Yishima
25 Yino nawa yili yishima ya Solomone yize asonekene* kuli tuvumbi ja Hezekia mwanangana wa Yunda:
2 Uhenya wa Zambi uli kusweka umwe lusango,
uhenya wa mianangana uli kuhengwola umwe lusango.
3 Ngwe chizechene malilu apwa asuku ni kalunga-lwiji musuku,
chikalu kunyingika mbunge ja mianangana.
4 Chiza majilo ku prata,
mba prata muyipema.
5 Chiza mutu mupi kumeso ja mwanangana,
mba ngunja yenyi muyikakola mu ululi.
6 Kanda ulilemesa kumeso ja mwanangana
chipwe kutwama ha chihela cha atu alemu.
7 Chipema iye kukulweza ngwenyi: “Tweya utwame aha,”
kuhiana iye kukukolesa sonyi kumeso ja atu alemu.
8 Kanda ulipupula kutwala mulonga we ku chota,
mumu nyi mamona ngwo uli ni mulonga, yika muhasa kulinga?
9 Nyi uli ni umwe mulonga ni mukwenu, usopenu mukachi kenu.
Kanda wambulula sango ja akwenu jize kuwatambile kwambulula.
10 Mumu nyi wamwanga sango ja akwenu,
makunyingika ngwe mutu yoze wakumwanga sango jambala, chino muchipihisa lufuma we ku mwono we weswe.
11 Ngwe muhuko* wa oru mu chikwachilo cha prata,
liji liakuhanjika ha shimbu lialita chenacho liapwa.
12 Yimbilingwa* ya oru ni yingeliengelie ya oru yikwete ulemu unji,
chizechene nawa, kukumika cha mukwa-mana chikwete ulemu unji kuli yoze mamupanjika.
13 Ngwe kukekema cha neve ha mashimbu a kucha,
chenacho apwa kanganda washishika kuli waze akumutuma.
Mumu iye kakuhuzulula mbunge ya mwene wenyi.
14 Ngwe malelwa ni fuji yize kuyanokesene vula,
chenacho apwa mutu yoze wakulisambula ha chawana chize kanda achichihana kama.
15 Mutu yoze ukwete uhomboloji mahasa kuzeyesa mbunge ya umwe mwata,
limi lipema mulihasa kumakuna chifwaha.
16 Nyi wawana uchi liako ndambu,
mumu nyi wa ulia unji mukausaza.
17 Kanda uya mashimbu eswe ku zuwo maha mukwenu
hanga iye achine kukusekesa ni kukuvila kole.
18 Ngwe mweto* wa jita, mukwale hanji mwivi wasongoloka
chenacho apwa mutu yoze wakuhana uchela wa mahuza hakutwala kuli mukwo.
19 Kujikijila mutu yoze katelele ha tangwa lia lamba,
chili ngwe kunjakwina ku lizo lize liapaluka ni kwendela ku kulu lia ulema.
20 Ngwe mutu yoze wakuchiza mazalo ha tangwa lia chishika,
ngwe vinyu yapangaminya ya kusa mukele,
chenacho apwa mutu yoze wa kwimbila miaso mutu unanenganyana.
21 Nyi mukwa-kole ye kanevu zala, mwehe kulia hanga alie,
nyi kali ni pwila, mwehe meya anwe.
22 Mumu nyi wachilinga mukalumbika makala a kahia ha mutwe wenyi,
Yehova makakufweta.
23 Fuji ya ku sango, yakuneha vula,
limi lize lia kumwanga sango ja mahuza liakuvisa atu uli.
24 Shinaho kutwama mu mbalanda,
kuhiana kutwama ku zuwo limuwika ni pwo yoze wakuzanga kuzwela.
25 Sango jipema jize jinakatuka ku chihela chisuku,
jili ngwe meya akekema kuli mutu yoze unahongo.
26 Mukwa-ululi yoze wakutayiza manyonga a mutu mupi kali ngwe shima lia meya lize lili ni malowa,
ngwe shima lia meya lize linavunduka.
27 Hi chipema ko kulia uchi unji,
chikwo nawa hi chipema ko kulilemesa yena mwene.
28 Mutu yoze keshi kulihumikiza kali ngwe mbonge ya kupupa,
kuyishi yipanga.