Mumu lia chino, amwe hakachi ko yafuliela, yalichinga ni Paulu ni Saila. Chikwo nawa, mbunga yinene ya A-Ngresia akwa-kuwayila Zambi ni mapwo anji a lufuma, no yafuliela.
5 Alioze A-Yunda yevwa ukwa, yatambika amwe yingulungulu waze te akwendangana wika ha yitanda ni kukungulula mbunga, yaneha vunda yinji mu mbonge. Yajingilika zuwo lia Yasone ni kufupa Paulu ni Saila hanga aakunjike ku mbunga ya mu mbonge. 6 Alioze kawanyineko. Kashika yambulumuna Yasone ni mandumbu amwe ndo kumeso ja akwa-kuyula a mu mbonge ni kukololoka ngwo: “Malunga waze akuvundula yifuchi yeswe ya hashi haliapwila muno mwali, 7 ku zuwo lia Yasone anakatulila. Malunga wano eswe kakulimika ni shimbi ja Sezare ni kwamba ngwo, kuli mwanangana mukwo, iye Yesu.” 8 Muze mbunga ni akwa-kuyula mbonge evwile yuma yino, asakalalile. 9 Mba muze te hatambula mbongo kuli Yasone ni kuli akwo ngwe chifungo, yaatusula yaya kwo.
10 Ha ufuku uzewene mandumbu yatuma Paulu ni Saila ku Mberea. Muze o aheteleko yanjila mu sunangonga ya A-Yunda. 11 A-Yunda a ku Mberea kazangile chinji kulilongesa kuhiana a ku Tesalonika, mumu o katayijile liji lia Zambi ni mbunge yimuwika ni kuhengwola kanawa Yisoneko matangwa eswe hanga apwe ni shindakenyo nyi yuma yize evwile yapwile lume yamwenemwene. 12 Chocho, anji a kuli ayo yafuliela hamwe ni A-Ngresia alemu anji, mapwo ni malunga. 13 Alioze, muze A-Yunda a ku Tesalonika evwile ngwo, Paulu kanambujola nawa liji lia Zambi ku Mberea, yayako hanga apinjise ni kuvundula mbunga. 14 Hohene, mandumbu yatuma Paulu mu jila ya kuya ku kalunga-lwiji, alioze Saila ni Timoteu yasala ku Mberea. 15 Waze atwalile Paulu yamuhetesa ku Atene. Ha kuhiluka ku Mberea, Paulu yaashika hanga alweze Saila ni Timoteu ngwo, nyi muchilita amuwane ni kawashi.
16 Shimbu te Paulu anaashimbwila mu Atene, yalipikala chinji ha kumona mbonge yinazala too ni tuponya. 17 Chocho yaputuka kulongesa A-Yunda mu masunangonga ni atu akwo waze te akuwayila Zambi. Mba matangwa eswe walongesele atu waze apwile ha yitanda ni kwakwasa kuwana ulumbunwiso wa Yisoneko. 18 Alioze, amwe a kuli akwa-mana jo A-Epekuria ni A-Stoiku yaputuka kulihangujola nenyi, yamba ngwo: “Yono lunga kakuhanjika chinji, yika anazange kutulweza?” Akwo yamba ngwo: “Kanasoloka ngwe mukwa-kwambujola tuzambi twa yilambala.” O kambile yuma yino mumu Paulu wambujolwele sango jipema hakutwala kuli Yesu ni uhindukilo. 19 Chocho yamukwata yamutwala ku Chota* Chinene cha Atene ni kumwamba ngwo: “Tulweze kama longeso lino liaha lize unambujola. 20 Mumu unatulweze yuma yaha, kashika tunazange kunyingika ulumbunwiso wa yuma yacho.” 21 Atu eswe a mu Atene ni ngeji waze te atwamamo, te keshi kulinga chuma chikwo, shina wika kuhanjika ni kupanjika sango jaha. 22 Chocho, Paulu yakatuka mukachi ka Chota Chinene cha Atene ni kwamba ngwenyi:
“Yenu malunga Akwa-Atene, ami ngunamono ngwami, yenu nwakuvwila chinji woma tuzambi kuhiana akwenu akwo eswe. 23 Chakutalilaho, muze napalikile ni kutala yuma yize nwakuwayila, yinguwana chimwe chilumbilo chinasonewa ngwo: ‘Kuli Zambi Yoze Kutwanyingikine.’ Zambi yoze nwakuwayila chakuhona kumunyingika mwe ngunanwambulwila. 24 Zambi yoze watangile hashi ni yuma yeswe yiliho, se Iye kapwa Mwenya-lilu ni hashi, kashika iye keshi kutwama mu matembele akutunga ni moko ja atu. 25 Chikwo nawa, keshi kumulingila ni moko ja atu ngwe kanahono chuma chimwe. Mumu iye mwene kakuhana kuli eswe mwono, ni mwiku, ni yuma yeswe. 26 Iye watangile mavungu eswe a hashi kupalikila muli mutu umuwika hanga akatwame hashi heswe. Yatesa nawa mashimbu a yuma yinji ni kuteta manjiza muze atu atamba kutwama, 27 hanga akamufupe, akapapate hali iye ni kumuwana, chipwe ngwe katwamine kusuku ni mweswe wa kuli yetu. 28 Mumu muli iye tuli ni mwono, muli iye twakwenda, muli iye tuli hano, ngwe chize ambile akwenu amwe akwa-kusoneka ngwo: ‘Ni yetu nawa tuli ana* jenyi.’
29 “Kashika, amu tuli ana* ja Zambi, kutwatambile kunyonga ngwetu, Zambi kalifwa ni oru, ni prata, ni liwe hanji chuma chikwo chakusonga ni utotombo ni mana ja atu. 30 Zambi keshi kwalula miaka ya kwalajala, alioze haliapwila kakwambila atu eswe a ku yihela yeswe hanga alikonyeke. 31 Mumu iye hanatongola tangwa lize makasopesa akwa-hashi eswe ni ululi kupalikila muli mutu yoze mwene atongwele. Iye kahanyine shindakenyo ya chikuma chino kuli atu eswe ha kumuhindwisa hakachi ka afu.”
32 Muze atu evwile sango ja uhindukilo wa afu, amwe yaputuka kumuseha, alioze akwo yamba ngwo: “Mutukakupanjika ha tangwa likwo nawa.” 33 Chocho Paulu yakatuka mukachi ko. 34 Alioze amwe malunga yalichinga nenyi, yafuliela. Hakachi ko hapwile Ndioniseu yoze wapwile ngaji mu Chota Chinene cha akwa-kuyula mu Atene ni umwe pwo avuluka ngwo Ndamari ni atu akwo nawa.