Asonekene Mateu
6 “Nwatamba kukeya nuhone kulinga ululi hanga anumone kuli atu, nyi nwachilinga kunuchi katambula yiwape kuli Tatenu wa mu malilu. 2 Kashika, nyi muhana chimwe chuma kuli chiswale, kanda ulisambula ngwe chize akulinga yilembekese mu masunangonga ni mu matapalo hanga aafumanyise kuli atu. Pundu ngunanulweze ngwami: Ayo hanatambula fweto yo. 3 Alioze muze muhana chimwe chuma kuli chiswale, kanda wecha kwoko lie lia chimeso linyingike yize kwoko lie lia chindume lialinga, 4 hanga kuhana che chikapwe ku tenga. Mba Tatenu yoze wakumona ku tenga makukundulula.
5 Muze munulemba, kanda nupwa ngwe yilembekese, mumu ayo kakuzanga kulemba umanyina mu masunangonga ni ha makano ja matapalo, hanga aamone kuli atu. Pundu ngunanulweze ngwami: Ayo hanatambula fweto yo. 6 Alioze, yena muze mulemba, njila mu chipatulo cha zuwo lie, muze hiwajila chikolo, lemba kuli Tatenu. Mba Tatenu yoze wakumona ku tenga, makukundulula. 7 Muze mulemba, kanda ufunyina maliji waze ene, ngwe chize akulinga akwa-mavungu, mumu ayo kakunyonga ngwo, maapanjika nyi mahanjika yuma yinji. 8 Kanda nupwa ngwe ayo, mumu Tatenu kananyingika yize nunafupu, shimbu kanda nuchimwitayo.
9 “Kashika lembenu ngwenu:
“‘Tata yetu nuli mu malilu, jina lienu lipwe lisandu. 10 Wanangana wenu wize. Upale wenu ulingiwe hano hashi, ngwe chizechene unalingiwa mu malilu. 11 Twehenu kama kulia* cha ha tangwa lino, 12 nutukonekene kama shili yetu, ngwe chizechene twakukonekena waze akuvulumuna kuli yetu. 13 Kanda nututwala kama mu cheseko, alioze tulamwinenu kuli mwe mupi.’
14 “Mumu nyi munukonekena atu tupalia two, Tatenu wa mu malilu neye kumakakonekena milonga yenu, 15 alioze nyi kunwakonekenene akwenu tupalia two, Tatenu wa mu malilu kechi kakonekena milonga yenu.
16 Yenu muze munulitwamina kulia hanga nulingile Zambi, kanda nusoloka ngwe nunanenganyana ngwe chize akulinga yilembekese, mumu ayo kakwalumuna ku meso hanga atu aamone ngwo kanalitwamina kulia. Ngunanulweze pundu ngwami: Ayo hanatambula fweto yo. 17 Alioze yena muze mulitwamina kulia hanga ulingile Zambi, lizujile maji ku mutwe, ni kusana ku meso, 18 hanga atu achine kumona ngwo unalitwamina kulia, alioze akumone wika kuli Tatenu. Mba Tatenu yoze wakumona ku tenga, makakukundulula.
19 “Kanda nutulikila upite hano hashi, haze yiswa ni ngengeya mahasa kuupihisa, haze eji mahasa kupupa zuwo ni kuwiya. 20 Alioze tulikilenu upite wenu mwilu, muze yiswa ni ngengeya kechi kuhasa kuupihisa, muze eji kechi kuhasa kupupa ni kuwiya. 21 Mumu kweswako mukupwa upite we, kwenako nawa mukupwa mbunge ye.
22 “Ndeya ya mujimba, liso. Nyi liso lie mulimona kanawa, mujimba we weswe muupanguka. 23 Alioze nyi liso lie lipi, ni mujimba we muupwa upi. Nyi chamwenemwene kuushi ni pangu, uli mu milima yinji!
24 “Niumwe mahasa kupwa ndungo wa miata aali wakuhi; mumu hanji mahasa kuvwila kole umwe ni kuzanga mukwo, hanji mahasa kulelesa umwe ni kulalaminya mukwo. Yenu kunuchi kuhasa kupwa ndungo ja Zambi ni ja Upite.
25 “Kashika ngunanulweze ngwami: Litwaminenu kulipikala chinji ni mwono wenu, ha yize munulia, hanji yize mununwa ni ha mujimba wenu, ha yize munuzala. Shina mwono kuwahianyine kulia nyi? Shina mujimba kuwahianyine mazalo nyi? 26 Talenu kanawa tujila a mwilu; keshi kutumba chipwe kuhela, hanji kukunga mu machila, alioze Tatenu wa mu malilu kakwalisa. Shina yenu kunwahianyine chinji tujila nyi? 27 Iya wa kuli yenu, ha kulipikala chinji, mahasa kuwezela matangwa ku mwono wenyi? 28 Chikwo nawa, mumu liaka nwakulipikala ha mazalo? Lilongesenu ha chize yitemo ya mu yambu yakukola; kuyishi kukalakala, chipwe kulinukina mazalo. 29 Alioze ngunanulweze pundu ngwami, chipwe mwe Solomone mu uhenya wenyi weswe, kakazalile ngwe chimwe cha ku yitemo yino. 30 Mba nyi chenacho Zambi akujika mwambu wa mu yambu, uze wakusoka musono hamene maumbila mu jiko, shina kechi kunujika, yenu akwa-ufulielo ukehe? 31 Kashika kanda nulipikala ni kwamba ngwenu: ‘Yika mutulia?’ hanji: ‘Yika mutunwa?’ hanji: ‘Yika mutuzala?’ 32 Mumu yuma yino yeswe, ye akwa-mavungu akufupa-fupa chinji. Alioze Tatenu wa mu malilu kananyingika ngwenyi nunahono yuma yino yeswe.
33 “Kashika, nungenu ni kufupa chitangu Wanangana wa Zambi ni ululi* wenyi, mba yuma yikwo yeswe kumakanuwezelayo. 34 Kashika, kanda nulipikala ni tangwa lia hamene, mumu tangwa lia hamene ni yipikalo yalio. Tangwa ni tangwa likwete yipikalo yalio.