Samu
Kuli mukwa-kusongwela; “mwaso wakwimba, Kai wa Chimene.” Mwaso wa Ndawichi.
22 Zambi yami, Zambi yami, mumu liaka wangwehuka?
Mumu liaka usolo kungukwasa?
Mumu liaka unalengulula miteto yami?
2 Zambi yami, mwalwa nakuteta kuli yena, alioze ushi kungukumbulula.
Chipwe ufuku nakuteta kuli yena, chishi kuhwima.
3 Alioze yena uli musandu.
A-Izalele kakukuhalisa.
4 Yisemi jetu te kakujikijila muli yena.
Ayo te kakukujikijila, yena te wakwalamwina.
5 Ayo kapwile ni kuteta kuli yena, yena te wakwalamwina.
Te kakujikijila muli yena, yena te kushi kwakolesa sonyi.
6 Alioze, yami nguli vuno hi mutu ko.
Kakunguchoka ni kungulelesa kuli atu.
7 Atu eswe waze akungumona kakunguseha, kakungulelesa.
Ayo kakuhunga mitwe yo ni kwamba ngwo:
8 “Iye kajikijila muli Yehova, kashika amulamwine.
Amulamwine nyi ngwe kakumuzanga chinji!”
9 Yena mwe wanguchijile mu jimo lia mama,
wangufungile kanawa mu kondo lia mama.
10 Yena mwe wakungufunga chize muze nasemukine.
Chize mu jimo lia mama, yena uli Zambi yami.
11 Kanda upwa kama kusuku ni yami, mumu lamba linakundama.
Kukushi mutu mukwo yoze mangukwasa.
12 Ngombe anji anangujingilika.
Kuji a ngombe a tachi a ku chifuchi cha Mbashane kanangujingilika.
13 Ayo kanazange kungulinga upi.
Kali ngwe ndumba yoze unatete hanga alie yoze akwata.
14 Kakungumwanga ngwe meya.
Yifwaha yami yeswe hiyasengunuka.
Mbunge yami hiyapwa ngwe chishila cha uchi,
hiyasangunuka.
15 Tachi jami hijoma chau ngwe chipalu-palu cha uma.
Limi liami hilialamata ku ushishinyi.
Hiwangwecha ngufwile mu fufuta.
16 Tuwa hangujingilika,
hangujingilika ngwe chizavu cha yingulungulu.
Hangusuma ku moko ni ku molu ngwe ndumba.
17 Munguhasa kwalula yifwaha yami yeswe.
Ayo kakungutala, kakuhulikila meso jo hali yami.
18 Ayo kakulitetela mazalo jami.
Kakuta chela hanga anyingike mazalo waze mutu ni mutu mambata.
19 Yehova, kanda upwa kama kusuku ni yami.
Yena uli tachi jami, tweya kama kawashi hanga ungukwase.
20 Ngulamwine kama ku katana.
Lamwina kama mwono wami kuli tuwa.
21 Ngulamwine kama ku kanwa lia ndumba ni ku mbinga ja kapaji.
Ngukumbulule kama, ngulamwine kama.
22 Mungwambujola jina lie kuli mandumbu jami.
Mungukuhalisa mu chikungulwila.
23 Yenu eswe nwakuvumbika Yehova, muhalisenu.
Munyachi weswe wa Yakomba, umufumanyise.
Munyachi weswe wa Izalele, umulemese.
24 Mumu Zambi kalengulwile chipwe kutenukina chiswale.
Iye kamwombele nyima.
Muze etele ukwaso, iye yamukumbulula.
25 Mungukuhalisa mu chikungulwila.
Mungumanununa yilakenyo yami kumeso ja waze akumuwayila.
26 Atu a mbunge yipema makalia, makakuta.
Waze akufupa Yehova makamuhalisa.
Ayo makawahilila ku miaka yeswe.
27 Atu eswe a hashi makewuluka Yehova ni kuhiluka kuli iye.
Mavungu eswe makamuwayila.
28 Mumu wanangana wambala wa Yehova,
iye kakuyula akwa-mavungu.
29 Atu eswe anene-anene a hano hashi makalia ni kufulamana kumeso jenyi.
Eswe waze akuhiluka ku fufuta makahetama kumeso jenyi.
Niumwe mahasa kulamwina mwono wenyi wakuhi.
30 Minyachi yo muyikamulingila.
Chisemuko chize muchizaho muchikevwa sango hakutwala kuli Yehova.
31 Ayo makeza, makambulula ululi wenyi.
Makalumbununa ku chisemuko chaha yize iye akulinga.