Mukanda Utangu wa Yoano
4 Mandumbu jami a zango, kanda nutayiza longeso lieswe lize linasoloka ngwe linakatuka lume kuli Zambi,* alioze hengwolenu malongeso jacho hanga numone nyi kanakatuka kuli Zambi, mumu aprofeta anji a mahuza hanasoloka hano hashi.
2 Chuma chize muchinukwasa kunyingika ngwenu, longeso lino linakatuka kuli Zambi chili chino: Longeso lieswe lize liakutayiza ngwo Yesu Kristu kejile mu musunya, linakatuka kuli Zambi. 3 Alioze, longeso lieswe linasoloka ngwe linakatuka kuli Zambi chipwe chocho kulishi kutayiza Yesu, hi lia kuli Zambi ko. Chikwo nawa, longeso liacho linakatuka kuli mukwa-kulimika ni Kristu, yoze nwevwile ngwenu kumeza, haliapwila kali hano hashi.
4 Ana jami a zango, yenu nunakatuka kuli Zambi, hinunakumbu aprofeta a mahuza, mumu yoze unalinungu ni yenu kali munene kuhiana yoze unalinungu ni akwa-hashi. 5 Ayo kali akwa-hashi; kashika akuhanjika yuma ya hano hashi ni akwa-hashi kakwapanjika. 6 Yetu tuli a kuli Zambi. Yoze unanyingika Zambi, kakutwivwa; yoze hi wa kuli Zambi ko, keshi kutwivwa. Chino che chakutukwasa kunyingika longeso liamwenemwene lia kuli Zambi, ni longeso lia mahuza.
7 Mandumbu a zango, tunungenu ni kulizanga umwe ni mukwo, mumu zango linakatuka kuli Zambi, mweswe yoze wakuzanga akwo kasemukine kuli Zambi, kananyingika Zambi. 8 Yoze keshi kuzanga akwo kanyingikine Zambi, mumu Zambi iye zango. 9 Ha chikuma chino zango lia Zambi yilisoloka hali yetu, Zambi yatuma Mwanenyi wa wika hano hashi hanga tupwe ni mwono wa mutolo kupalikila muli iye. 10 Zango lia Zambi linasoloka ha chino: Kuchapwile ngwe yetu twazangile Zambi, alioze iye watuzangile ni kutuma Mwanenyi ngwe chitapo cha kufuka milonga yetu.
11 Mandumbu a zango, nyi chenacho Zambi atuzangile, ni yetu nawa twatamba kulizanga umwe ni mukwo. 12 Niumwe mutu kanda achimona Zambi. Nyi mutununga ni kulizanga umwe ni mukwo, Zambi manunga muli yetu, ni zango lienyi mulipwa lingunu muli yetu. 13 Mumu lia chino, tunanyingika ngwetu tunanungu ni kulivwashana nenyi, ni iye kanalivwashana ni yetu, mumu iye hanatwehe spiritu yenyi. 14 Chikwo nawa, yetu ene twamwene ni meso jetu, haliapwila tunahana uchela ngwetu, Tata katumine Mwanenyi ngwe chilamwina cha akwa-hashi. 15 Yoze wakutayiza ngwenyi Yesu kali Mwana wa Zambi, Zambi manunga ni kulivwashana nenyi, ni iye malivwashana ni Zambi. 16 Tunanyingika zango lize Zambi akwete hali yetu, twakufuliela ha zango liacho.
Zambi iye zango, yoze manunga mu zango, manunga ni kulivwashana ni Zambi, ni Zambi manunga ni kulivwashana nenyi. 17 Chenacho zango alipwishile lingunu muli yetu, hanga tuhase kuhanjika ni hamu ha tangwa lia usopeso, mumu, ngwe chizechene iye apwa, ni yetu nawa che tuli hano hashi. 18 Atu waze akwete zango liamwenemwene keshi kwivwa woma, alioze zango lingunu liakuhuma woma, mumu woma wakutukwika. Kwamba pundu, yoze uli ni woma, kanda achimupwisa mungunu mu zango. 19 Yetu twakuzanga, mumu iye mwe waliangile kutuzanga.
20 Nyi mutu mamba ngwenyi: “Nakuzanga Zambi,” alioze kakuvwila ndumbwenyi kole, kali mukwa-mahuza. Mumu yoze keshi kuzanga ndumbwenyi yoze anamono, kechi kuhasa kuzanga Zambi yoze keshi kumona. 21 Iye katuhele shimbi yino ngwo, yoze wakuzanga Zambi katamba kuzanga nawa ndumbwenyi.