Yilinga ya Apostolo
13 Mu chikungulwila cha mu Andiakia mwapwile aprofeta ni alongeshi wano: Mbarnabe, ni Semone yoze te avuluka nawa ngwo, Naijere, ni Luseu Ka-Sairene, ni Manaene, yoze walilongesele hamwe ni nguvulu Heronde, ni Saulu. 2 Shimbu te machiwayila Yehova* ni kulitwamina kulia, spiritu yisandu yiyamba ngwo: “Nguhandunwinenu Mbarnabe ni Saulu hanga aye ku milimo yize naasanyikinyine.” 3 Cheka nawa muze te halitwamina kulia, yalemba ni kusayika moko jo hali Paulu ni Mbarnabe mba yecha hanga aye.
4 Chocho malunga wano akutuma ku spiritu yisandu, yaya ku Selushia, kwe kuze azaukile mu ulungu ndo ku Shipre. 5 Muze ahetele ku Salamina, yaputuka kwambujola liji lia Zambi mu masunangonga ja A-Yunda. Yoano neye kapwile hamwe no ngwe chikwashi* cho.
6 Muze akatukile ku Salamina, yaya ndo ku tungu lia Pafwo, kwenako awanyine umwe Ka-Yunda mukwa-kupanda wanga kanda profeta wa mahuza avuluka ngwo, Mbar-Yesu. 7 Iye kapwile hamuwika ni nguvulu Sejiu Paulu lunga mukwa-malinjekela. Nguvulu yasanyika Mbarnabe ni Saulu mumu kazangile chinji kwivwa liji lia Zambi. 8 Alioze mukwa-kupanda wanga Elaima (mumu chocho jina lienyi linalumbunuka) yaputuka kulimika no, yazanga kupiangula nguvulu ku ufulielo. 9 Kashika Saulu yoze avuluka nawa ngwo Paulu, yazala too ni spiritu yisandu, mba yahulikila meso jenyi hali iye, 10 yamba ngwenyi: “Yena lunga unazala too ni kalimbalimba ni yuma yeswe yipi, mwana wa Ndiapu, mukwa-kole wa yuma yeswe ya ululi, shina kuchi kulitwamina kupinjisa majila apema a Yehova* nyi? 11 Haliapwila tala, kwoko lia Yehova* hali yena lili, kumwopwa kapuputa, ha shimbu limwe kuchi kumona tangwa.” Hohene mbundu ni milima yiyifuka meso jenyi, iye yaputuka kupapata sali ni sali ni kufupa yoze mamukwata ku kwoko hanga amusongwele. 12 Ha kumona yize yalingiwile, nguvulu yafuliela muli Mwene mumu wakomokene ni malongeso a Yehova.*
13 Paulu ni waze endele nenyi yakatuka ku Pafwo mu ulungu yaheta ku Peleje mu Pamafwilia. Mba Yoano yaahichika yahiluka ku Yerusaleme. 14 Alioze o yanunga ni wenyi wo, yakatuka mu Peleje yaheta ku Andiakia mu Piseteya. Mba ha tangwa lia Sambata yanjila mu sunangonga yatwama. 15 Muze te hatanga Shimbi ya Mose ni Mikanda ya Aprofeta, akwa-kuyula sunangonga yatuma kwalweza ngwo: “Akwetu, nyi nuli ni maliji akutakamisa no atu, ahanjikenu.” 16 Chocho Paulu yakatuka yalinga chilayi ni kwoko, mba yamba ngwenyi:
“Akwetu A-Izalele ni yenu eswe nwakuvwila Zambi woma, panjikenu. 17 Zambi ya atu wano A-Izalele katongwele tulamba twetu muze te achili mu chifuchi cha Engitu ngwe njize, yaanangamisa ni kwachizamo ni kwoko lienyi lia ndundo.* 18 Iye walihumikijine no ha miaka 40 mu puya. 19 Yonwona mavungu shimbiali mu chifuchi cha Kanana, yahana chifuchi cho kuli atu jenyi ngwe chihinga. 20 Yino yalingiwile ha unji wa miaka 450.
“Mba yaaha ngaji ndo ha matangwa a profeta Samuele. 21 Chocho A-Izalele yeta mwanangana, Zambi yaaha Saulu mwana wa Kishi wa ku vungu lia A-Mbenjamine, mwenawo wayulile ha miaka 40. 22 Muze te Zambi hamuchiza ha wanangana, yaaha Ndawichi hanga apwe mwanangana wo. Zambi yashindakenya hakutwala kuli Ndawichi ngwenyi: ‘Hinamona Ndawichi mwana wa Yese, lunga yoze wakuwahisa mbunge yami; iye mwe makamanununa yuma yeswe yize ngunazange.’ 23 Zambi yaneha Yesu ngwe chilamwina cha Izalele kukatuka ku vungu* lia Ndawichi ngwe chize alakenyene. 24 Shimbu Yesu te kanda eza, Yoano yambulula ku vungu lieswe lia Izalele hakutwala ku upapachiso ngwe chilayi cha kulikonyeka. 25 Kashika, muze Yoano te anahete ku songo lia mulimo wenyi, yamba ngwenyi: ‘Nwakunyonga ngwenu yami iya? Yami hi nguli iye ko. Kwamba pundu, kunyima lia yami mukwiza umwe yoze yami chishi ni ulite wakujitula muya wa sapato jenyi.’
26 “Mandumbu, ana ja munyachi wa Apalahama ni waze eswe hakachi kenu akuvwila woma Zambi, sango jino ja ulamwino hanajitumu kuli yetu. 27 Mumu atu eswe a mu Yerusaleme ni akwa-kwayula kakatayijile Yesu ngwe Mesaya, alioze ha kumusopesa yamanununa maliji ja Aprofeta waze te akutanga-tanga ha sambata jeswe. 28 Chipwe ngwe kawanyine chitela cha kumushihila, hindu yeta kuli Pilatu hanga atume kumushiha. 29 Mba muze te hamanununa yuma yeswe yize yasonewene hakutwala kuli iye, yamuchiza ha mutondo, yamusa mu fuka. 30 Alioze Zambi wamuhindwishile hakachi ka afu. 31 Ha matangwa anji iye wasolokele kuli waze akandukile hamwe nenyi ku Ngalileya ndo ku Yerusaleme. Wano haliapwila kanambujola kuli atu hakutwala kuli iye.
32 “Haliapwila yetu tunanwambulwila sango jipema hakutwala ku chilakenyo chize alakenyene kuli tulamba twetu. 33 Zambi hanachimanununa hali yetu, ana jo ha kuhindwisa Yesu ngwe chize chinasonewa ha samu wamuchiali ngwo: ‘Yena uli mwanami; musono yami napwa tatenu.’ 34 Amu Zambi hanamuhindwisa hakachi ka afu, hanga kechi kapwa nawa ni mujimba uze wa kupola hanahanjika chino ngwenyi: ‘Mungukamanununa chilakenyo chami cha utu wa zango chize nalakenyene kuli Ndawichi.’ 35 Kashika samu yikwo yakwamba ngwo: ‘Kechi kecha musandu wenyi apole.’ 36 Ndawichi kalingile upale wa Zambi* ha mashimbu jenyi, mba yafwa yamufunda hamwe ni tulamba twenyi, chocho yapola. 37 Alioze yoze Zambi ahindwishile kakapolele.
38 “Kashika mandumbu, nyingikenu ngwenu Zambi makakonekena shili yenu kupalikila muli lunga yono. 39 Muli iye mweswawo mafuliela, makamusambisa ku yuma yize yeswe te kechi kuhasa kumusambisa kupalikila mu Shimbi ya Mose. 40 Kashika kanyamenu kuchina kanda yiza hali yenu yuma yize Aprofeta ambile ngwo: 41 ‘Talenu akwa-kaleleso, lishimwokenu, linungenu, mumu mungulinga milimo ha matangwa jenu yize kunuchi kafuliela chipwe manwambulwilayo mu yimako-yimako.’”
42 Muze Paulu ni Mbarnabe te anatuhuka mu sunangonga, atu yaliumba kuli ayo hanga akahanjike yikuma yizeyene ha Sambata yikwo. 43 Muze te akwa-sunangonga halimwanga, A-Yunda anji ni waze alipwishile A-Yunda te akuwayila Zambi, yakaula Paulu ni Mbarnabe. Mba hakuhanjika no Paulu ni Mbarnabe yaakolweza hanga anunge mu chawana cha keke ya Zambi.
44 Ha tangwa likwo lia Sambata, atu anji a mu mbonge yalikungulula hanga evwe liji lia Yehova.* 45 Alioze muze A-Yunda amwene mbunga, yaazala too ni ukwa, yaputuka kuhamika yuma yize ahanjikile Paulu ni kushililika. 46 Chocho Paulu ni Mbarnabe yahanjika no ni hamu ngwo: “Chinalite kulianga kunwambulwila yenu maliji a Zambi. Alioze amu nunalitunu maliji jacho ni kupatula ngwenu, kunwatelele mwono wa mutolo, haliapwila tunatewulukila kuli akwa-mavungu. 47 Mumu Yehova* hanatwehe shimbi yino ngwenyi: ‘Hingunakutongola ngwe pangu kuli akwa-mavungu hanga utwale ulamwino ndo ku masongo a hashi.’”
48 Muze akwa-mavungu achivwile, yawahilila ni kuputuka kuchichimieka liji lia Yehova,* mba eswe waze apwile akwa-kulikehesa ni kuzanga kupwa ni mwono wa mutolo, yaafuliela. 49 Chikwo nawa, liji lia Yehova* liafumanyine ku yihela yeswe. 50 Alioze A-Yunda yavundula mapwo pichi waze te akuvwila Zambi woma ni malunga alemu a mu mbonge, no yahungumiona Paulu ni Mbarnabe yaahanga mu njiza yo. 51 O yakukumuna fufuta ku molu jo ngwe uchela wa kwahisa, mba yaya ku Ikoniu. 52 Mba e tumbaji azalile too ni uwahililo ni spiritu yisandu.