Asonekene Mateu
21 Muze te anakundama ku Yerusaleme, yaheta ku Mbetefweje ku mulundu wa Olevwe, Yesu yatuma tumbaji aali, 2 yaalweza ngwenyi: “Yeenu mu chihunda chize nunamono, munuwana chimbulu wa kukasa hamwe ni mwanenyi. Nwakasulule nwanehe kuli yami. 3 Nyi manuhula kuli umwe mutu, mulwezenu ngwenu: ‘Mwene kanaafupu.’ Mba iye manwecha nwanehe ni kawashi.”
4 Chino chinakalingiwa hanga maliji a profeta amanunuke, anambe ngwo: 5 “Lwezenu mwana-pwo wa Zaione ngwenu: ‘Tala! Mwanangana we kaneza kuli yena, kali chimbovu, kali helu lia chimbulu, ewa, helu lia mwana chimbulu yoze wakumbata yilemu.’”
6 Chocho tumbaji yaya, yalinga yize Yesu aatumine. 7 Yaneha chimbulu ni mwanenyi, yala mahina jo hali ayo, Yesu yatwamaho. 8 Atu anji yala mahina jo mu jila, eka yateta mitango ya mitondo ni kuyala mu jila. 9 Chikwo nawa, mbunga waze te anatetekela kulutwe ni waze te anamukaula, yanunga ni kukololoka ngwo: “Mulamwine, tunaliumbu, Mwana wa Ndawichi! Kawaha yoze uneza mu jina lia Yehova!* Mulamwine, tunaliumbu kuli yenu nwatwama mwilu mwahiana!”
10 Muze iye anjilile mu Yerusaleme, atu eswe mu mbonge yatungumuka ni kwamba ngwo: “Au mwene iya?” 11 Mbunga yanunga ni kukumbulula ngwo: “Au kali profeta Yesu, wa ku Nazare ya Ngalileya!”
12 Yesu yanjila mu tembele, yahuma atu eswe waze apwile ni kulanjisa ni kulanda mu tembele, yanunguna mesa ja akwa-kusumbakenya mbongo ni yitwamo ya akwa-kulanjisa membe. 13 Yamba ngwenyi: “Chinasonewa ngwo: ‘Zuwo liami makalivuluka ngwo zuwo lia kulembela,’ alioze yenu hinwalitenga chiswamo cha eji.” 14 Tupuputa ni yilema yakundama kuli iye mu tembele mba yaauka.
15 Muze asasendote a lutwe ni alongeshi a shimbi amwene yuma ya kukomwesa yize Yesu te analingi, ni ana waze te anakololoka mu tembele ngwo: “Mulamwine, tunaliumbu, Mwana wa Ndawichi!” ayo yevwa uli unji 16 yamulweza ngwo: “Unevu yize ayo anambe?” Yesu yaakumbulula ngwenyi: “Ewa, ngunevuko. Kanda nuchitanga ngwo: ‘Mu kanwa lia twanuke ni ana-kemba hiwatuhwisamo uhaliso’?” 17 Yaahichika, yatuhuka mu mbonge, yaya ku Mbetaniya, yapombelako.
18 Muze te anahiluka mu mbonge chimenemene, Yesu yevwa zala. 19 Yamona mukuyu ku sesa lia jila, yakundamako, alioze kawanyineko nichimwe, shina mafwo wika, Mba yambila mukuyu ngwenyi: “Kanda ukema nawa mihuko ndo ku miaka yeswe.” Hazehene, mukuyu yiuma chau. 20 Muze tumbaji achimwene, yakomoka chinji, yamba ngwo: “Kuchi mukuyu woma chize susumuku?” 21 Yesu yakumbulula ngwenyi: “Pundu ngunambe kuli yenu ngwami: Nyi munupwa ni ufulielo chakuhona kuyambashana, kunuchi kalinga wika yize nalinga ku mukuyu uno, alioze, chipwe munwamba ku mulundu uno ngwenu: ‘Tutuluka, ulimbile mu kalunga-lwiji’ chino muchilingiwa.” 22 Kashika, yuma yeswe munwita mu yilemba, nyi nuli ni ufulielo kumanwahayo.
23 Muze hanjila mu tembele, asasendote a lutwe ni makulwana ja atu, yakundama kuli iye muze te analongesa ni kumuhula ngwo: “Shina uli ni ulite wa kulinga yuma yino? Iya wakuhele ulite wa kulinga yuma yino?” 24 Yesu yamba kuli ayo ngwenyi: “Ni yami nawa mungunuhula chimwe chuma. Nyi munungukumbulula, ni yami mungunwambulwila yoze wanguhele ulite wa kulinga yuma yino: 25 Upapachiso wa Yoano kulihi wakatukile? Mu malilu nyi kuli atu?” Alioze, ayo yaputuka kuhanjika umwe ni mukwo ngwo: “Nyi twamba ngwetu: ‘Wakatukile mu malilu,’ iye mamba ngwenyi: ‘Mba mumu liaka kunwakafulielele muli iye?’ 26 Alioze, nyi twamba ngwetu: ‘Wakatukile kuli atu,’ tunevu woma wa mbunga mumu ayo eswe te kananyingika ngwo Yoano kali Profeta.” 27 Kashika, ayo yakumbulula Yesu ngwo: “Kutwanyingikine.” Mba Yesu neye yamba kuli ayo ngwenyi: “Nyi chocho, ni yami chichi kunulweza ulite uze nakulinga nawo yuma yacho.
28 “Kuchi nunanyongo? Umwe lunga kapwile ni ana jenyi aali. Yaya kuli mutangu, yamulweza ngwenyi: ‘Mwanami, yako ukalakale musono mu munda wa vinyu.’ 29 Mwanenyi yamukumbulula ngwenyi: ‘Ka, chichi kuya, alioze muze halikonyeka, yaya.’ 30 Chocho, yaya nawa kuli mwana wamuchiali, yamulweza chizechene. Yamukumbulula ngwenyi: ‘Ewa tata, munguya,’ alioze kayile. 31 Hali wano aali, iya walingile upale wa tato?” Ayo yamukumbulula ngwo: “Mutangu.” Yesu yamba kuli ayo ngwenyi: “Pundu ngunanulweze ngwami: Akwa-kufwetesa lijimu ni yikoi, kumakalianga kunjila mu Wanangana wa Zambi kuhiana yenu. 32 Mumu Yoano kejile kuli yenu mu jila ya ululi, kunwamufulielele. Alioze akwa-kufwetesa lijimu ni yikoi yamufuliela, chipwe lume muze nwachimwene, nihindu yenu kunwalikonyekene hanga numufuliele.
33 “Ivwenu nawa chishima chikwo: Kwapwile umwe mutu, mwenya-zuwo, yoze watumbile munda wa vinyu, yaujingilika mu chipanga, yafulamo wina wa kukamina vinyu, yatungamo nawa kaposhi musuku; mba yauhana kuli njimi yaya mu wenyi mu chifuchi cheka. 34 Muze mwaka wa kuhela mihuko wahetele, yatuma ndungo jenyi kuli njimi hanga atambule mihuko yenyi. 35 Alioze njimi yakwata ndungo jenyi, yalamba umwe, mukwo yamushiha, mweka yamwasa mawe. 36 Yatuma nawa ndungo akwo anji kuhiana chizavu chitangu, no yaalinga chizechene. 37 Kusulaho, yaatumina mwanenyi, ni kwamba ngwenyi: ‘Amu ali mwanami, mamuvumbika.’ 38 Ha kumona mwana, njimi yalitesa hakachi ko ngwo: ‘Au mwe swana. Tweyenu tumushihe, hanga tusale ni chihinga chenyi!’ 39 Chocho, ayo yamukwata, yamumbila haze lia munda, yamushiha. 40 Kashika, muze mwenya-munda makahiluka, yika makalinga kuli njimi waze?” 41 Yamukumbulula ngwo: “Amu ali atu api makaanongesa, ni kuhana munda wacho kuli njimi eka, waze makamwaha mihuko ha mwaka walita.”
42 Yesu yaamba ngwenyi: “Kanda nuchitanga kama mu Yisoneko ngwo: ‘Liwe lize alitunyine tungi, lienalio hiliapwa liwe litangu lia ha mbango, chuma chino chakatukile kuli Yehova, mba chinapu chikomokeso kumeso jetu’? 43 Kashika, ngunanulweze ngwami: Wanangana wa Zambi makanuchizawo, ni kuuhana ku vungu lize mulima mihuko yawo. 44 Chikwo nawa, mutu yoze maholokela ha liwe lino, kumakamakuka, alioze yoze mulimuholokela, makafwenyoka.
45 Muze asasendote a lutwe ni A-Fwariseu evwile yishima yenyi, yaanyingika ngwo ayo te anambila. 46 Chipwe ngwe yazanga kumukwata, alioze yevwa woma wa mbunga, mumu atu kapwile ni kumumona ngwo, iye kali profeta.