Yoshua
2 Hachino, Yoshua mwana wa Nune, kukatuka ku Shitime, yatuma malunga aali ngwe ngendeshi. Iye yaalweza ngwenyi: “Yeenu nukendese chifuchi, chipi-chipi chifuchi cha Yeriku.” Chocho, ayo yaya, yaheta ku zuwo lia umwe chikoi avuluka ngwo Rahape, yaatwamako. 2 Mwanangana wa Yeriku yaamulweza ngwo: “Malunga A-Izalele eza kuno ufuku uno hanga endese chifuchi.” 3 Hachino, mwanangana wa Yeriku yatuma kulweza Rahape ngwenyi: “Tuhwisa malunga waze ali mu zuwo lie, mumu ayo keza ni kwendesa chifuchi.”
4 Alioze, pwo yasweka malunga aali. Mba yamba ngwenyi: “Ewa, kwezanga malunga aali, alioze chanyingikine kuze akatukanga. 5 Ha chingoloshi, muze te hikwasala hakehe ayike chikolo cha mbonge, malunga jacho yaya kwo. Chanyingikine kuze atalikisanga, alioze nyi nwakaula kawashi, munuhasa kwawana.” 6 (Alioze, iye te haatwala ha fulumba lia zuwo, haasweka kushi lia mishachi yize yapwile helu lia zuwo.) 7 Chocho, malunga waze mwanangana atumine yakaula mu jila ya kuya ku chau cha Yordau, chikolo cha mbonge yachiyika muze ayo te hatuhuka.
8 Muze ngendeshi te kanda achipomba, Rahape yanyina ha fulumba hanga ahanjike no. 9 Iye yamba kuli ayo ngwenyi: “Ngunanyingika ngwami, Yehova manwaha chifuchi chino, chikwo nawa, woma tunanuvwila. Atu eswe mu chifuchi chino kanachikima ni woma mumu lia yenu. 10 Mumu tunanyingika chize Yehova omishine meya a mu Kalunga-Lwiji Muchila kulutwe lienu, muze nwakatukile mu Engitu, ni yize nwalingile kuli mianangana ja A-Amore, Sahone, Oge, waze yenu nwanongesene mu sali lia lwiji Yordau. 11 Muze twevwile sango jino, yituhonga,* yituhona hamu mumu lia yenu, mumu Yehova Zambi yenu, iye Zambi wa mwilu ni hashi. 12 Haliapwila, lisesa, lishingenu mu jina lia Yehova ngwenu, munukasolwela keke akwa-zuwo lia tata ngwe chize yami nanusolwelayo. Ngwehenu chilayi chize muchisolola ngwo munukalinga yize munulishinga. 13 Lamwinenu kama tata, mama, mandumbu jami a mapwo ni a malunga ni waze eswe atwama no, kanda nwashiha.”
14 Malunga jacho yamukumbulula ngwo: “Nyi kuwalwezele mutu niumwe yize tunambe kulinga, tunakulakenya ngwetu, muze Yehova Zambi matwaha chifuchi chino, mutukakusolwela keke. Zambi akatushihe nyi kutwalingile yize twalitesa.” 15 Mba Rahape yaasunwisa ni lungoji ha kapenda, mumu zuwo lienyi liapwile sali limwe lia chipanga cha mbonge. Kwamba pundu, zuwo lienyi liapwile helu lia chipanga cha mbonge. 16 Mba Rahape yaalweza ngwenyi: “Yeenu ku milundu nuswameko matangwa atatu hanga akwa-kunukaula achine kunuwana. Muze ayo mafuna, munuhasa kununga ni wenyi wenu.”
17 Malunga yamba ngwo: “Mutukasamba ku shingo lize watushingisa, 18 nyi muze mutukanjila mu chifuchi chino kutwakawanyine lwoji yono muchila watusunwisa nenyi wa kukasa ku kapenda. Watamba kukungulula ku zuwo lie, tatenu, noko, mandumbu je a mapwo ni a malunga ni atu eswe a ku zuwo lia tatenu. 19 Kashika, mweswawo yoze matuhuka haze, mulonga wa manyinga ukapwe hali iye mwene, yetu mutusamba. Alioze, nyi mukulingiwa chimwe chuma chipi kuli yoze uli mu zuwo ni yena, mulonga wa manyinga jenyi muupwa hali yetu. 20 Alioze, nyi wambulula yize tunambe kulinga, mutukasamba ku shingo lietu.” 21 Iye yaakumbulula ngwenyi: “Chikalingiwe kulita ni chize hinwamba.”
Chocho, yaalweza hanga aye, o yanunga ni wenyi wo. Mba kulutwe iye yakasa lwoji muchila ha kapenda. 22 Ayo yaya ku mulundu, yatwamako matangwa atatu ndo muze waze te anaakaula ahilukile. Waze te anaakaula yaafupa mu matapalo eswe, alioze kawanyine. 23 Ngendeshi yaakatuka ku mulundu, yaazauka lwiji yaya ni kuliwana ni Yoshua mwana wa Nune. Ayo yamulweza yuma yeswe yize yinakalingiwa. 24 Ayo yalweza Yoshua ngwo: “Yehova hatwaha chifuchi chino cheswe. Kwamba pundu, atu mu chifuchi chino kanevu woma mumu lia yetu.”