Asonekene Yoano

6 Kulutwe lia yino yuma, Yesu yaya mu sali lia Kalunga-lwiji wa Ngalileya, hanji wa Tiperia. 2 Mbunga yinene ya atu te yinamukaula, mumu ayo kapwile ni kumona yikomokeso yize iye apwile ni kulinga ha kuuka mieji. 3 Mba Yesu yakanduka ha mulundu, yatwamaho hamwe ni tumbaji twenyi. 4 Chizomboka, che chiwanyino cha A-Yunda, te chinakundama. 5 Muze Yesu ahetwile meso jenyi, yamona mbunga yinene yinakundama kuli iye, yahula Fwilipe ngwenyi: “Kulihi mutulanda mbolo, hanga ayo alie?” 6 Alioze, Yesu kambile chino hanga amweseke, mumu iye mwene te kananyingika yize malinga. 7 Fwilipe yamukumbulula ngwenyi: “Chipwe mutulanda mbolo ja kama jaali ja mbongo*, kujichi kukumbana hanga eswe alie, chipwe kachihanda.” 8 Umwe wa kuli tumbaji twenyi avuluka ngwo Andeleu, mwanakwo ya Semone Petulu, yamba kuli iye ngwenyi: 9 “Tuli hano ni umwe kanuke wa lunga yoze uli ni mbolo jitano ja tiliku ni tuyishi twaali. Alioze, chipwe chocho kuyichi kukumbana kuli atu apwahaha.”

10 Yesu yamba ngwenyi: “Lwezenu atu hanga atwame.” Ha chihela chacho hapwile mwambu unji, kashika unji wa malunga 5,000 yatwamaho. 11 Yesu yanda mbolo, muze halemba, yajitetela waze te anatwamaho; yalinga nawa chizechene ni tuyishi, chocho ayo eswe yalia yakuta. 12 Alioze, muze hakuta, iye yamba kuli tumbaji twenyi ngwenyi: “Kungenu yihanda yize yasalaho hanga tuhone kukisa nichimwe.” 13 Kashika, yakunga yihanda, yazalisa mitonga 12 ya yihanda ya mbolo jitano ja tiliku jize ahichikile atu waze alile.

14 Muze atu hamona chilayi chize alingile, yaputuka kwamba ngwo: “Chochene, Profeta yoze ambile ngwo makeza hashi mwenau.” 15 Mba muze Yesu hanyingika ngwenyi, ayo te kanambe kwiza hanga amupwise mwanangana, yakatuka, yaya cheka ku mulundu ukawenyi.

16 Muze te hikwatoka, tumbaji twenyi yapalumuka ku kalunga-lwiji, 17 yanjila mu wato yaya, yazauka kalunga-lwiji aye ku Kafwanaume. Te hi kwalaa, Yesu te kanda achiya kuli ayo. 18 Mumu lia fuji yinji yize te yiliko, kalunga-lwiji yaputuka kufuza. 19 Alioze, muze te hapulula kilometru* jitano hanji jisambano, ayo yamona Yesu kanende helu lia kalunga-lwiji, kanakundama ku wato, chocho yevwa woma. 20 Alioze, iye yamba kuli ayo ngwenyi: “Kanda nwivwa woma, yami!” 21 Ayo yazanga kumumbata mu wato, alioze hazehene, wato yiuheta kuze te anayi.

22 Muze hikwacha, mbunga ya atu waze asalile mu sali lia kalunga-lwiji, yanyingika ngwo kwapwile wato umuwika ukehe. Nawa ngwo, Yesu kakanjilile mu wato hamwe ni tumbaji twenyi, alioze tumbaji kayile ukawo. 23 Mato akwo a ku Tiperia yakundama hakamwihi ni chihela haze alile mbolo muze Mwene te halemba. 24 Kashika, muze mbunga hamona ngwo Yesu keshiko chipwe tumbaji twenyi, ayo yanjila mu mato jo, yaya ku Kafwanaume ni kufupa Yesu.

25 Muze hawana Yesu mu sali lia kalunga-lwiji, ayo yamba kuli iye ngwo: “Longeshi, ola yika wahetanga kuno?” 26 Yesu yamba kuli ayo ngwenyi: “Pundu ngunambe kuli yenu ngwami, yenu nunangufupu, hi mumu lia yilayi ko yize nwamonanga, alioze mumu nwalianga mbolo yinukuta. 27 Kanda nukalakalila kulia chize chakupola, alioze kalakalilenu kulia chize kuchishi kupola, cha mwono wa mutolo, chize Mwana-mutu makanwaha; mumu Tata, mwe Zambi mwene, hanamujiki ni chijikilo chenyi cha utayizo.”

28 Mba ayo yamuhula ngwo: “Yika twatamba kulinga mba tulinge milimo ya Zambi?” 29 Yesu yaakumbulula ngwenyi: “Mulimo wa Zambi uli uno, fulielenu hali yoze iye atumine.” 30 Mba ayo yamba kuli iye ngwo: “Chilayi chika mulinga hanga tumone, mba tufuliele muli yena? Chuma chika mulinga? 31 Tulamba twetu kalile manaa mu puya, ngwe chize hanasoneka ngwo: ‘Iye kanuhele mbolo ja mwilu hanga nulie.’” 32 Mba Yesu yamba kuli ayo ngwenyi: “Ngunanulweze pundu ngwami, Mose kakanuhele mbolo ya mwilu, alioze Tata kakunwaha mbolo yamwenemwene ya mwilu. 33 Mumu mbolo ya Zambi yili yoze wakusunuka mwilu ni kuhana mwono kuli akwa-hashi.” 34 Kashika, ayo yamba kuli iye ngwo: “Mwene, twehe kama mbolo yino matangwa eswe.”

35 Yesu yamba kuli ayo ngwenyi: “Yami nguli mbolo ya mwono. Yoze meza kuli yami, kechi keza kevwa nawa zala nilimwe tangwa, ni yoze mangufuliela kechi keza kevwa nawa pwila nilimwe tangwa. 36 Alioze, ngwe chize nanulwezanga, yenu hinunangumono, nihindu kunushi kufuliela. 37 Eswe waze Tata akungwaha, makeza kuli yami, ni yami chichi kalituna yoze meza kuli yami; 38 mumu nakatukile mwilu hanga ngulinge upale wa yoze wangutumine, hi wa yami mwene ko. 39 Upale wa yoze wangutumine uli uno ngwo, kanda ngutokesa niumwe wa kuli waze eswe iye anguhele, alioze ngwahindwise mu ufwe ha tangwa lia kasula. 40 Mumu upale wa Tata uli uno, mweswawo mamona Mwana ni kumufuliela, apwe ni mwono wa mutolo, ni yami mungukamuhindwisa ha tangwa lia kasula.”

41 Kashika, A-Yunda yaputuka kulinyenyeta hali iye, mumu kambile ngwenyi: “Yami nguli mbolo yize yahulumukine mwilu.” 42 Ayo yaputuka kwamba ngwo: “Ngwami au Yesu mwana wa Yosefwe? Tato ni naye tunaanyingika, mba kuchi anambe haliapwila ngwenyi: ‘Nahulumukine mwilu’?” 43 Yesu yaakumbulula ngwenyi: “Litwaminenu kulinyenyeta hakachi kenu. 44 Niumwe mahasa kwiza kuli yami wakuhi, shina wika nyi Tata yoze wangutumine mamuneha, ni yami mungukamuhindwisa ha tangwa lia kasula. 45 Aprofeta hanasoneka ngwo: ‘Ayo eswe kumakaalongesa kuli Yehova.’* Mweswawo wakupanjika Tata ni kulilongesa kuli iye, kakwiza kuli yami. 46 Kukushi mutu niumwe yoze hanamono Tata, shina wika yoze wakatukile kuli Zambi; iye mwe hanamono Tata. 47 Ngunanulweze pundu ngwami, yoze wakufuliela, kali ni mwono wa mutolo.

48 “Yami nguli mbolo ya mwono. 49 Tushakulu jenu kalile manaa mu puya, alioze hanafu. 50 Yino ye mbolo yize yakuhulumuka mwilu hanga mweswawo mayilia ahone kufwa. 51 Yami nguli mbolo ya mwono yize yahulumukine mwilu. Nyi mutu malia mbolo yino, matwama ku miaka yeswe; kwamba pundu, mbolo yize munguhana, yili musunya wami hanga akwa-hashi apwe ni mwono.”

52 Kashika, A-Yunda yaputuka kulihangujola hakachi ko ni kwamba ngwo: “Kuchi lunga yono mahasa kutwaha musunya wenyi hanga tulie?” 53 Chocho, Yesu yamba kuli ayo ngwenyi: “Pundu ngunanulweze ngwami, nyi kunwalile musunya wa Mwana-mutu ni kunwa manyinga jenyi, kunuchi kupwa ni mwono.* 54 Yoze wakulia musunya wami ni kunwa manyinga jami, kali ni mwono wa mutolo, yami mungukamuhindwisa ha tangwa lia kasula. 55 Mumu musunya wami che kulia chamwenemwene, ni manyinga jami che kunwa chamwenemwene. 56 Yoze wakulia musunya wami ni kunwa manyinga jami, kakulivwashana ni yami, ni yami nakulivwashana ni iye. 57 Ngwe chizechene Tata uli ni mwono angutumine, ni yami nguli ni mwono mumu lia Tata, chizechene nawa, yoze mangulia, makapwa ni mwono mumu lia yami. 58 Yino ye mbolo yize yahulumukine mwilu, kuyapwile ngwe yize tushakulu jenu alile nihindu yafwa. Mweswawo malia mbolo yino, kumakapwa ni mwono wa mutolo.” 59 Yesu kambile yino yuma muze te analongesa mu yimwe sunangonga* mu Kafwanaume.

60 Muze evwile yuma yino, anji a kuli tumbaji twenyi yamba ngwo: “Maliji wano kali akalu chinji, iya mahasa kwapanjika?” 61 Alioze, muze Yesu hanyingika ngwenyi tumbaji kanalinyenyeta mumu lia yuma yacho, yamba kuli ayo ngwenyi: “Yino yinanutalingisa nyi? 62 Mba kuchi muchipwa nyi munumona Mwana-mutu kanazezuka kuze apwile chitangu? 63 Spiritu ye yakuhana mwono; musunya kuushi ulemu niumwe. Yuma yize nanulweza yili spiritu ni mwono. 64 Alioze amwe a kuli yenu kunwafulielele.” Mumu chize ku uputukilo Yesu kanyingikine waze te kechi kumufuliela ni yoze te mamukunjika. 65 Iye yamba nawa ngwenyi: “Kashika nanulwezanga ngwami, niumwe mahasa kwiza kuli yami wakuhi, shina Tata mamusanyika.”

66 Mumu lia yuma yino, anji a kuli tumbaji twenyi yaya kwo, yafuna ku yuma yize ahichikile kunyima. Yalitwamina kumukaula. 67 Kashika, Yesu yamba kuli e tumbaji Kumi ni Aali ngwenyi: “Shina ni yenu nawa nunazange kuya?” 68 Semone Petulu yamukumbulula ngwenyi: “Mwene, kuli iya mutuya? Yenu nuli ni maliji a mwono wa mutolo. 69 Yetu hitunafuliela, tunanyingika ngwetu, yenu nuli Musandu wa Zambi.” 70 Yesu yamukumbulula ngwenyi: “Hi yami ko nanusakwile yenu eswe kumi ni aali? Alioze, umwe wa kuli yenu kali chilamikiji.”* 71 Kwamba pundu, iye te kanahanjika hakutwala kuli Yundase, mwana wa Semone Ka-Keriote, mumu iye mwe te mamukunjika, chipwe ngwe kapwile umwe wa kuli Kumi ni Aali.