Mukanda Utangu wa A-Korindu

4 Atu katamba kutumona ngwe tuvumbi twa Kristu ni tuselo twa yijimbikilo yisandu ya Zambi. 2 Chuma chize anashimbwila kuli tuselo, chili ushishiko wo. 3 Kuli yami, hi chilemu ko nyi yenu hanji chota cha usopelo cha atu mangupatwila. Mumu kwamba pundu, chipwe yami mwene chahashile kulipatwila. 4 Mumu chanyingikine chuma nichimwe cha kulihisa nacho. Alioze chino kuchasolwele ngwo, nguli mukwa-ululi; yoze wakunguhengwola kali Yehova.* 5 Kashika kanda nupatwila chuma nichimwe shimbu tangwa kanda liheta, ndo muze Mwene makeza. Iye makachiza yuma yahengama ku milima hanga ayinehe ku pangu ni kusolola manyonga a mu mbunge, mba Zambi makachichimieka mutu ni mutu.

6 Mandumbu, hingunanusonekena ha kuhanjika hali yami mwene ni hali Apolu mumu ha upeme wenu, hanga kupalikila mu chilweza chetu, nwende kulita ni maliji wano anambe ngwo: “Kanda nulinga nichimwe chuma kuhiana yize yinasonewa,” mumu nyi nwachilinga, kunuchi kalizata chipwe kulimika umwe ni mukwo. 7 Kulipwila chino, iya wakuhelecho? Chuma chika uli nacho chize kuwachitambwile? Nyi chenacho, kuchi mba wakulisamba ha chize uli nacho ngwe kuwachitambwile?

8 Shina hinunayuku kulu nyi? Hinunapu kulu pichi nyi? Kutala, hinwaputuka kuyula chakuhona yetu nyi? Ewa, ami te ngunazange nuputuke kuyula hanga ni yetu nawa tukayule hamwe ni yenu. 9 Mumu ngunamono ngwami, yetu apostolo, Zambi hanatuse eswe ngwe chizavu cha kasula chize hanachihisa ku kufwa, mumu tunapu chitala kuli akwa-hashi, ni kuli angelo, ni kuli atu. 10 Yetu tuli yihepuke mumu hali Kristu, alioze yenu kunwakanyama muli Kristu; yetu tuli alelu, alioze yenu kunwatakama; yetu kakutulelesa, alioze yenu kakunulemesa. 11 Chipwe ndo haliapwila twakwivwa zala ni pwila, tuli ni uvu,* kakutumbufula,* kutushi zuwo, 12 twakukilikita ni kulinga milimo ni moko jetu. Muze akututuka, yetu twakwawahisa; muze akutuhungumiona, yetu twakulihumikiza; 13 muze akutuliongelela yuma ya saki, yetu twakukumbulula kanawa;* hitunapu ngwe yiswaswa ya hano hashi, yuma yamokomoko ndo haliapwila.

14 Ngunanusonekena yuma yino, hi mukunukolesa sonyi ko, alioze mukunukanyamisa ngwe ana jami waze nakuzanga. 15 Mumu chipwe ngwe nuli ni 10,000 twa ndeji* muli Kristu, nihindu kunushi ni a tata anji; mumu yami nalipwishile tatenu muli Kristu Yesu kupalikila mu sango jipema. 16 Mba ngunaliumbu kuli yenu ngwami, pwenu akwa-kungwimbulula. 17 Kashika ngunanutumina Timoteu yoze wapwa mwanami wa zango, kanda mukwa-kushishika muli Mwene. Iye makanwiwulula majila jami aze ali muli Kristu Yesu, chizechene ngwe nakulongesa kweswe ni mu yikungulwila yeswe.

18 Amwe hakachi kenu nunalifuzu ngwe chichi kwiza ni kunumeneka. 19 Alioze nyi Yehova* mapala, mungwiza ni kunumeneka ni kawashi, mba mungukanyingika, hi wika ko maliji ja akwa-kulifuza, alioze ni tachi jo. 20 Mumu Wanangana wa Zambi kuwatalile ha maliji wika, alioze ha ndundo. 21 Yika nunazange? Shina ngukeze ni kunumeneka ni mbwechi, nyi ni zango hanji ni spiritu ya kushimbika?