Asonekene Luka
4 Kashika, amu Yesu azalile too ni spiritu yisandu, yakatuka ku Yordau, ye spiritu yiyimutwala mu puya 2 ha matangwa 40. Kuzekwene yamweseka kuli Ndiapu. Iye kalile nichimwe ha matangwa jacho, muze matangwa jacho ahwile, yevwa zala. 3 Hohene Ndiapu yamwamba ngwenyi: “Nyi uli mwana wa Zambi, amba hanga liwe lino lialumuke mbolo.” 4 Alioze Yesu yamukumbulula ngwenyi: “Hichinasonewa ngwo: ‘Mutu katambile kutwama wika ni mwono mumu lia mbolo.’”
5 Chocho, Ndiapu yamutwala ha mulundu usuku, yamusolwela mawanangana eswe a hashi ha shimbu limuwika. 6 Mba Ndiapu yamwamba ngwenyi: “Mungukwaha mawanangana eswe wano ni uhenya wo, mumu hanangukunjikawo, munguhasa kwahana kuli mweswawo yami ngunazange. 7 Kashika, nyi mufulamana ni kunguwayila, yuma yino yeswe muyipwa ya yena.” 8 Yesu yamukumbulula ngwenyi: “Hichinasonewa ngwo, ‘Wayila Yehova* Zambi ye, iye wika watamba kulingila mulimo usandu.’”
9 Ndiapu yamutwala ku Yerusaleme, yamusa ha kasonga ka tembele, mba yamba kuli iye ngwenyi: “Nyi uli mwana wa Zambi, linyase hashi, 10 mumu chinasonewa ngwo: ‘Iye makatuma angelo jenyi hali yena hanga akufunge,’ 11 mba, ‘Ayo makakuzundula ni moko jo hanga uhone kuhukana ku liwe.’” 12 Yesu yamukumbulula ngwenyi: “Hanachambe ngwo: ‘Kanda ukeseka Yehova* Zambi ye.’” 13 Kashika, muze Ndiapu ahwishile kumweseka, yamuhichika ndo ha mashimbu akwo alita.
14 Yesu yahiluka ku Ngalileya ku tachi ja spiritu. Mba lufuma wenyi mupema yalimwanga mu chifuchi cheswe ni mu yihunda yikwo ya hakamwihi. 15 Chikwo nawa, iye yaputuka kulongesa mu masunangonga jo, chocho ayo eswe yamuchichimieka.
16 Mba iye yahiluka ku Nazare kuze amulelele, kulita ni chako chenyi, ha tangwa lia Sambata yanjila mu sunangonga, yakatuka hanga atange. 17 Chocho, yamwaha chivungo cha profeta Izaia, mba iye yavungulula chivungo chacho, yawana haze hapwile hakusoneka ngwo: 18 “Spiritu ya Yehova* hali yami yili, mumu hananguwahisa hanga ngwambujole sango jipema kuli yiswale, hanangutumu hanga ngwambujole utuswilo kuli funge, ngulawise meso a tupuputa ni kutusula waze akumona lamba, 19 hanga ngwambujole mwaka wa utayizo wa Yehova.”* 20 Chocho, yavunga chivungo, yachihana kuli mukwa-kuchifunga mba yatwama, atu eswe waze apwile mu sunangonga, yahulikila meso jo hali iye. 21 Mba iye yaputuka kwamba kuli ayo ngwenyi: “Musono, maliji a chisoneko chino nwevwa kamanunuka.”
22 Atu eswe yaputuka kuhanjika kanawa hali iye ni kukomoka ha maliji apema waze apwile ni kutuhuka mu kanwa lienyi, mba ayo yamba ngwo: “Ngwami yono mwana wa Yosefwe?” 23 Kashika iye yaamba ngwenyi: “Chochene, yenu munukata chishima hali yami chakwamba ngwo: ‘Mbuki liwuke yena mwene. Ni kwamba ngwo, linga nawa kuno mu mbonge ye, yuma yize twevwile walingile mu Kafwanaume.’” 24 Mba iye yamba ngwenyi: “Pundu ngunambe kuli yenu ngwami, profeta niumwe keshi kumutayiza mu mbonge yenyi. 25 Alioze ngunanulweze pundu ngwami: Mwapwile tuliwa anji mu Izalele ha matangwa ja Eliya, muze lilu lialiyikile ha miaka yitatu ni tukweji asambano, mu chifuchi chacho yimupwa zala yinji. 26 Chipwe chocho, Eliya kakamutumine kuli niumwe wa kuli tuliwa jacho, alioze wika kuli tuliwa wa ku Sarepeta ku chifuchi cha Sendone. 27 Kwapwile nawa akwa-mbumba anji mu Izalele ha matangwa ja profeta Elisha, alioze niumwe wa kuli ayo kakamupemesene,* shina wika Naamane Ka-Seria.” 28 Mba eswe waze te anevu yuma yino mu sunangonga, yevwa uli unji, 29 yakatuka, yamumbulumuna ndo haze lia mbonge, yamutwala ku sesa lia mulundu haze atungilile mbonge yo, hanga amumbile mu chimbongo. 30 Alioze Yesu yapalika ndusu mukachi ko, yaya kwenyi.
31 Mba iye yaya ku Kafwanaume, yimwe mbonge ya Ngalileya. Yaputuka kwalongesa ha Sambata. 32 Atu alishimwokene ha chize iye apwile ni kulongesa, mumu kahanjikile ngwe mutu yoze uli ni wata. 33 Mu sunangonga mwapwile umwe lunga ni spiritu ya luchisa, umwe ndemoniu, iye yakololoka ni liji linene ngwenyi: 34 “Aa! Yika twakulinga mba utupinjise, Yesu Ka-Nazare? Shina weza ni kutunongesa nyi? Yami ngunakunyingika kanawa: Uli mwe Musandu wa Zambi!” 35 Alioze, Yesu yamukanjisa ngwenyi: “Hola, tuhuka muli iye.” Mba muze halimbula mwe lunga hashi mukachi ko, ndemoniu yatuhuka muli iye chakuhona kumulemeka. 36 Mumu lia chino, atu eswe yakomoka ni kuputuka kwamba kuli umwe ni mukwo ngwo: “Maliji wano amutapu uka? Mumu iye kanambe ni chiyulo ni ndundo kuli maspiritu a luchisa hanga atuhuke, o kanatuhuka!” 37 Kashika, sango hakutwala kuli iye yijilimwanga mu chifuchi cheswe.
38 Muze Yesu hatuhuka mu sunangonga, yanjila mu zuwo lia Semone. Naye-weno ya Semone te kanayiji kachiki munji, mba ayo yeta kuli Yesu hanga amukwase. 39 Iye yamuhetamina, yakanjisa kachiki, mba kachiki yamuhwa. Hazehene yakatuka, yaputuka kwaluliekela kulia.
40 Alioze ha chingoloshi, atu eswe apwile ni mieji waze te ayiza misongo yeka ni yeka, yaaneha kuli iye. Yesu yasa moko hali mutu ni mutu ni kwawuka. 41 Chikwo nawa, andemoniu atuhukile muli atu anji ni kukololoka ngwo: “Yena uli Mwana wa Zambi.” Alioze iye yaakanjisa, kaechele hanga ahanjike, mumu ayo te kananyingika ngwo, iye kali Kristu.
42 Muze hikwacha, iye yatuhuka, yaya ku chimwe chihela hanga atwame ukawenyi. Alioze mbunga yamufupa, mba yamuwana kuze te ali, yeseka kumukinda hanga ahone kwahichika. 43 Alioze iye yaalweza ngwenyi: “Natamba kwambujola nawa sango jipema ja Wanangana wa Zambi mu mambonge akwo, mumu kangutumine ha chikuma chino.” 44 Chocho, iye yanunga ni kwambujola mu masunangonga a mu Yundeya.