Asonekene Mateu
11 Muze Yesu te hahwisa kuhana usongwelo kuli tumbaji twenyi 12, yakatuka, yaya ni kulongesa ni kwambujola mu mambonge jo.
2 Alioze, Yoano yoze te uli mu zuwo lia ususu, muze hevwa hakutwala ku milimo ya Kristu, yatuma tumbaji twenyi kuli iye 3 hanga amuhule ngwo: “Yena uli Yoze Meza, nyi twatamba kushimbwila mutu mweka?” 4 Yesu yaakumbulula ngwenyi: “Yeenu nulweze Yoano yuma yize nunevu ni yize nunamono: 5 Tupuputa haliapwila kanamono, yitonji kanende, akwa-mbumba kanaapemesa, afwa matwi kanevu, afu kanaahindwisa ni sango jipema kanajambujola kuli yiswale. 6 Kawaha yoze kechi kuwana chitalingiso muli yami.”
7 Muze tumbaji a Yoano te anayi kwo, Yesu yaputuka kulweza mbunga hakutwala kuli Yoano ngwenyi: “Yika nwayanga ni kutala mu puya? Shina lumbungu* unanyiki ni fuji? 8 Mba yika nwayanga ni kutala? Shina mutu yoze unazala mahina alefuna? Waze akuzala mahina alefuna, kakutwama mu mazuwo ja mianangana. 9 Mba mumu liaka nwayangako? Hanga nutale umwe profeta? Ewa, ngunanulweze ngwami iye kanahiane chikolo profeta. 10 Yono mwe asonekene hakutwala kuli iye ngwo: ‘Tala! Mungutuma kanganda kami kulutwe lie, iye mwe makakululiekela jila!’ 11 Pundu ngunanulweze ngwami: Hakachi ka waze akusemuka kuli mapwo, kukwasolokele niumwe unahiana Yoano Chipapachisa, alioze yoze uli mukehe mu Wanangana wa mu malilu mwe unamuhiana. 12 Chize ha matangwa ja Yoano Chipapachisa ndo haliapwila, atu kakusa tachi hanga anjile mu Wanangana wa mu malilu, waze akusa tachi kakuhasa kunjila. 13 Mumu Aprofeta eswe ni Shimbi, yaprofetezele ndo hali Yoano; 14 nyi munuzanga kuchitayiza, iye kali ‘Eliya yoze makeza.’ 15 Yoze uli ni matwi, evwe.
16 Neya mungutesa chisemuko chino? Chinapu ngwe twanuke waze anatwama ha chisalo ni kukololoka kuli masepa jo, 17 ngwo: ‘Yetu twanwimbilanga ndembo, alioze yenu kunwahanganyine; yetu twalinyenganga, alioze yenu kunwevwile yinyengo.’ 18 Chizechene nawa, Yoano kanakeza keshi kulia keshi kunwa, alioze atu kakwamba ngwo: ‘Kali ni ndemoniu.’ 19 Mwana-mutu keza ni kulia ni kunwa, alioze ayo kakumwamba ngwo: ‘Talenu! Lunga au kali chipulutu, mukwa-kunwa vinyu, sepa lia akwa-kufwetesa lijimu ni yivulumunyi.’ Alioze mana kakusoloka zwalala mu yitanga.”
20 Mba Yesu yaputuka kwambila atu a mu mambonge waze iye alingile yikomokeso yinji ya ndundo, alioze kalikonyekene ngwenyi: 21 “Lamba lienu A-Karazene! Lamba lienu A-Mbeteseta! Mumu yikomokeso yize yalingiwile muli yenu, nyi yinakalingiwa mu Teru ni Sendone, kachi atu jamo hanalikonyeka kulu ni kuzala yikeleyi ni kutwama mu uto. 22 Pundu ngunanulweze ngwami: Ha tangwa lia Upatwilo, lamba lienu mulikapwa linji kuhiana lia Teru ni Sendone. 23 Ni yena, Kafwanaume, shina unanyongo ngwe makakuzundula ndo mwilu? Mukapalumuka ndo mu Fuka. Mumu yikomokeso ya ndundo yize nalingile muli yena, nyi nayilingile mu Sondome, kachi Sondome yichiliko ndo musono. 24 Pundu ngunanulweze ngwami: Ha Tangwa lia Upatwilo, lamba lienu mulikapwa linene kuhiana lia Sondome.”
25 Ha shimbu lizeliene Yesu yamba ngwenyi: “Ngunakuhalisa ha mbunga, Tata, Mwenya-malilu ni hashi, mumu hiwaswekela yuma yino akwa-mana ni akwa-malinjekela, alioze wayisolwela ana-kemba. 26 Chochene Tata, mumu walinga yuma kulita ni chize chinakupemena. 27 Tata hanangwehe yuma yeswe. Niumwe unanyingika kanawa Mwana kuhiana Tata wakuhi; niumwe unanyingika kanawa Tata kuhiana Mwana wakuhi, shina wika Mwana ni yoze Mwana anazange kumusolwela. 28 Tweyenu kuli yami, yenu eswe nwakukilikita chikolo ni yenu eswe nunambata yilemu, yami mungunuhwimisa. 29 Zundulenu kanga yami, lilongesenu kuli yami, mumu nguli chihomboloji, mukwa-kulikehesa ni mbunge yeswe, mba kumunuwana uhwimino ku mbunge jenu. 30 Mumu kanga yami yashi ni yiteli yami yilelu.”