Kuli A-Roma
12 Kashika ngunaliumbu kuli yenu mandumbu, mumu lia keke yize Zambi anuvwilile, tumbikilenu mijimba yenu ngwe mulambu wa mwono, usandu uze wakupemena kuli iye. Kulinga chino muchinukwasa kumuwayila ni kunyonga chenu cheswe. 2 Kanda nwecha hanga yuma ya hano hashi* yinwalumune, alioze tayizenu hanga Zambi alumune manyonga jenu, nukahase kusa chinyingi yenwene ha upale ungunu wa Zambi, yuma yipema ni yize yakumuwahila.
3 Mumu lia chawana cha keke ya Zambi chize anguhele, ngunambe kuli mutu mweswe hakachi kenu ngwami, kanda alinyongena kuhiana chize chamutamba kunyonga. Alioze pwenu ni manyonga waze analite hanga mutu mweswe hakachi kenu alieseke iye mwene ni kulita ni ufulielo uze amuhele kuli Zambi. 4 Mumu chizechene ngwe mujimba wetu ukwete yihanda yinji, alioze yihanda yacho kuyishi kulinga yuma yimuwika. 5 Chimuwika nawa ni yetu, chipwe ngwe tuli anji, hindu twapwa mujimba umuwika muli Kristu. Alioze nawa, mutu ni mutu kali chihanda cha mukwo. 6 Tuli ni utotombo walisa kulita ni chawana cha keke chize atuhele. Kashika, nyi tuli ni utotombo wakuprofeteza, tuprofetezenu kulita ni ufulielo wetu; 7 nyi wa uvumbiko, tuvumbikenu; yoze uli ni utotombo wakulongesa, alongese; 8 yoze ukwete utotombo wakutakamisa,* atakamise;* yoze wakuhana, akachilinge ni kuvungumiona; yoze wakusongwela, akachilinge ni mbunge yeswe; yoze wakuvwila akwo keke, akachilinge ni chiseke.
9 Zango lienu likapwe kulishi ulembekese. Vwilenu lwaji yuma yipi; lalaminyenu ku yuma yipema. 10 Ni zango lia undumbu, lizangenu umwe ni mukwo. Ha ulemu, eswe nukaliange kulilemesa umwe ni mukwo. 11 Pwenu yikilikita, kanda nupwa yileya.* Echenu hanga spiritu yisandu yinwehe tachi. Lingilenu Yehova* ni mbunge yenu yeswe. 12 Wahililenu mu kutalatala. Nyongononenu mu luyinda. Nyongononenu mu kulemba. 13 Lianyinenu yuma yize nukwete ni asandu kulita ni kuhona cho. Pwenu ni mbunge ya kuzumbula ngeji. 14 Nungenu ni kuwahisa waze akunuhungumiona; awahisenu, kanda nwashinga. 15 Wahililenu hamwe ni waze anawahilila; lilenu hamwe ni waze analila. 16 Lihulumbenu hali akwenu ngwe chizechene nwakulihulumba hali yenwene. Kanda nulihulikila chinji hali yenwene, alioze pwenu akwa-kulikehesa. Kanda nunyonga ngwenu, nukwete mana anji kuhiana akwenu eswe.
17 Kanda nufwetesa niumwe yipi ha yipi. Alioze, esekenu kulinga yipema kumeso ja atu eswe. 18 Nyi muchilita ni uhashi wenu, pwenu ni sambukila ni atu eswe. 19 Mandumbu jami a zango, kanda nulikalila milonga yenwene, echenu Zambi hanga asolole utenu wenyi wa ululi; mumu chinasonewa ngwo: “‘Kukala milonga ni chami; yami mwene mungukafwetesa,’ chocho anambe Yehova.”* 20 Kashika, “nyi mukwa-kole ye mevwa zala, mwehe kulia; nyi mevwa pwila, munwise; mumu ha kulinga chocho,* mukalunjika makala a kahia ha mutwe wenyi.” 21 Kanda nwecha hanga upi unukumbe, alioze nungenu ni kukumba upi ha kulinga yipema.