Mukanda wa Tiangu
3 Mandumbu jami, mukachi kenu kanda mupwa alongeshi anji, mumu nunanyingika ngwenu, yetu mutukatambula upatwilo ukalu chinji. 2 Mumu yetu eswe twakulinga tupalia yisuho yinji. Nyi mutu keshi kulinga tupalia ha kuhanjika, kali mungunu, mahasa nawa kusongwela mujimba wenyi weswe. 3 Nyi twakusa chikungo ku makanwa ja tuvwalu hanga atwononokene, twakuhasa kusongwela nawa mijimba yo yeswe. 4 Talenu nawa maulungu: Chipwe ngwe kali anene-anene, fuji ya tachi yakwahungumuna, nihindu kaakwendesa ni munanga* ukehe, ni kwatwala kweswako tahwili anazange.
5 Chizechene nawa, limi liapwa ka chihanda kakehe ka mujimba, alioze, liakulisamba yuma yinene-yinene. Talenu chize kahia kakehe mukahasa kwocha kuna* linene! 6 Limi nelio lili kahia. Ku yihanda yetu ya mujimba, limi lie linazala ni uhenge, mumu liakupihisa mujimba weswe, liakuchocheka kahia ku mwono weswe wa mutu. Kahia kalio kakukatuka mu Ngehena.* 7 Mumu milali yeswe ya tushitu a mu yambu, tujila, tushitu a kukalala hashi ni tushitu a mu kalunga-lwiji mahasa kwayula, kwamba pundu kakwayula lume kuli atu. 8 Alioze, mutu niumwe kechi kuhasa kusongwela* limi. Kulishi vumbi, liapwa lipi, linazale too ni ulembe uze wakuneha kufwa. 9 Limi lioliene, twakuhalisa nalio Tata Yehova,* limi lioliene, twakushinga nalio nawa atu waze atangile mu “chifwa cha Zambi.” 10 Mu kanwa limuwika mwakutuhuka yiwape ni mashingo.
Mandumbu jami, yuma kuyatambile kupwa chocho. 11 Shina shima* limuwika lia meya mulihasa kutuhwisa meya ayema ni meya asasu? 12 Mandumbu jami, shina mukuyu muuhasa kwima olevwe, hanji mutondo wa vinyu muuhasa kwima makuyu nyi? Chizechene nawa, shima lia meya a mungwa kulishi kutuhwisa meya ayema.
13 Iya yoze ukwete mana ni malinjekela mukachi kenu? Ayisolole mu yitanga yenyi yipema, ha kulinga yuma ni kulikehesa cheswe chize chakwiza ku mana. 14 Alioze, nyi nuli ni ukwa usasu mu mambunge jenu ni kulimanangana, kanda nulisamba, kanda nuhanjika mahuza a kulimika ni umwenemwene. 15 Wano hi mana a kukatuka kwilu ko; kali a hano hashi, a atu waze akwenda kulita ni musunya, a andemoniu. 16 Mumu kuze kuli ukwa ni kulimanangana, kwenako kuli nawa vunda ni yuma yipi ya mutapu weswe.
17 Alioze, mana a kwilu chitangu kapwa atoma, a sambukila, ashi, kakwononoka ni kawashi, a too ni keke ni mihuko yipema, keshi katonde, keshi ulembekese. 18 Chikwo nawa, muhuko wa ululi kakuukuwa mu sambukila kuli waze akuneha sambukila.