Mukanda wa A-Kolosu
4 Yenu miata, twamenu ni ndungo jenu ni ululi kulita ni chize chatamba, ni kunyingika ngwenu, ni yenu nuli ni Mwene mwilu.
2 Nungenu ni kulemba. Mba ha kulinga chino, nungenu ni kulaula hamwe ni kusakwilila. 3 Chikwo nawa, ni yetu tulembelenu, hanga Zambi azulule jila ya kwambulwilamo liji lienyi mba tuhase kwambujola chijimbikilo chisandu hakutwala kuli Kristu, yoze anangukashila ni malenge, 4 hanga ngukamwambujole ngwe chize changutamba kulinga.
5 Nungenu ni kwenda ni mana kumeso ja waze keshi kufuliela, kanda nukisa mashimbu jenu ni yuma yamokomoko. 6 Maliji jenu akapwe apema mashimbu eswe, akulungiwa ni mungwa hanga nukanyingike chize munukumbulula mutu ni mutu.
7 Techiku, ndumbwami wa zango, kavumbi washishika kanda ndungo-ni-mukwetu muli Mwene, makanulweza sango jeswe hakutwala kuli yami. 8 Ngunamutumu kuli yenu hanga nunyingike chize tuli, ni kutakamisa nawa mbunge jenu. 9 Iye maya nawa hamwe ni Onesimu, mukwetu washishika kanda wa zango, yoze uli umwe wa kuli yenu. O manulweza hakutwala ku yuma yeswe yize yinalingiwa kuno.
10 Aristarku, funge-ni-mukwetu ni Marku musonyi wa Mbarnabe kananumeneka. (Mba hakutwala kuli Marku, hinunatambula usongwelo hanga numutambule kanawa nyi maya ni kunumeneka), 11 ni Yesu, yoze avuluka ngwo Justu. Wano kali a kuli ngalami. Ayo wika e akwa-milimo-ni-akwetu hakutwala ku Wanangana wa Zambi. O hanapu kuli yami chishina chinene cha utakamiso.* 12 Epafwa, umwe wa kuli yenu, ndungo ya Kristu Yesu kananumeneka. Iye matangwa eswe kakulemba chikolo hali yenu hanga nukapwe atu ajama ni kupwa ni shindakenyo hakutwala ku upale weswe wa Zambi. 13 Nguli chela ngwami, iye kakukilikita chikolo mumu hali yenu ni hali A-Laotisea, ni hali waze ali mu Hierapoli.
14 Luka, ndotolo wa zango ni Ndima kananumeneka. 15 Menekenu mandumbu waze ali mu Laotisea, ni Nimifwa ni chikungulwila chize chakulikungulwila mu zuwo lienyi. 16 Muze munutanga mukanda uno, uhanenu nawa akautangile akwa-chikungulwila cha mu Laotisea, ni yenu nawa nukatange mukanda wa A-Laotisea. 17 Ambilenu nawa Arkipu ngwenu: “Manununa kanawa milimo ya Mwene yize akukunjikile.”
18 Yami Paulu, ngunasoneka maliji wano ni kwoko liami mwene ngwami, mwoyo wenu. Kanda nuvulama ngwenu, nguli mu zuwo lia ususu. Chawana cha keke chikapwe hamwe ni yenu.