Yihula ya Waze Akutanga Mikanda Yetu

Ka, hi chocho ko. Versu yino yinahanjika hali mutu yoze wakupalika mu yeseko yeka ni yeka, chipwe chocho makatuka hanji manyongonona.

Tutangenu lusango mweswe: “Ena chingulungulu kanda ujikinyina zuwo lia mukwa ululi; kanda upupa muma mwenyi mwa kuhwimina. Mumu mukwa ululi makalimbuka yisuho shimbiali hindu makatuka nawa; alioze yingulungulu kakwanungwina mu lamba. Kanda uwahilila ha kulimbuka cha mukwa kole ye; mbunge ye kanda yiwaha muze mamununguna.”—Yishi. 24:15-17.

Atu amwe kakunyonga ngwe versu 16 yakuhanjika hali mutu yoze walinga shili, malikonyeka mba mapwa nawa ni usepa upema ni Zambi. Chakutalilaho, amwe mangana a yingeleja, a mu Inglaterra yasoneka ngwo, “chize ku mashimbu akunyima, atu anji che akulumbununa versu yacho.” Yamba nawa ngwo, chino chakutwala atu anji anyonge ngwe, “mutu mupema mahasa kulinga shili yinene ha yisuho yinji, alioze kechi kutokesa usepa wenyi ni Zambi mumu kakwita ukonekeno.” Nyonga lino mulihasa kupemena mutu yoze wakuzanga kulinga shili hanga anunge ni kuyilinga, ni kunyonga ngwenyi, chipwe malinga shili yacho ha yisuho yinji, nihindu Zambi mamukonekena.

Alioze, versu 16 kuyishi kuhana ulumbunwiso wacho.

Mu Hepreu, liji “kulimbuka,” hanji kuholoka lili ha versu 16 ni 17 mahasa kulizachisa mu majila alisa. Chakutalilaho, liji liacho mahasa kulizachisa muze ngombe akulimbuka mu tapalo, muze mutu akuholoka ha fulumba hanji muze liwe liakuholoka hashi. (Shimbi 22:4, 8; Amo. 9:9) Liji liacho mahasa kulizachisa nawa mu jila yeka ngwe chize Mbimbiliya yinambe ngwo: “Yehova kakukolesa ngano ja mutu; kakuwahilila mu jila yenyi. Chipwe malimbuka kechi kulilamba hashi liakulu, mumu Yehova kakumukwata ku kwoko.”—Samu 37:23, 24; Yishi. 11:5; 13:17; 17:20.

Haliapwila tutalenu yize longeshi Edward ambile, ngwenyi: “Mu Hepreu, liji [“kulimbuka”] keshi kulizachisa muze mutu akulinga shili.” Kashika, longeshi mukwo yamba hakutwala ku versu 16 ngwenyi: “Chili chamokomoko kuhungumiona atu ja Zambi, mumu manunga ni kunyongonona, alioze, yingulungulu ka!”

Ewa, yuma yeswe twamona hano yinatwehe shindakenyo ngwetu, liji “kulimbuka” anatongola ha Yishima 24:16, kuliatalile ha kulimbuka cha mutu yoze walinga shili. Alioze, linatale ha kunyongonona chipwe muze tunapalika mu yipikalo ha yisuho yinji. Mu chifuchi chino chipi cha Satana, mukwa-ululi mahasa kupinda ni misongo hanji ni yuma yeka-ni-yeka. Mahasa kumuhungumiona kuli manguvulu mumu lia ufulielo wenyi. Alioze, mahasa kufuliela ngwenyi, Zambi kali hamwe nenyi, mamukwasa kukumba yipikalo yacho. Kunyonga ha chize Yehova akwashile tuvumbi twenyi kukumba yipikalo yo, chakukwasa chinji. Mumu liaka? Mumu tuli ni shindakenyo ngwetu, “Yehova kakujikijisa waze eswe akulimbuka. Kakuhetula waze eswe anafumbama.”—Samu 41:1-3; 145:14-19.

“Akwa ululi” keshi kuwahilila muze akwo akumona lamba. Alioze, kakutakama mumu kananyingika ngwo, “waze mavwila woma Zambi, kumakawaha.”—Chilu. 8:11-13; Yombi 31:3-6; Samu 27:5, 6.