Mukanda Utangu wa Petulu
4 Amu Yesu amwene lamba ku musunya, ni yenu nawa nyongenu ngwe iye, mumu mutu yoze wakumona lamba ku musunya hanalitwamina kulinga shili, 2 hanga matangwa waze amusala kutwama ni mwono hano hashi, kanda alinga nawa upale wa atu, alioze alinge upale wa Zambi. 3 Mumu mashimbu waze nwapwile ni kulinga upale wa akwa-mavungu hanahu, muze nwapwile ni kulinga yitanga ya sonyi, ni usolo upi, kuzengewa, kulinga yiwanyino yipi, kunwa walwa unji, ni kukombelela mahamba.* 4 Ayo kakukomoka mumu kunushi kulinga no nawa yitanga ya sonyi, kashika akunwamba yuma yipi. 5 Alioze atu wano makaasopesa kuli yoze halilulieka hanga asopese a mwono ni afu. 6 Kashika, sango jipema hanajambujola nawa kuli afu, hanga chipwe hanaasopesa ku musunya kulita ni nyonga lia atu, apwe ni mwono ku spiritu kulita ni nyonga lia Zambi.
7 Alioze songo lia yuma yeswe linakundama. Kashika, pwenu ni mana, laulenu hakutwala ku yilemba.* 8 Kuhiana yuma yeswe, lizangenu chinji umwe ni mukwo, mumu zango liakufuka shili yinji. 9 Lizumbulenu umwe ni mukwo chakuhona kulinyenyeta. 10 Kulita ni chawana chize mutu ni mutu hatambula, mutu mweswe alingile akwo ni chawana chacho, ngwe mukwa-mulimo* mupema wa chawana cha keke ya Zambi, chize akusolola mu milali yinji. 11 Nyi mutu mahanjika, achilinge ngwe mutu yoze unahanjika maliji a kuli Zambi; nyi mutu kanalingila akwo, achilinge ni kujikijila ha tachi jize Zambi a kuhana; hanga Zambi amuhalise mu yuma yeswe kupalikila muli Yesu Kristu. Uhenya ni ndundo ni yenyi ndo ku miaka ya mutolo. Amene.
12 Akwetu a zango, kanda nukomoka ha yeseko yikalu yize nunapalika, ngwe chuma chize chinalingiwa hali yenu kunwachinyingikine. 13 Alioze, nungenu ni kuwahilila muze nunapalika mu lamba lize Kristu apalikile hanga ni yenu nukawahilile ni kuzala too ni uwahililo ha tangwa lize uhenya wenyi muusoloka. 14 Nyi manuchoka* mumu lia jina lia Kristu, kunwawaha, mumu spiritu ya uhenya, ewa, spiritu ya Zambi, yili hali yenu.
15 Kashika, niumwe wa kuli yenu kanda amona lamba mumu lia kupwa mukwa-kushiha atu, mwiji, mukwa-kulinga yuma yipi hanji mutu yoze wakulinjisa mu yuma ya mbala. 16 Alioze, nyi umwe mutu mamona lamba mumu lia kupwa Mukwa-Kristu, kanda evwa sonyi, alioze anunge ni kuhalisa Zambi ha kumbata jina lino. 17 Mumu wano kali mashimbu waze atesele hanga usopeso uputuke mu zuwo lia Zambi. Nyi muuputuka hali yetu, mba yika mutwamba hali waze keshi kwononokena sango jipema ja Zambi? 18 “Nyi mukwa-ululi kanamulamwina ni kapinda, mba yika mutwamba hali mutu mupi ni hali chivulumunyi?” 19 Kashika, waze anamono lamba ha kulinga upale wa Zambi, alikunjike mu moko ja Sakatanga washishika muze ananungu ni kulinga upeme.