Kuli A-Efwesu
5 Kashika, imbululenu Zambi, mumu nuli ana jenyi a zango, 2 nungenu ni kwenda mu zango, ngwe chize nawa Kristu atuzangile* ni kulihana hali yetu* ngwe mulambu wa chitapo, vumba lipema kuli Zambi.
3 Utanji* ni luchisa mweswe, chipwe kuzo kanda ayivuluka hakachi kenu, ngwe chize chatela kuli atu asandu; 4 chipwe yitanga ya sonyi, chipwe sango ja uhepuke, chipwe miselo yize kuyalitele—yuma yino hi yipema ko—alioze, nwatamba kusakwilila Zambi. 5 Mumu nunanyingika kanawa ngwenu, niumwe yoze wakulinga utanji, chipwe mukwa-luchisa, chipwe mukwa-kuzo, yize yinalumbunuka kukombelela mahamba, makapwa ni chihinga mu Wanangana wa Kristu ni wa Zambi wakuhi.
6 Niumwe kanda anwonga ni maliji amokomoko, mumu hamukunda wa yuma yino ufwatulo wa Zambi kuuneza hali waze keshi kwononoka. 7 Kashika, kanda nulikata no; 8 mumu kunyima, yenu nwapwile milima, alioze haliapwila nuli pangu mukulinunga ni Mwene. Nungenu ni kwenda ngwe ana a pangu, 9 mumu kutwama mu pangu chinalumbunuka kusolola utu mu yuma yeswe, kupwa akwa-ululi ni kutwama kulita ni umwenemwene. 10 Senu shindakenyo mashimbu eswe ha yize yakupemena kuli Mwene; 11 kanda nulinjisa mu milimo ya ku milima yize kuyishi kwima mihuko; alioze, yisololenu ku pangu. 12 Mumu yuma yize o akulinga ku tenga, yakukola sonyi chipwe lume ha kuyivuluka. 13 Alioze yuma yeswe kakuyisolola ku pangu, mumu yuma yeswe yize akusolola, yapwa pangu. 14 Kashika akwamba ngwo: “Laula, yena unapombo, hinduka hakachi ka afu, mba Kristu makakutemukina.”
15 Hachino, kanyamenu hanga nuchine kwenda ngwe yihepuke, alioze ngwe akwa-mana. 16 Kanda nukisa mashimbu jenu ni yuma yamokomoko, mumu matangwa kali api. 17 Kashika, kanda nupwa yihepuke, alioze nyingikenu upale wa Yehova.* 18 Chikwo nawa, kanda nuzengewa ni vinyu, mumu vinyu muyihasa kunutwala kulinga yuma yipi, alioze zalenu too ni spiritu. 19 Litakamisenu umwe ni mukwo ha kwimba masamu, ha kuhalisa Zambi, ni ha kwimba miaso ya uwayilo. Imbilenu Yehova* ngwe chize nwakwimba miaso mu mambunge jenu. 20 Sakwililenu matangwa eswe kuli Zambi kanda Tata, ha yuma yeswe mu jina lia Mwene wetu Yesu Kristu.
21 Lizeyelenu umwe ni mukwo mumu lia vumbi linene lize nuli nalio muli Kristu. 22 Mapwo azeyele malunga jo ngwe chize akuzeyela Mwene, 23 mumu lunga iye mutwe wa pwo, chizechene ngwe Kristu ali mutwe wa chikungulwila, ni chilamwina wa mujimba uno. 24 Kwamba pundu, chizechene ngwe chikungulwila chakuzeyela Kristu, mapwo no katamba kuzeyela malunga jo mu yuma yeswe. 25 Malunga, nungenu ni kuzanga mapwo jenu, ngwe chize nawa Kristu azangile chikungulwila ni kuhana mwono yenyi mumu lia chiyo, 26 hanga achipwise chisandu ni kuchipemesa ni liji lia Zambi ngwe kuchisanyisa ni meya, 27 hanga chikungulwila chikapwe chipema kumeso jenyi, chakuhona chipeka hanji mukanya, hanji chuma chikwo ngwe chino, alioze chikapwe chisandu chakuhona kapalia.
28 Chizechene nawa, malunga katamba kuzanga mapwo jo, ngwe chize akuzanga mijimba yoene. Lunga yoze wakuzanga mukwo-pwo, kakulizanga iye mwene. 29 Mumu, niumwe mutu yoze wakuvwila kole mujimba* wenyi wakuhi, alioze kakuulisa ni kuufumba, ngwe chize Kristu akulinga ni chikungulwila, 30 mumu tuli yihanda ya mujimba wenyi. 31 “Ha chikuma chino, lunga makahichika tato ni naye, akalinunge* ni mukwo-pwo, mba eswe aali makapwa musunya umuwika.” 32 Chijimbikilo chino chisandu chili chinene. Alioze ngunahanjika hakutwala kuli Kristu ni chikungulwila. 33 Kashika, mutu ni mutu, akazange mukwo-pwo, ngwe chize akulizanga iye mwene; chikwo nawa, pwo katamba kuvumbika mukwo-lunga.