Kuli A-Hepreu
8 Chino che chikuma chinene cha yuma yize tunahanjika: Tuli ni mwata wa asasendote a lutwe ngwe yono, yoze unatwama ku kwoko lia chindume lia ngunja ya Mwata Munene mu malilu, 2 iye kakukalakala muma musandu ni mu mbalaka yamwenemwene yize Yehova* atungile, hi mutu ko. 3 Mumu mwata wa asasendote mweswe kakumusa hanga ahane yawana ni milambu; kashika, yono neye te katamba kupwa ni chimwe chuma hanga ahane ngwe mulambu. 4 Nyi te kali hano hashi, kachi te kechi kupwa sasendote, mumu kwali kulu atu waze akuhana yawana kulita ni Shimbi. 5 Malunga wano kakulinga mulimo usandu ngwe chilweza ni chizulie cha yuma yize yili mwilu, kulita ni shimbi ya Zambi yize Mose atambwile muze te anambe kutunga mbalaka. Mumu Zambi kambile ngwenyi: “Linga yuma yino yeswe kanawa kulita ni chize akusolwelangayo ku mulundu.” 6 Alioze haliapwila Yesu kali ni mulimo upema chinji, mumu kali nawa chitakanyishi cha usendo upema uze asele kulita ni shimbi jinakatuka ha yilakenyo yipema.
7 Nyi usendo utangu kuwakapwile ni tupalia, kachi kakanehene usendo wamuchiali. 8 Mumu iye kakumona tupalia muli atu muze akwamba ngwenyi: “‘Talenu, matangwa kanakundama,’ chocho anambe Yehova,* ‘mumu mungulinga usendo waha ni akwa-zuwo lia Izalele ni akwa-zuwo lia Yunda. 9 Kuuchi kapwa ngwe usendo uze nalingile ni tulamba twenu muze naakwachile ku kwoko ni kwachiza mu chifuchi cha Engitu, mumu ayo kakafungile usendo wami, kashika nechele kwafunga,’ chocho anambe Yehova.*
10 “‘Uno we usendo mungukalinga ni A-Izalele ha kupalika cha matangwa waze,’ chocho anambe Yehova.* ‘Mungukasa shimbi jami mu manyonga jo ni kujisoneka mu mbunge jo. Yami mungukapwa Zambi yo, ayo makapwa atu jami.
11 “‘Mutu niumwe kechi kalongesa mwenyembo wenyi cheka chipwe ndumbwenyi ngwenyi: “Nyingika Yehova!”* Mumu ayo eswe makangunyingika, chize kuli akape ndo kuli anene. 12 Mumu mungukevwila keke ha yitanga yo ya uhenge, chichi kewuluka nawa shili yo.’”
13 Muze ambile ngwenyi “usendo waha,” iye yalelesa ukulu. Haliapwila chuma chize alelesa, chinayi ni kupwa chikulu, kashika kwasala hakehe chitoke.