Asonekene Luka
21 Muze Yesu hahetula meso, yamona pichi kanase mbongo mu mishete ya milambu. 2 Yamona nawa umwe tuliwa wa pwo chiswale kanasemo tumbongo twali twa ndando yikehe,* 3 yamba ngwenyi: “Pundu ngunanulweze ngwami, tuliwa yono chiswale kasa mbongo jinji mu mishete ya milambu kuhiana ayo eswe. 4 Mumu akwo eswe kasa yawana* yize yasalile ha kulumbama cha upite wo, alioze iye ha uswale wenyi kasa yuma yeswe yize apwile nayo, yize te malikwasa nayo ku mwono wenyi.”
5 Ha shimbu limwe, muze atu te anahanjika hakutwala ku tembele, ni chize ayitungile ni mawe apema ni milambu yize atu akuhana kuli Zambi, 6 iye yamba ngwenyi: “Hakutwala ku yuma yino nunamono, matangwa kumakeza waze liwe kulichi kasala helu lia liwe ni likwo lize kechi kapuzula.” 7 Yamuhula ngwo: “Longeshi, shimbu lika yuma yino muyikalingiwa? Chikwo nawa, chilayi chika muchikasolola ngwo kwasala hakehe yuma yino yilingiwe?” 8 Iye yaakumbulula ngwenyi: “Kanyamenu hanga achine kunupiangula, mumu anji makeza mu jina liami ni kwamba ngwo: ‘Yami nguli Kristu,’ chipwe ngwo: ‘Shimbu atesele hiliakundama.’ Kanda nwakaula. 9 Chikwo nawa, muze munwivwa zungo lia jita ni sango ja jita, kanda nwivwa woma. Mumu yuma yino chitangu yatamba kulingiwa, alioze songo kulichi kaheta hazehene.”
10 Mba iye yaalweza ngwenyi: “Vungu limwe mulikasa jita ni vungu likwo, wanangana umwe muukalimika ni wanangana ukwo. 11 Mukukapwa minyiko yinene-yinene ku yihela yeka ni yeka, zala ni yikola, atu nawa makamona yuma yakwivwisa woma ni yilayi yinene ya mwilu.
12 “Alioze, shimbu yino yuma kanda yichilingiwa, yenu kumakanusa mu mazuwo ja ususu ni kunuhungumiona, kumakanukunjika mu masunangonga ni mu mazuwo a ususu, makanutwala kumeso ja mianangana ni manguvulu mumu lia jina liami. 13 Yino muyikanwaha uhashi wa kwaha uchela. 14 Kashika, kanda nulipikala mu mambunge jenu ha yize munukamba hanga nukalikalile, 15 mumu yami mungukanwaha maliji ni mana, waze niumwe wa kuli akwa-kole jenu mahasa kuhamika hanji kulituna. 16 Chikwo nawa, chipwe lume yisemi jenu, ayayenu ni anakwenu, asoko jenu ni masepa jenu makanukunjika, ayo nawa makashiha amwe a kuli yenu, 17 yenu kumakanuvwila kole kuli atu eswe mumu lia jina liami. 18 Alioze chipwe lukambu umuwika wa ku mutwe wenu kechi katoka. 19 Nyi nwanyongonona munukalamwina miono yenu.
20 “Kashika, muze munukamona Yerusaleme hayijingilika ni yilombo ya maswalale, nyingikenu ngwenu, kwasala hakehe ayinongese. 21 Hohene, waze mapwa mu Yundeya akachinyine ku milundu, waze ali mukachi atuhuke ni waze ali ku minda kanda anjilamo, 22 mumu matangwa jacho makapwa akupatwila ni ululi hanga yuma yize hanasoneka yimanunuke. 23 Lamba kuli tufumba ni kuli amama waze mamwisa ana ha matangwa waze, mumu mukukapwa lamba linene mu chifuchi chino ni ufwatulo hali atu wano. 24 Ayo makaashiha ni mukwale ni kwambata mu ufunge ku mavungu eswe, Yerusaleme makayiliata kuli akwa-mavungu ndo matangwa waze hanatese ja akwa-mavungu mamanunuka.
25 “Chikwo nawa, mukukapwa yilayi ha tangwa, ni ha kakweji ni ha tutongonoshi, hano hashi atu makapinda, kechi kamona yize malinga mumu lia lundunjila wa kalunga-lwiji ni mikanya yenyi. 26 Atu kumakalezumioka ni woma ha kushimbwila yuma yize muyikeza hashi heswe, mumu ndundo ja mwilu mujikanyika. 27 Hohene, makamona mwe Mwana-mutu kaneza mu malelwa ni ndundo ni uhenya unene. 28 Alioze, muze yuma yino muyiputuka kulingiwa, katukenu numane, hetulenu meso nutale kwilu, mumu ulamwino wenu hiwakundama.”
29 Mba Yesu yaatela chimwe chishima ngwenyi: “Talenu ku mukuyu ni ku mitondo yikwo yeswe. 30 Muze yakuputuka kusokoloka, yenu nwakuyitala ni kwamba ngwenu lwiza hapwa hakamwihi. 31 Chizechene nawa, muze munumona yuma yino muyilingiwa, nyingikenu ngwenu Wanangana wa Zambi hiwakundama. 32 Ngunanulweze pundu ngwami, chisemuko chino kuchichi kahwa, ndo muze yuma yino yeswe muyikalingiwa. 33 Lilu ni hashi muyipalika, alioze maliji jami kechi kapalika nilimwe tangwa.
34 “Kanyamenu hanga mbunge jenu jihone kulema mumu lia kulialia, kunwanwa ni yipikalo ya ku mwono, kuchina tangwa liacho mulinuwana susumuku 35 ngwe muheto. Mumu mulikeza hali waze eswe atwama hano hashi. 36 Kashika, nungenu ni kulawola, ni kulemba mashimbu eswe hanga nuhase kulilamwina ha yuma yeswe muyikalingiwa ni kumana kwe kumeso ja Mwana-mutu.”
37 Mwalwa, Yesu te kakulongesa mu tembele, alioze ha ufuku te kakuya ni kupomba ku mulundu avuluka ngwo Olivwe. 38 Atu eswe kapwile ni kuya kuli iye chimene-mene hanga amupanjike mu tembele.