Kuli A-Ngalashia
2 Mba kulutwe lia miaka 14, nakandukile cheka ku Yerusaleme hamwe ni Mbarnabe, nayile nawa ni Titu. 2 Nakandukile mumu lia umwe usolwelo, ni kulumbununa kuli mandumbu sango jipema jize nakwambujola hakachi ka akwa-mavungu. Alioze nachilingile ku tenga, kumeso ja malunga akwa-lufuma hanga ngupwe ni shindakenyo ngwami, chazombokele, hanji te chishi kuzomboka mokomoko. 3 Alioze chipwe Titu, yoze wapwile hamwe ni yami kakamushinjilile kupwa ngalami chipwe ngwe kapwile Ka-Ngresia. 4 Chikuma chino chalingiwile mumu lia mandumbu a mahuza waze anjilile mu chikungulwila ngwe ngendeshi, hanga apinjise utuswilo uze tuli nawo muli Kristu Yesu ni kutupwisa ndungo. 5 Yetu kutwazeyelele chipwe ha shimbu* likepe, hanga umwenemwene wa sango jipema ukanunge ni yenu.
6 Alioze, hakutwala kuli atu waze asolokele ngwe alemu—kuli yami o kangulongesele chuma nichimwe chaha, ewa cheswacho apwile kunyima, kuli yami chili chamokomoko—mumu Zambi keshi kupatwila mutu kulita ni chize akusoloka. 7 Mba muze amwene ngwo kanguhele chiteli cha kwambujola sango jipema kuli yilima, ngwe chizechene Petulu alingile kuli ngalami— 8 mumu yoze wahanyine kuli Petulu ndundo ja upostolo hali ngalami, mwe wanguhele nawa ndundo hali akwa-mavungu— 9 mba muze anyingikine hakutwala ku chawana cha keke chize anguhele, Tiangu, ni Sefwa,* ni Yoano waze apwile manguji, olwele kwoko lia chindume kuli yami ni Mbarnabe ngwe chilayi cha kupwa akwa-milimo-ni-akwetu ni kwamba ngwo, muchilita yenu kuya ni kwambujola kuli akwa-mavungu, alioze yetu mutuya ni kwambujola kuli ngalami. 10 Yatwita wika hanga twiwuluke yiswale. Chino chili chuma chize ni yami nakulikolweza chinji hanga ngulinge.
11 Alioze muze Sefwa* ahetele ku Andiakia, nalimikine nenyi meso ni meso, mumu iye kahengesele.* 12 Mumu shimbu malunga amwe a kuli Tiangu te kanda achiheta, iye walile hamwe ni akwa-mavungu, alioze muze o ahetele, wakatukile ni kulihandununa ni atu jacho, se wevwile woma wa akwa-ungalami. 13 A-Yunda akwo no alichingile nenyi mu ulembekese wacho, chipwe lume Mbarnabe neye walichingile mu ulembekese wacho. 14 Muze namwene ngwami o kendele kulita ni umwenemwene wa sango jipema, yingwambila Sefwa* kulutwe lia atu eswe ngwami: “Nyi yena uli Ka-Yunda wakwenda ngwe mukwa-mavungu hi ngwe Ka-Yunda ko, kuchi te wakushinjila akwa-mavungu akende kulita ni ndako ja A-Yunda?”
15 Yetu waze twasemukine ngwe A-Yunda, hi ngwe yivulumunyi a ku mavungu ko, 16 tunanyingika ngwetu, mutu keshi kumupwisa mukwa-ululi ha kukaula shimbi, alioze ha kufuliela wika muli Yesu Kristu. Kashika, hitunafuliela muli Kristu Yesu, hanga akatupwise akwa-ululi kupalikila mu ufulielo wetu muli Kristu, hi ha kukaula shimbi ko. Mumu niumwe kechi kamupwisa mukwa-ululi ha kukaula shimbi. 17 Alioze nyi yetu nawa kakutumona ngwe akwa-shili, muze tunazange hanga atupwise akwa-ululi kupalikila muli Kristu, shina chino chinalumbunuka ngwo Kristu kakukolweza atu hanga alinge shili? Ka, hi chocho ko! 18 Nyi mungutungulula nawa yuma yize napuzwile, mungusoloka ngwe nguli chitanguke. 19 Mumu kupalikila mu shimbi, nafwile mumu lia shimbi, hanga ngutwame ni kulingila Zambi. 20 Hananguhachila ha mutondo hamwe ni Kristu. Hi yami ko nawa nguli ni mwono, alioze Kristu yoze watwama muli yami. Kwamba pundu, mwono uze nguli nawo mu mujimba, nguli nawo kupalikila mu ufulielo muli Mwana wa Zambi, yoze wanguzangile ni kulihana hali yami. 21 Ami chishi kulituna* chawana cha keke ya Zambi, mumu nyi ululi* wakwiza kupalikila mu shimbi, che kwamba Kristu kafwile mokomoko.