Asonekene Mateu
16 Hazehene, A-Fwariseu ni A-Satuseu yakundama kuli Yesu hanga amweseke, yamwita aasolwele chilayi cha mwilu. 2 Yaakumbulula ngwenyi: “Muze kwakupwa chingoloshi, nwakwamba ngwenu: ‘Musono kwilu mukupema mumu lilu linachili,’ 3 ni chimene nwakwamba ngwenu: ‘Musono mukupwa chishika ni vula mumu kwilu kunavunduka.’ Yenu nunanyingika kusa chinyingi ha yilayi ya mwilu, alioze kunushi kuhasa kusa chinyingi ha yilayi ya miaka. 4 Chisemuko chipi, cha atu waze keshi kushishika* kuli Zambi, nunanungu ni kufupa chilayi, alioze nichimwe chilayi kechi kunwahacho, shina wika chilayi cha Yona.” Muze hamba maliji wano, yaahichika yaya kwenyi.
5 Tumbaji yazauka yaya mu sali, alioze yavulama kumbata mbolo. 6 Yesu yaalweza ngwenyi: “Kanyamenu, keyenu ni futunwiso ya A-Fwariseu ni A-Satuseu.” 7 Chocho yaputuka kulinyinguna umwe ni mukwo ngwo: “Kutwejile ni mbolo.” 8 Yesu hakuchinyingika, yamba ngwenyi: “Yenu akwa-ufulielo ukehe, mumu liaka nunalinyinguna ngwenu kunwejile ni mbolo? 9 Ni haliapwila kanda yichinulumbunuka, kunushi kwiwuluka mbolo jitano hali atu 5,000, ni unji wa mitonga yize nwakungile? 10 Nyi hanji kunwewulukile mbolo shimbiali, hali atu 4,000, unji wa mitonga yinene-yinene yize nwakungile? 11 Kuchi kunwahashile kunyingika ngwenu, chahanjikile hakutwala ku mbolo? Nanulweza hanga nukanyame ha futunwiso ya A-Fwariseu ni A-Satuseu.” 12 Mba ayo yanyingika ngwo, te kanaalweze hanga akanyame ni malongeso ja A-Fwariseu ni ja A-Satuseu, hi ha futunwiso ya mbolo ko.
13 Muze ahetele ku chifuchi cha Sesarea-Fwilipu, Yesu yahula kuli tumbaji twenyi ngwenyi: “Atu kakwamba ngwo Mwana-mutu iya?” 14 Ayo yamukumbulula ngwo: “Amwe kakwamba ngwo, uli Yoano Chipapachisa, eka ngwo, uli Eliya, akwo ngwo, uli Jeremia hanji umwe wa kuli aprofeta.” 15 Iye yaahula ngwenyi: “Mba kuli yenu, yami nguli iya?” 16 Semone Petulu yamukumbulula ngwenyi: “Yenu nuli Kristu, Mwana wa Zambi ya mwono.” 17 Yesu yamulweza ngwenyi: “Kuwawaha, yena Semone mwana wa Yona, mumu yino hi atu ko akusolwelayo, alioze Tata uli mu malilu. 18 Ngunakulweze nawa pundu ngwami: Yena uli Petulu, ha liwe lino mungukatungaho chikungulwila chami, chipwe yajilo ya fuka, kuuyichi kachikumba. 19 Mungukakwaha sapi ja Wanangana wa mu malilu, cheswacho mukasa hano hashi, hanachikase kulu mu malilu, cheswacho mukasulula hano hashi, hanachikasulula kulu mu malilu.” 20 Mba yakanjisa chikolo tumbaji twenyi hanga ahone kulweza mutu niumwe ngwo iye kali Kristu.
21 Kukatuka ha tangwa lize, Yesu yaputuka kulumbunwina tumbaji twenyi ngwenyi, iye katamba kuya ku Yerusaleme ni kumona lamba linji ku moko ja makulwana, asasendote a lutwe ni alongeshi a shimbi, ni kumushiha, mba ha tangwa liamuchitatu makamuhindwisa. 22 Petulu ha kuchivwa, yamutwala ku tenga, yaputuka kumukanjisa ngwenyi: “Mwene, livwile kama keke! Chino kuchichi kulingiwa kuli yena.” 23 Alioze, Yesu yomba nyima Petulu, ni kumwamba ngwenyi: “Yako kunyima liami, Satana! Yena uli chitalingiso kuli yami, mumu uli ni manyonga ja atu hi a Zambi ko.”
24 Hohene, Yesu yamba kuli tumbaji twenyi ngwenyi: “Nyi mutu mazanga kungukaula, alitune iye mwene, azundule mutondo wenyi wa lamba, anunge ni kungukaula. 25 Mumu mweswe mazanga kulamwina mwono wenyi, makautokesa, alioze yoze matokesa mwono wenyi mumu lia yami, makauwana. 26 Yika mutu mayuka nyi mazuka yuma yeswe ya hano hashi, alioze matokesa mwono wenyi? Hanji yika mutu mahasa kusumbakenya nayo mwono wenyi? 27 Mumu Mwana-mutu makeza mu uhenya wa Tato, hamwe ni angelo jenyi, mba makafweta mutu ni mutu kulita ni yitanga yenyi. 28 Pundu ngunambe kuli yenu ngwami, atu amwe waze anamana hano kechi kafwa, ndo muze makamona Mwana-mutu kaneza mu Wanangana wenyi.”