Mukanda Utangu Kuli A-Tesalonika

5 Haliapwila mandumbu, hakutwala ku tungonde ni miaka, kuchafupiwile kunusonekena nawa. 2 Mumu nunanyingika kanawa ngwenu, tangwa lia Yehova* kumulikeza ngwe chize mwiji akwiza ha ufuku. 3 Muze makamba ngwo: “Sambukila ni kutwama kawape!” susumuku kwonwona muchiza hali ayo, ngwe chize musongo wakwiza hali pwo kafumba, mba kechi kahasa kuchina. 4 Alioze mandumbu, yenu kunushi mu milima mba tangwa liacho likeze hali yenu, ngwe chize pangu liakwiza susumuku hali mwiji, 5 mumu yenu eswe nuli ana a pangu, ana a mwalwa. Yetu kutushi akwa-ufuku chipwe akwa-milima.

6 Kashika, kanda tupomba ngwe chize akulinga anji, alioze tulawolenu ni kununga ni kunyonga kanawa. 7 Mumu waze akupomba, kakupomba ufuku, ni waze akuzengewa, kakuzengewa ufuku. 8 Alioze hakutwala kuli yetu tuli akwa-mwalwa, tunungenu ni kunyonga kanawa, ni kuzala chipwiko cha ufulielo ni cha zango, ni kuzala kutalatala cha ulamwino ngwe tepa. 9 Mumu Zambi kakatusakwile hanga tumone lamba ku utenu, alioze hanga tupwe ni ulamwino kupalikila muli Mwene wetu Yesu Kristu. 10 Iye watufwilile hanga chipwe tunalaula, chipwe tuli mu tulo,* tukatwame ni mwono hamwe nenyi. 11 Kashika, nungenu ni kulikolweza ni kulitakamisa* umwe ni mukwo, ngwe chize nwakulinga kulu.

12 Haliapwila tunaliumbu mandumbu, hanga nuvumbike waze akukilikita mukachi kenu ni kunusongwela muli Mwene ni kunuyula. 13 Alemesenu chinji mu zango mumu lia milimo yo. Pwenu ni sambukila umwe kuli mukwo. 14 Chikwo nawa tunanutoweza mandumbu, hanga nukanyamise yilumbuke, nutakamise waze anahongo* ku mbunge, nukwase waze analele ni kupwa yihomboloji ni eswe. 15 Kanyamenu hanga nuchine kufwetesa yipi ha yipi kuli mutu niumwe, alioze nungenu mashimbu eswe ni kulinga yuma yipema umwe kuli mukwo ni kuli eswe.

16 Wahililenu mashimbu eswe. 17 Lembenu mashimbu eswe. 18 Sakwililenu ha yuma yeswe. Uno we upale wa Zambi hali yenu muli Kristu Yesu. 19 Kanda nujima kahia ka spiritu. 20 Kanda nulelesa uprofeto. 21 Senu shindakenyo ha yuma yeswe, kakaminyenu ha yize yipema. 22 Ehukenu chikolo yuma yeswe yipi.

23 Nakulemba kuli Zambi yoze wakuhana sambukila hanga akanupwise asandu mu milimo yenyi. Chikwo nawa mandumbu, spiritu, mwono ni mujimba wenu, akayifunge, kuyishi chitela, yingunu mu majila eswe ha kuheta cha Mwene wetu Yesu Kristu. 24 Yoze wakunutambika makachilinga, mumu iye kashishika.

25 Mandumbu, nungenu ni kutulembela.

26 Menekenu mandumbu eswe ni mbeju yisandu.

27 Ngunaliumbu mu jina lia Mwene hanga mukanda uno akautangile mandumbu eswe.

28 Chawana cha keke cha Mwene wetu Yesu Kristu, chikapwe hamwe ni yenu.