Kuli A-Hepreu
2 Kashika chili chipema kupanjika kanawa ku yuma yize hitunevu, hanga tuhone kupianguka mu jila, chipwe hakehe. 2 Mumu nyi liji lize ahanjikile kupalikila kuli angelo liapwile liamwenemwene, utanguko weswe ni uhulia watambwile upatwilo wa ululi, 3 kuchi mutuhasa kuchina nyi twalengulula ulamwino upwahaha? Mumu kaputukile kuwambujola kupalikila muli Mwene wetu, waze auvwile yaushindakenya kuli yetu, 4 chikwo nawa, Zambi kalichingile no hakuhana uchela kupalikila mu yilayi, yikomokeso ni milimo yeka ni yeka ya ndundo, ni yawana ya spiritu yisandu yize ahanyine kulita ni upale wenyi.
5 Mumu chifuchi tunambe chize muchiza kulutwe kakachihanyine kuli angelo hanga achiyule. 6 Alioze mu chisoneko chimwe, umwe chela yamba ngwenyi: “Mutu iya mba umwiwuluke, hanji mwana wa mutu kuchi apwa mba umufunge? 7 Yenu nwamupalumwishine hakehe kwishi lia angelo; nwamujikile chipangula cha uhenya ni ulemu ni kumusa helu lia yitangiwa ya moko je. 8 Hinunazeyesa yuma yeswe kushi lia yiliato yenyi.” Ha kumusa helu lia yuma yeswe, Zambi kakahichikile chuma nichimwe chize kuchishi kuzeyela kuli iye. Alioze, haliapwila kanda tuchimona chize yuma yeswe yinamuzeyela. 9 Alioze tunamono Yesu, yoze apalumwishine hakehe kwishi lia angelo, haliapwila hamujika chipangula cha uhenya ni ulemu, mumu ha lamba lize amwene ni kufwa, hanga ku chawana cha keke ya Zambi, afwile atu eswe.
10 Mumu te chinalite kuli Zambi ngwo kuli yoze yuma yeswe kuyili kupalikila muli iye, hakuneha ana anji ku uhenya, mumu lia lamba katamba kupwisa mungunu Kaputu wa Ulamwino wo. 11 Mumu chipwe yoze unapwisa musandu ni waze anapwisa asandu, eswe kanakatuka kuli mutu umuwika, mumu lia chino, iye keshi kwivwa sonyi ja kwavuluka ngwenyi, mandumbu, 12 ha kwamba ngwenyi: “Mungwambujola jina lie kuli mandumbu jami ni kukuhalisa ni miaso mukachi ka chikungulwila.” 13 Yamba nawa ngwenyi: “Mungumufuliela.” Cheka nawa: “Talenu! Yami ni twanuke waze Yehova* anguhele.”
14 Kashika, amu “twanuke” ali atu a manyinga ni musunya, iye neye yapwa mutu wa manyinga ni musunya, hanga mumu lia kufwa chenyi, anongese yoze uli ni uhashi wa kuneha kufwa, che kwamba, mwe Ndiapu, 15 ni kutusula waze eswe apwile mu undungo ku mwono wo weswe mumu lia woma wa kufwa. 16 Mumu hi angelo ko iye akukwasa, alioze kakukwasa munyachi wa Apalahama. 17 Kashika iye alipwishile ngwe “mandumbu” jenyi mu yuma yeswe, hanga apwe mwata wa asasendote a lutwe wa keke, washishika mu milimo ya Zambi, hanga ahane chitapo cha kufuka shili ya atu. 18 Amu iye mwene amwene lamba muze apwile ni kumweseka, kashika mahasa kukwasa waze eswe mapalika mu cheseko.