Yilinga ya Apostolo
16 Paulu yaheta ku Ndervwe ni ku Lisetra. Yawanako umwe kambaji jina lienyi Timoteu mwana wa umwe pwo Ka-Yunda mukwa-kufuliela, alioze tato Ka-Ngresia. 2 Mandumbu mu Lisetra ni mu Ikoniu kapwile ni kuhanjika kanawa hakutwala kuli iye. 3 Paulu kazangile hanga Timoteu amukaule, chocho yamupwisa ngalami hamukunda wa A-Yunda a ku yihela yacho, mumu eswe te kananyingika ngwo tato Ka-Ngresia. 4 Ha kwendangana mu mambonge, yambulwila mandumbu yiyulo yize apostolo ni makulwana akwachile mu Yerusaleme hanga te o ononokene yiyulo yacho. 5 Chocho yikungulwila yatakamine mu ufulielo, yokele tangwa ha tangwa.
6 O kapalikile ndusu mu Fwijia ni mu chifuchi cha A-Ngalashia mumu spiritu yisandu yaakanjishile kwambujola lie liji mu Azia. 7 Chikwo nawa, muze ahetele ku Mishia, yeseka kunjila mu Mbitinia, alioze spiritu ya Yesu kuyaatayijile kuchilinga. 8 Chocho yapalikila* ku Mishia ni kupalumuka ndo ku Troa. 9 Ha ufuku uzewene, Paulu yamona mu usolwelo umwe lunga wa ku Masendoniya te kanamana ni kuliumba kuli iye ngwenyi: “Tweya kama kuno ku Masendoniya utukwase.” 10 Muze Paulu te hamona usolwelo, hazehene yitufupa kuya ku Masendoniya, mumu te hitwanyingika ngwetu, Zambi hatutambika hanga twambujole sango jipema kuli ayo.
11 Kashika, ha kukatuka ku Troa, yitwenda mu ulungu pundu ndo ku Samotrashia. Mukwachako, yituya mu Neapole. 12 Ha kukatukako, yituya ku Fwilipu mbonge yitangu ya mu Masendoniya yize te yatwama mu chiyulo cha A-Roma. Mba yitutwama amwe matangwa mu mbonge yacho. 13 Ha tangwa lia Sambata yitutuhuka mu limbo ni kuya ku sesa lia lwiji, mumu twanyongene ngwetu kwapwile chimwe chihela cha kulembela. Yitutwama ni kuputuka kuhanjika ni mapwo waze te analikungulwilako. 14 Kwapwile umwe pwo yoze te unapanjika, jina lienyi Lindia, wa mu mbonge ya Taiatira, iye te kakulanjisa mahina achila, chikwo nawa te mukwa-kuwayila Zambi. Yehova* kazulwile mbunge yenyi hanga apanjike kanawa yize Paulu apwile ni kuhanjika. 15 Muze te hamupapachisa iye ni akwa-zuwo lienyi, yaliumba kuli yetu ngwenyi: “Nyi nwakungumona ngwenu, nashishika kuli Yehova,* tweyenu nutwame ku zuwo liami.” Chocho iye yatushinjila, yetu yitutayiza.
16 Tangwa limwe shimbu te tunayi ku chihela cha ulembelo, yitulitakana ni umwe kavumbi wa pwo yoze wapwile ni spiritu ya luchisa. Mwana-pwo wacho kapwile mukwa-kutaha.* Chocho wapichishile chinji miata jenyi. 17 Mwana-pwo wacho kapwile ni kukaula Paulu ni yetu ni kukololoka ngwenyi: “Malunga wano kali tuvumbi twa Zambi Chitunda. Kashika kananwambulwila jila ya ulamwino.” 18 Iye yachilinga ha matangwa anji. Mba Paulu yalivutula, yatewuluka, yambila spiritu ya luchisa ngwenyi: “Ngunakwambe mu jina lia Yesu Kristu ngwami, tuhuka muli iye.” Spiritu ya luchisa yiyituhuka muli iye ola yizeyene.
19 Mba muze miata a mwana-pwo amwene ngwo kechi kuhasa kupita nawa, yakwata Paulu ni Saila yaambulumuna ndo ha chitanda kumeso ja akwa-kuyula. 20 Muze te haaneha kuli tupitau, yamba ngwo: “Malunga wano A-Yunda kanapinjisa chinji mbonge yetu. O, 21 kakwambujola ndako jize kulita ni shimbi yetu kuchalitele kujitambula, chipwe kujilinga, se tuli A-Roma.” 22 Chocho mbunga eswe yaalundumukina. Tupitau yaasuwa mazalo ja Paulu ni Saila, mba yatuma kwalamba ni mbwechi. 23 Muze te haalamba chikolo, yaasa mu zuwo lia ususu. Chocho yahana shimbi kuli kalayi hanga aafunge kanawa. 24 Iye hakutambula shimbi yacho, yaanjisa mu zuwo lia ususu lia muchima ni kuyikila molu jo mu kuuli.
25 Alioze ha muchima ufuku, Paulu ni Saila te kanalembe ni kwimba miaso ya kuhalisa Zambi, funge akwo apwile ni kwapanjika. 26 Susumuku, kwalingiwile munyiko unene uze wanyikine fundamentu yeswe ya zuwo lia ususu. Hazehene mapito eswe yazuluka ni malenge ja eswe, yaaholoka. 27 Kalayi wa zuwo lia ususu muze te halaula, yamona yajilo yawashi, yatomona katana kenyi hanga alishihe mumu kanyongene ngwenyi funge kachina. 28 Alioze Paulu yakololoka ni liji linene ngwenyi: “Kanda ulilinga chipi, mumu yetu eswe muno mutuli!” 29 Kalayi yeta lutemo, yanjila fuji ni kuchikima ni woma, yafulamana kumeso ja Paulu ni Saila. 30 Iye yaatwala haze ni kwahula ngwenyi: “Malunga, yika natamba kulinga mba ngukalilamwine?” 31 Ayo yamukumbulula ngwo: “Fuliela muli Mwene Yesu, mba kumakakulamwina, yena ni akwa-zuwo lie.” 32 Chocho yamwambulwila liji lia Yehova,* iye ni akwa-zuwo lienyi eswe. 33 Ha ufuku uzewene iye yaya no, mba yakosa yilonda yo. Hazehene, iye ni akwa-zuwo lienyi eswe, yaapapachisa. 34 Yaatwala ku zuwo lienyi, yaaha kulia. Mba akwa-zuwo lienyi eswe yawahilila chinji ha kufuliela muli Zambi.
35 Muze te hikwacha, tupitau yatuma tufunga hanga alweze kalayi ngwo: “Tusula malunga wano.” 36 Kalayi yambulula maliji wano kuli Paulu ngwenyi: “Tupitau katuma hanga tunutusule mu waali wenu. Kashika haliapwila tuhukenu nuye ni sambukila.” 37 Alioze Paulu yamukumbulula ngwenyi: “Hatulamba kumeso ja atu eswe chakuhona kutusopesa chipwe ngwe tuli A-Roma, ni kutusa mu zuwo lia ususu. Haliapwila kanazange kututuhwisa mu usweke nyi? Ka, eze ayoene hanga atutwale haze.” 38 Tufunga yambulula maliji jacho kuli tupitau. Chocho o yevwa woma unji hakwivwa ngwo malunga jacho kapwile A-Roma. 39 Tupitau yeza, yeta ukonekeno. Muze te hatwala haze, yeta hanga akatuke mu mbonge. 40 Paulu ni Saila yatuhuka mu zuwo lia ususu yaya ku zuwo lia Lindia. Mba muze te hamona mandumbu, yaatakamisa. Mba yaya kwo.