Mukanda Wamuchiali wa A-Korindu

7 Kashika, akwetu a zango, amu tuli ni yilakenyo yino, tulipemesenu ku luchisa mweswe wa musunya ni wa spiritu, ni kulikolweza ku usandu ni woma wa Zambi.

2 Twazulwilenu mbunge jenu. Kutwalingile uhenge kuli mutu niumwe, kutwapihishile kuli mutu niumwe, kutwongele mutu niumwe. 3 Chambile chino hanga ngunuhise. Mumu hingunambe kulu ngwami, yenu nuli mu mbunge jetu hanga tukafwe hamuwika ni kumona mwono hamuwika. 4 Nakuhanjika zwalala ni yenu. Kulisamba chami chinene hakutwala kuli yenu. Mbunge yami kuyinatakama chikolo; ngunazale too ni uwahililo mu luyinda wetu mweswe.

5 Chipwe muze twahetele ku Masendoniya, kutwakapwile ni uhwimino, twamwene lamba lieka ni lieka, kwapwile kulitachika haze, ni woma mu mbunge. 6 Alioze Zambi yoze wakutakamisa waze anahongo, watutakamishine ni kuheta cha Titu; 7 hi wika ko mumu lia kuheta chenyi, alioze nawa ni utakamiso uze iye atambwile mumu hali yenu, yatulweza nawa ha chize nunazange kungumona, yinyengo yenu, ni kulihulumba* chenu hali yami; kashika uwahililo wami woka.

8 Mumu chipwe ngwe nanuvwishile chinyengo ni mukanda wami, nihindu chalisehele. Chipwe ngwe ku uputukilo nanenganyanyine ha kunuvwisa chinyengo, haliapwila ngunanyingika ngwami chinyengo chenu chapwile cha mashimbu akehe wika. 9 Haliapwila ngunawahilila hi mumu ngwo nanuvwishile chinyengo ko, alioze mumu chinyengo chenu chanukwashile nulikonyeke. Mumu nwanenganyanyine kulita ni upale wa Zambi, kashika kutwakanulingile upi niumwe. 10 Mumu chinyengo kulita ni upale wa Zambi* chakuneha kulikonyeka chize chakutwala ku ulamwino, chize niumwe kechi kaliseha; alioze chinyengo cha hano hashi chakuneha kufwa. 11 Talenu kuyuka chize nwapwa nacho ha tachi jize nunase mumu lia chinyengo chenu kulita ni upale wa Zambi, yenu hinwapwa atu alinanga, nwakuvwila kole yuma yipi, nwakuvwila Zambi woma, nwakuzanga kulikonyeka, hinunasolola zango, ni kululieka yuma yipi yize nwalingile! Mu yuma yino yeswe, nwasolwele ngwenu nwalinanga ha chikuma chino. 12 Chipwe ngwe nanusonekenene, chakachilingile mumu lia yoze walingile upi, hanji mumu lia yoze amulingile upi, alioze nachilingile hanga ngumone nyi chamwenemwene lume kumeso ja Zambi te nunazange kutupanjika. 13 Kashika twatakamine.

Twachilingile hi mumu lia utakamiso uze twatambwile ko, alioze twawahililile chinji kuhiana ha uwahililo wa Titu, mumu yenu eswe nwahuzulwile spiritu yenyi. 14 Mumu nyi nahanjikile ni iye hakutwala kuli yenu ni kulisambisa, chakevwile sonyi; alioze ngwe chizechene yuma yeswe yize twahanjikile kuli yenu yapwile yamwenemwene, chocho kulisamba chetu nawa chapwile chamwenemwene kumeso ja Titu. 15 Chikwo nawa, zango lienyi hali yenu liakwoka chinji kuhiana muze akwiwuluka kwononoka chenu, ni chize nwamutambwile ni woma ni kuchikima. 16 Nakuwahilila chinji, mumu mu yuma yeswe, munguhasa kufuliela muli yenu.