Yilinga ya Apostolo
27 Muze hapatula ngwo mutwenda mu ulungu ni kuya ku Italia, Paulu ni amwe funge akwo yaakunjika ku moko ja kapitau wa maswalale avuluka ngwo Juliu, wa mu chizavu cha maswalale ja Augustu.* 2 Mba twanjilile mu ulungu wa ku Andramitenu uze te muupalikila ku membo a ku zuzu ya Azia, yituputuka wenyi. Aristako Ka-Masendoniya wa ku Tesalonika yaya hamwe ni yetu. 3 Muze te hikwacha, yituheta ku Sendone. Juliu yasolwela Paulu utu ha kumutayiza kuya kuli masepa jenyi akamuzumbule.
4 Mba katu ku kuze, twapalikilile ku mwanda wa tungu lia Shipre sali lize te kukushi fuji, mumu fuji yalimikine ni yetu. 5 Muze te hitwazauka kalunga-lwiji hakamwihi ni Selishia ni Pamafwilia yituheta ku Mira mu Lishia. 6 Koko, kapitau wa maswalale yawana ulungu wa ku Alexandria uze te unayi ku Italia, mba yatunjisamo. 7 Muze twendele hakehe-hakehe ha matangwa anji, yituheta ni lamba linji ku Nindu. Amu fuji yalimikine ni yetu, kutwahashile kuya kulutwe. Chocho yituya hakamwihi ni Kreta ku Salemone kuze kwapwile fuji yikehe. 8 Yitupalika ni lamba linji ku mbumbulu ya kalunga-lwiji ndo ku chimwe chihela avuluka ngwo, Zuzu Jipema hakamwihi ni mbonge ya Lasea.
9 Te hikwapalika mashimbu anji chocho kwenda mu ulungu yichipwa ponde, mumu chipwe Mashimbu Akulitwamina Kulia* te hapalika. Mba Paulu yaatoweza 10 ngwenyi: “Malunga ngunamono wenyi uno muuneha ponde yinji ni kutokesa yuma, hi yuma ni ulungu wika ko alioze ni mwono* wetu nawa.” 11 Chipwe chocho kapitau wa maswalale yapanjika kuli mukwa-kwendesa ulungu ni kuli mwenya-ulungu, kapanjikile yize Paulu ambile. 12 Ha kumona ngwo zuzu yacho te kuyalitele kutwamako ha mashimbu a chishika, anji yahana nyonga lia kukatukako hanga amone nyi te mahasa kuheta ku Fwenishia kuze te matwama ha mashimbu a chishika ku zuzu ya Kreta yize yatalikisa ku chivumbuko, ku mwanda ni kutunda.
13 Muze fuji ya ku sule yaputukile kupekumuka hakehe-hakehe, o yanyonga ngwo waze kapwile mashimbu apema a kununga wenyi wo ndo ku Fwenishia, chocho yasosa ankora* yenda mu ulungu ni kusesesa hakamwihi ni ngenge ya Kreta. 14 Alioze kulutwe lia shimbu likehe yikwiza kakundukundu munene kukatuka ku tungu yoze avuluka ngwo, Fuji ya ku Chivumbuko.* 15 Yize yahungumwine ulungu ni tachi, chocho kutwahashile kutalikisa ulungu ku fuji. Mba muze te hitwahonga, yitwecha hanga fuji yituhungumune. 16 Yitupalika ku katungu kakehe kaze avuluka ngwo Kalauta, yitweseka kukasa wato* ukehe uze te tunambata, nihindu kutwauhashile. 17 Muze hasosa wato, yajichika ngoji ku ulungu hanga upwe ni tachi. Yevwa woma ngwo masakaminya ha masekeseke ku Serete.* Kashika yaahulumuna hina linene lia ulungu mba ulungu yiuhungumioka ni fuji. 18 Amu kakundukundu te woka naye, kashika mukwachako yituputuka kumbila yuma mu kalunga-lwiji. 19 Ha tangwa liamuchitatu, yambila ni moko jo ene yuma yakwendesa nayo ulungu mu kalunga-lwiji.
20 Ha matangwa anji kutwamwene tangwa chipwe tutongonoshi, kakundukundu yoka chinji hali yetu kashika chipwe kutalatala cha kulilamwina te kutushi nacho nawa. 21 Muze te hikwapalika shimbu linene chakuhona kulia, Paulu yakatuka mukachi ko ni kwamba ngwenyi: “Enu malunga, nyi te nwapanjikile chiyulo chami kachi twakakatukile ku Kreta ni kumona luyinda yono ni kutokesa yuma yipwahaha. 22 Chipwe chocho ngunanukolweza ha shimbu lino ngwami, takamenu mumu niumwe matokesa mwono wenyi wakuhi, alioze ulungu wika we muutoka. 23 Ha ufuku, umwe mungelo wa Zambi yoze nakuwayila nikulingila milimo yisandu, kasolokanga kuli yami 24 ni kwamba ngwenyi: ‘Paulu, kanda wivwa woma, chakutamba kumana kumeso ja Sezare! Chikwo nawa, Zambi malamwina mwono we ni wa waze ali hamwe ni yena.’ 25 Kashika malunga takamenu, mumu nakufuliela muli Zambi ngwami yuma yeswe muyikalingiwa ngwe chize angulwezayo. 26 Alioze chatutamba kuhungumukina ku limwe tungu.”
27 Mba yituhungumioka kweka ni kweka mu Kalunga-Lwiji wa ku Andriateku. Ha tangwa 14 ha muchima ufuku, akwa-kwendesa ulungu yaputuka kunyonga ngwe tunakundama ku sesa lia kalunga-lwiji. 28 O yeseka ha mashima ja kalunga-lwiji yawana metro* 36, yenda yimwe ndambu yeseka cheka nawa yawana 27 a metro.* 29 Yevwa woma ngwo ulungu muusakaminya ha mawe, kashika yasunwisa ankora jiwana ja kunyima ni kushimbwila hanga kwilu kuche ni kawashi. 30 Akwa-kwendesa ulungu yafupa kuchina. Kashika yasunwisa wato mu kalunga-lwiji ni kulinga ngwe kanazange kukasa ankora ku zuzu ya kulutwe. 31 Alioze Paulu yamba kuli kapitau wa maswalale ni kuli maswalale ngwenyi: “Atu wano nyi matuhuka mu ulungu kunuchi kuhasa kulilamwina.” 32 Hohene maswalale yateta mihipu ya wato yauholwela mu meya.
33 Muze te kwilu himukucha, Paulu yalembejeka eswe hanga alie ngwenyi: “Hinwalinga matangwa 14 waze nunashimbwila chakuhona kulia nichimwe, 34 kashika ngunanukolweza ngwami, nyi nunazange kulilamwina, lienu; mumu chipwe lukambu umuwika wa ku mitwe yenu kechi katoka.” 35 Muze te hamba yuma yino, yanda mbolo yasakwila Zambi kumeso ja eswe yayipalula yaputuka kulia. 36 Hohene ayo eswe yajikiza ni kuputuka kulia. 37 Mu unji wetu, twapwile mu ulungu atu* 276. 38 Muze te hakuta yambila tiliku mu meya hanga ulungu ulele.
39 Muze kwachile yamona chikonja ku sesa, alioze chifuchi kahashile kuchisa chinyingi. Kutunda yikupwa masekeseke chocho yanyonga kuhengekako ulungu nyi te mahasa. 40 Mba yatusula ankora yajihichika mu meya, yajitula mihipu ya leme, yasosa mahina waze akuhana fuji ku zulu lia kulutwe, yakandwisa hanga fuji yikwateko. Mba yatalikisa ku zuzu. 41 Alioze, ha kuheta muma muze mwatakanyina tulunga-lwiji aali, ulungu yiusakaminya ha masekeseke. Zulu lia kulutwe yilikwata hashi, alioze chipinji cha kunyima yichiputuka kumakwoka ni miavu ya meya. 42 Chocho maswalale yazanga kushiha funge hanga niumwe kanda asana ni kuchina. 43 Alioze kapitau wa maswalale yazanga kulamwina Paulu kashika yaakinda kuchilinga. Mba yahana shimbi kuli malunga eswe ngwenyi, waze anyingika kusana aliange kulimbila mu meya ni kusana ndo ha tunda. 44 Akwo chaatamba kukaula ni kukwata ha mapaya hanji ku yihanda ya ulungu. Chocho eswe yaheta ha tunda ni mwono.