“Yetu Uno! Tutume Kama Yetu!”

Ndumbu Jack ni Marie-Line, kaputukile mulimo wa mashimbu eswe ha mwaka 1988. Ayo te kakutayiza mulimo weswawo apwile ni kwaha ku Guadalupe ni ku Guiana Francesa. Mutango wa ku França, we wakusongwele mulimo mu mbonge jino jaali. Manenu tuhule hakehe ndumbu Jack ni Marie-Line.

Yika yanukolwezele kuputuka mulimo wa mashimbu eswe?

Marie-Line: Ngunakakolela mu mbonge ya Guadalupe, te nakwambujola chinji ni mama, iye kapwile ni kwambujola chinji. Nakuzanga chinji atu, kashika, muze nahwishile shikola, ha mwaka 1985, yinguputuka mulimo wa pionelu.

Jack: Muze te nguchili mukweze, mu chikungulwila chetu mwapwile mapionelu anji waze te akuzanga chinji kwambujola. Ha mashimbu akunanga ku shikola, te nakukalakala ngwe pionelu wa mashimbu akehe. Ha poso jimwe, te twakukwata kalela hanga tuye ni kwambojola ni mapionelu mu njiza jo. Te twakwambujola ha tangwa lieswe, mba chingoloshi mutuya ni kuheha ku kalunga-lwiji. Mashimbu jacho kapwile apema chinji!

Muze nalimbachile ni Marie-Line ha mwaka 1988, yingunyonga ngwami, kukushi niyimwe yize yinatukwika kwambujola chinji, kashika munguhasa kukalakala chinji mu mulimo wa kwambujola. Ha chino, yingulichinga ni Marie-Line mu mulimo wa pionelu. Hakupalika cha mwaka umwika, muze te hitwaya ku shikola ya mapionelu, mba yatutuma hanga tuye ni kukalakala ngwe mapionelu alipwila. Mu Guadalupe katuhele yiteli yinji yize tunakawahilila nayo muze te kanda achitutuma ku Guiana Francesa.

Tunanyingika ngwetu nwatambwile yiteli yeka ni yeka. Yika yanukwashile kutayiza yiteli yacho yaha?

Marie-Line: Mandumbu a ku mutango wa Guiana Francesa te kananyingika chisoneko chize twakuzanga chinji, Izaia 6:8. Kashika, muze te akutusanyika, kapwile ni kutuhula mu miselo ngwo, “Nunewuluka chisoneko chize nwazanga chinji?” Muze te twakwivwa chocho, te twakunyingika ngwo, matwaha chiteli chaha. Ha chino, te twakukumbulula mu miselo ngwetu: “Yetu uno! Tutume kama yetu!”

Kutwakapwile ni kutesa yiteli, mumu nyi mutuchilinga, te tuchi kuwahilila ni yiteli yikwo yize matwaha. Twapwile ni kulikolweza hanga tulinge usepa ni mandumbu a mu ngiza yize apwile ni kututuma.

Jack: Mandumbu amwe kakazangile hanga twahichike, mumu te kanafupu hanga tupwe no hakamwihi. Alioze, muze twakatukile mu Guadalupe umwe ndumbu yatwiwulula maliji a Yesu ali ha Mateu 13:38 anambe ngwo: “Munda hehano hashi.” Kashika, muze apwile ni kututuma hanga tukalakale ku chihela cheka, te twakuliwulula yetwene ngwo, chipwe ngwe tuli kuma kweka, nihindu tunakalakalila mu ngiza yimuwika. Chuma chilemu te kukwasa atu waze ali mu ngiza yacho!

Muze twapwile ni kuheta mu ngiza yaha, te twakumona chize atu jamo awahilila. Ni yetu twapwile ni kusa tachi hanga tutwame ngwe ayo. Chipwe ngwe kulia cho chalisa, nihindu te twakulia yize ayo akulia, ni kunwa meya waze ayo akunwa. Alioze, twapwile ni kusa tachi hanga tulifunge. Nawa twapwile ni kulikolweza hanga tuhanjike yuma yipema hakutwala ku chiteli cheswecho akutwaha mu ululikiso wetu.

Marie-Line: Twalilongesele yuma yinji kuli mandumbu a mu ngiza yaha. Ngunewuluka yimwe yuma yalingiwile ku Guiana Francesa muze twaheteleko. Te kunanoka vula munji, kashika, yitunyonga ngwetu, kota mutushimbwila ndo haze vula mapatuka mba tuye ni kwambujola. Alioze, umwe ndumbu wa pwo yanguhula ngwenyi: “Mutuhasa kuya?” Yingukomoka, ni kumuhula ngwami: “Kuwamwene vula?” Iye yangukumbulula ngwenyi: “Lifuke sapilinya ye, nawa nyina ha kinga hanga tuye.” Yingulilongesa kukwata sapilinya aku ngunendesa kinga. Nyi chakalilongesele kukwata sapilinya aku ngunendesa kinga ha tangwa liacho, kachi te chishi kuhasa kwambujola ha mashimbu a vula!

Tunanyingika ngwetu, hinunaluka yisuho 15. Yika munuhasa kulweza akwenu hakutwala ku kwaluka?

Marie-Line: Kwaluka mashimbu eswe chakuhongesa. Chili chilemu kupwa ni zuwo lia kuhwimina muze muhiluka mu munda.

Jack: Muze te twakwalukila mu zuwo lieka, te nakuzanga kukwitamo ulombo. Muze mandumbu ku Mbetele te akunyingika ngwo, tuchi kushimbula chinji kuze atutuma, te kakungulweza ngwo, “Jack, mu zuwo lize mununjila, kanda ukwitamo ulombo!”

Mukwetu-pwo Marie-Line, hanalilongesa kanawa kulongeza ni kulongolola yikashi! Muze akulongeza yikashi, kakusoneka jina lia hita chikashi ni haze muchipwa, ngwe “mukumba,” “muchipatulo” hanji mu “chisambwe.” Kashika, muze twakuheta mu zuwo liaha, chakupwa chashi kusa hita chikashi mu chihela chacho. Marie-Line kakusoneka nawa hita chuma chili mu mushete. Chino chakukwasa kuwana kawashi chikashi chize tunafupu.

Marie-Line: Hitunalilongesa kulilulieka kanawa, kashika tushi kupinda chinji.

Kuchi nwakuhasa kupwa ni mashimbu mba nulinge mulimo wa kwambujola?—2 Timo. 4:5.

Marie-Line: Liakasoka, twakuhwima ni kululieka ku kunguluka. Twakuputuka mulimo wa kwambujola liamaali.

Jack: Tunanyingika ngwetu, hanatese ma ola waze twatamba kuhana ku songo lia kakweji, alioze kutushi kulihulikila ha ma ola. Chuma chilemu chinji ku mwono wetu chili kwambujola. Muze twakukatuka ku zuwo, twakweseka kuhanjika ni atu eswe waze twakulitakana no mu jila.

Marie-Line: Chakutalilaho, muze twakuya ni kuheha, nakumbata tumikanda. Atu amwe muze akutumona, kakutwita mikanda chipwe ngwe kutwalwezele ngwo tuli Yela ja Yehova. Kashika twakusa tachi hanga tuzale mahina waze analite ni kusolola yitanga yipema. Atu kakulihulikila ha yuma yino.

Jack: Kupwa chilweza chipema, chakutukwasa kwambujola kuli enyembo jetu. Nakutongona yiswaswa, ni kukomba mafwo waze akuholokela mu jila ha mukala wetu. Muze enyembo akungumona, kanji-kanji kakunguhula ngwo: “Shina uli kama ni Mbimbiliya hanga ungwehe?”

Tunanyingika ngwetu, hinunayi ni kwambujola ku yihela yinji kuze kunafupiwa ukwaso. Shina kuli chihela chize nunakazanga chinji?

Jack: Ku Guiana, chakukaliwa kuheta ku yimwe yihela. Ha mashimbu amwe, te twakulinga poso yamuundu mu jila ni kwenda tando 600 mu matapalo amena-mena. Tangwa limwe yituya ku Saint-Élie, kamwe kachihunda katwama mu usaki wa amazônia, twevwile chiseke chinji! Twendele ma ola anji mu mashinyi ni mu wato mba tuheteko. Atu anji waze atwama mu kachihunda kacho, kali akwa-kufula oru. Amwe yazanga chinji mikanda, ha chino, yatwaha oru ngwe milambu! Ha ufuku yitwasolwela yimwe yinema ya mu ululikiso wetu. Atu anji apwileho.

Marie-Line: Jack kanakamusanyika hanga ahanjike pande ha Chiwanyino cha Kwiwuluka Kufwa cha Yesu ku chihunda cha Camopi. Ha kuyako, yitwenda ma ola awana mu wato mu lwiji Oiapoque. Tunakawahilila chinji.

Jack: Hakachi ka lwiji, mikanya ya meya yakupwa ni tachi jinji, nawa muyihasa kuhungumuna wato. Munguhasa kwamba ngwami, chili chikomokeso ha kumona chize meya akwiza ni tachi jinji hanga ahungumune wato. Mukwa-kwendesa wato katamba kunyingika kanawa yize analingi. Chipwe chocho, tunakazanga chinji. Ha chiwanyino chacho, hanakapwa atu 56, alioze Yela ja Yehova te asambano wika.

Marie-Line: Mukweze yoze unazange kulihana chinji mu mulimo wa Yehova, neye mahasa kuwahilila ngwe chize yetu tunakawahilila. Ha mashimbu jacho, yena watamba kujikijila muli Yehova, nawa ufulielo we muukola chinji. Kanji-kanji te twakumona chize Yehova anatukwase.

Nunakalilongesa malimi anji. Shina nwasemukine ni chawana chino?

Jack: Ka, twakasemukine nacho. Tunakalilongesa malimi hanga tukwase atu. Limwe tangwa yingusongwela longeso lia Kaposhi wa Kutalila mu limi lia sranantongo,a shimbu te kanda achingwaha chihanda cha kutanga Mbimbiliya mu limi liacho! Muze nahwishile, yinguhula kuli umwe ndumbu hanga ngunyingike nyi nasongwela kanawa. Yakumbulula ngwenyi: “Maliji amwe katulumbunukine, alioze, longeso liawaha chinji.” Twanuke e apwile ni kutukwasa chinji. Makulwana te keshi kutulweza muze tunavuluka chipi amwe maliji, alioze twanuke te kakutulweza. Tunakalilongesa yuma yinji kuli twanuke.

Marie-Line: Mu ngiza yimwe, napwile ni longi a Mbimbiliya waze te akulilongesa mu Francês, Putu ni Sranantongo. Umwe ndumbu wa pwo yangulweza ngwenyi: “Muze unayi ni kusongwela longeso kuli alongi je, putuka ni waze akuhanjika limi lize kuwanyingikine kanawa, mba muhwisa ni waze akuhanjika limi lize unanyingika kanawa.” Kulutwe mba yingunyingika ulemu wa chiyulo chacho.

Tangwa limwe, te mungulilongesa ni alongi aali, mutangu te malilongesa mu Sranantongo, wamuchaali mu Putu. Muze te ngunalilongesa ni wamuchaali, ndumbu yoze watuhukile ni yami yamba ngwenyi: “Marie-Line, ngunamono ngwe unapinji ni yimwe.” Hazahene yingunyingika ngwami, ngunasongwela longeso mu Sranantongo kuli longi yoze te wakuhanjika Putu!

Kakunuzanga chinji kuli mandumbu a mu yikungulwila yize nunakapwa. Yika yakunukwasa kupwa ni usepa upema ni mandumbu?

Jack: Mukanda wa Yishima 11:25 unambe ngwo: “Chihanyi kumapwa pichi.” Twakuzanga chinji kupwa ni mandumbu jetu ni kwakwasa. Ha mashimbu amwe, nakukwasa kululieka Zuwo lia Wanangana, nawa mandumbu amwe kakungwamba ngwo: “Kanda ulinga mulimo uno, echela akwa-kwambujola.” Alioze, nakwakumbulula ngwami: “Ni yami nguli mukwa-kwambujola. Kashika, nyi kuli umwe mulimo, ni yami natamba kuulinga.” Kwamba pundu, tulieswe twakuzanga kuhwima, alioze twakusa tachi hanga kuhwima chetu chihone kutukinda kukwasa akwetu.

Marie-Line: Twakusa tachi hanga tusolole kuli mandumbu ngwo twakwazanga. Chakutalilaho, nyi umwe ndumbu kanafupu mutu yoze maya ni kusaka ana jenyi ku shikola, twakulihana hanga tuye ni kwasaka. Yino ye yakutukwasa mba tupwe ni usepa upema ni mandumbu. Twakwakwasa muze anafupu ukwaso.

Yiwape yika nwazuka ha kukalakala kuze kunafupiwa chinji akwa-kwambujola?

Jack: Twakuwahilila chinji ha kupwa mu mulimo wa mashimbu eswe. Twapwile ni uhashi unji wa kutala yitangiwa yinji ya Yehova. Twakupwa ni kapinda, alioze tuli ni sambukila ya ku mbunge, mumu tunanyingika ngwetu, Zambi kakutukwasa.

Muze te nguchili mukweze, kangusele mu zuwo lia ususu ku Guiana Francesa ha mukunda wa kulituna yuma ya mafwefwe. Te chishi kunyonga ngwami, tangwa limwe mungufunako ngwe mishionaliu ni kungutayiza hanga nguye ni kwambujola kuli waze ali mu zuwo lia ususu. Yehova kakusolola ngwo kali chihanyi mupema ha yiwape yize akutwaha!

Marie-Line: Kukwasa akwetu, chakungwaha uwahililo unji. Twakuwahilila chinji ha kupwa mu mulimo wa Yehova. Chino chakutukwasa nawa hanga tupwe ni usepa upema mu ulo wetu. Ha mashimbu amwe, Jack kakungulweza ngwenyi: “Ndumbu nganji ni mukwo-pwo, kananenganyana. Mutuhasa kwasanyika hanga tulie no hamuwika?” Kanji-kanji nakukumbulula ngwami: “Ewa, ni yami che te ngunanyongo!” Chenacho twakulinga.

Jack: Matangwa wano ene, kangulweza ngwo, nguli ni câncer ya próstata. Marie-Line keshi kuzanga kuchivwa, chipwe chocho nakumulweza ngwami: “Zangi yami, chipwe ngwe mungufwa hamene, chichi kufwa ni “ushinakaji upema.” Alioze mungufwa ni chiseke, mumu ngunanyingika ngwami, nalingila Zambi ku mwono wami weswe, chino che chekunguvwisa kuwaha.”—Upu 25:8.

Marie-Line: Yehova katukwasa kulinga yuma yinji yize te kutushi kushinginyeka ngwo mutulinga. Yuma yinji yipema yalingiwa ku mwono wetu. Yetu twakujikijila muli Zambi, nawa kweswako ululikiso wenyi muututuma, kwenako mutuya!