Usolwelo wa Yesu Kristu Alwezele Kuli Yoano
2 “Kuli mungelo wa chikungulwila mu Efwesu, soneka ngwe: Yino yuma anambe yoze unakwata tutongonoshi shimbiali mu kwoko lienyi lia chindume yoze wakwenda mukachi ka yikwachilo shimbiali ya ndeya ya oru ngwenyi: 2 ‘Ngunanyingika yitanga ye ni kukilikita che, ni kunyongonona che, ngunanyingika ngwami kushi kutayiza atu api, hiuneseka waze akuliamba ngwo kali apostolo alioze hi apostolo ko, hiunamono ngwe kali akwa-mahuza. 3 Wakulihumikiza ni kunyongonona mu yuma yinji mumu ha jina liami, alioze kuwahongele. 4 Chipwe chocho, upi ngunamono muli yena uli uno: Hiunehuka zango lize wapwile nalio ku uputukilo.
5 “‘Kashika nyonga ha chize hiunalimbuka, likonyeke ni kulinga yitanga yize wapwile ni kulinga ku uputukilo. Nyi ka, mungwiza kuli yena, munguchiza chikwachilo che cha ndeya ku chihela chacho, shina ndo mulikonyeka. 6 Alioze chuma chize nakuzanga hali yena chili chino: Wakuvwila lwaji yuma yize chizavu chize avuluka ngwo A-Nikoleta akulinga, yize ni yami nakuvwila lwaji. 7 Yoze uli ni matwi, apanjike yize spiritu yinambe ku yikungulwila: Mweswe makumba mungumutayiza kulia ku mutondo wa mwono, uze uli mu paraisu ya Zambi.’
8 “Kuli mungelo wa chikungulwila mu Semina, soneka ngwe: Yino yuma anambe ‘Mutangu ni Kasula-songo’ yoze wafwile mba yahinduka ngwenyi: 9 ‘Ngunanyingika luyinda we ni uswale we—alioze yena uli pichi—ngunanyingika nawa kushililika cha waze akuliamba ngwo, kali A-Yunda alioze hi A-Yunda ko, o kapwa sunangonga ya Satana. 10 Kanda wivwa woma wa lamba lize kwasala hakehe hanga umone. Ndiapu manunga ni kusa amwe a kuli yenu mu mazuwo a ususu hanga akanweseke, kumunukapwa ni luyinda ha matangwa kumi. Alioze pwako mukwa-kushishika ndo ku kufwa, mba mungukakwaha chipangula cha mwono. 11 Yoze uli ni matwi, apanjike yize spiritu yinambe ku yikungulwila: Mweswe makumba, kufwa chamuchiali kuchichi kamulinga upi niumwe.’
12 “Kuli mungelo wa chikungulwila mu Perekamu soneka ngwe: Yino yuma anambe yoze uli ni mukwale usuku wambuka wa lutwilo mwaali ngwenyi: 13 ‘Ngunanyingika kuze watwama, kuze kuli ngunja ya Satana; nihindu wakununga ni kulalaminya ku jina liami, kuwalikalile ufulielo we hali yami, chipwe ha matangwa ja Andipa chela chami washishika, yoze ashihile hakachi kenu kuze kwatwama Satana.
14 “‘Chipwe chocho, yuma yimwe yipi ngunamono muli yena yili yino: Mukachi ke muli waze akukaula malongeso a Mbalau, yoze walongesele Mbalake kusela ana a Izalele chitalingiso hanga alie yuma ya kulambula ku mahamba ni kulinga utanji.* 15 Uli nawa ni amwe waze akukaula malongeso a chimwe chizavu avuluka ngwo, A-Nikoleta. 16 Kashika likonyeke. Nyi ka, mungukeza kuli yena ni kawashi, mungukasa no jita ni mukwale usuku wa mu kanwa liami.
17 “‘Yoze uli ni matwi, apanjike yize spiritu yinambe ku yikungulwila: Mweswe makumba, mungukamwaha mana akuhengama, mungumwaha liwe likehe litoma, ha liwe liacho hanasonewa limwe jina liaha lize niumwe kalinyingikine, shina wika yoze malitambula.’
18 “Kuli mungelo wa chikungulwila mu Tayatera soneka ngwe: Yino yuma anambe mwe Mwana wa Zambi, yoze ukwete meso ngwe mulengi wa kahia, ni yiliato yenyi yalifwa ngwe unengu walejima ngwenyi: 19 ‘Ngunanyingika yitanga ye, ni zango lie, ni ufulielo we, ni mulimo we usandu ni kunyongonona che, ngunanyingika nawa ngwami yitanga ye ya haliapwila yili yinji kuhiana ya kunyima.
20 “‘Chipwe chocho, upi ngunamono muli yena uli uno: Wakutayiza Jezebele pwo yoze wakuliamba ngwenyi kali profeta wa pwo, kakulongesa, kakupiangula ndungo jami akalinge utanji* ni kulia yuma yize akulambula ngwe yitapo ku mahamba. 21 Namuhele mashimbu hanga alikonyeke, alioze iye kazangile kulikonyeka ku utanji* wenyi. 22 Kashika, kwasala hakehe mungumumbila ha muhela ni yikola haze kechi kuhasa kukatuka, ni waze akulinga nenyi upangala mungwambila mu luyinda munene ndo shina malikonyeka ha yitanga yenyi. 23 Mungukashiha ana jenyi ni chilungo, yikungulwila yeswe kumuyikanyingika ngwo, yami nguli mukwa-kuhengwola manyonga* ni mbunge, mba mungukafwetesa mutu mweswe kulita ni yitanga yenyi.
24 “‘Alioze, yenu eswe waze nuli mu Tayatera, eswe waze kunwatayijile malongeso a Jezebele ni eswe waze kanyingikine “malongeso a mahuza* waze akukatuka kuli Satana,” kuli wano ngunambe ngwami: Chichi kunutwika chilemu chikwo nichimwe. 25 Kashika, lalaminyenu ha yize nuli nayo ndo muze mungwiza. 26 Mba yoze makumba ni kufunga majila jami ndo ku songo, mungukamwaha chiyulo hali mavungu, 27 iye makaayula ni lukanda wa utale, makaapalula ngwe chizechene akupalula milondo ya uma, ngwe chizechene natambwile chiyulo kuli Tata. 28 Mungukamwaha katongonoshi wa chimene. 29 Yoze uli ni matwi, apanjike yize spiritu yinambe ku yikungulwila.’