LONGESO 15
Yesu Iya?
Yesu kali umwe wa kuli atu waze akwete lufuma munji. Atu anji kananyingika jina lienyi, alioze kanyingikine yuma yinji hakutwala kuli iye. Eka nawa kakwete manyonga alisa hakutwala kuli Yesu. Yika Mbimbiliya yakwamba hakutwala kuli iye?
1. Yesu iya?
Yesu kali umwe mungelo wa ndundo yoze watwama mu malilu. Iye, mwe Yehova Zambi aliangile kutanga shimbu te kanda atanga yuma yikwo. Kashika akumuvuluka ngwo, “iye mutangu wa yuma yeswe.” (A-Kolosu 1:15 MW 1970) Mbimbiliya yakuvuluka Yesu ngwo, ‘mwana wa wika’ wa Zambi mumu ha kumutanga Zambi kapwile ukawenyi. (Yoano 3:16) Yesu kakalakalile hamuwika ni Tato, Yehova, ni kumukwasa kutanga yuma yikwo yeswe. (Tanga Yishima 8:30.) Ndo musono, Yesu kakwete usepa ukolo ni Yehova. Yesu ni ushishiko weswe, kali mukwa-kumanyinako Yehova hanji ngwetu “Liji,” yoze wakwambujola sango ni usongwelo wa Yehova.—Yoano 1:14.
2. Mumu liaka Yesu ejile hano hashi?
Miaka 2.000 kunyima, Yehova kalingile chimwe chikomokeso. Yazachisa spiritu yenyi yisandu, yachiza mwono wa Yesu mu malilu ni kuusa mu jimo lia umwe pwo avuluka ngwo Maria yoze te kanda achilimona kama ni lunga. Hachino, Yesu yasemuka ngwe mutu. (Tanga Luka 1:34, 35.) Yesu kejile hashi hanga apwe Mesaya, hanji Kristu ni kukuula atu.a Yuma yeswe yize Yehova ambile hakutwala kuli Mesaya, yamanunukine hali Yesu. Chino chakwashile atu kunyingika Yesu ngwe “Kristu, mwe Mwana wa Zambi ya mwono.”—Mateu 16:16.
3. Kulihi Yesu ali musono?
Muze Yesu afwile, Yehova yamuhindwisa ngwe mungelo ni kuhiluka mu malilu. Mba “Zambi hanamunangamisa chikolo” mu malilu. (A-Fwilipu 2:9) Musono, Yesu kali mungelo wa ndundo jinji. Yehova wika mwe wamuhiana.
NYINGIKA NAWA
Nyingika nawa hakutwala kuli Yesu ni mumu liaka chili chilemu kumunyingika.
4. Yesu hi Zambi Mukwa-Ndundo-Jeswe ko
Mbimbiliya yakulongesa ngwo, chipwe ngwe Yesu kali mungelo wa ndundo mu malilu, nihindu iye kakwononokena Zambi yenyi kanda Tato, Yehova. Mumu liaka mutuhasa kwamba chocho? Tala CHINEMA hanga umone yize Mbimbiliya yakulongesa hakutwala ku kalisa watwama hakachi ka Yesu ni Zambi Mukwa-Ndundo-Jeswe.
Yisoneko yino muyitukwasa kunyingika usepa watwama hakachi ka Yehova ni Yesu. Tanga hita chisoneko, mba nushimutwine yihula yinahateho:
Tanga Luka 1:30-32.
Yika mungelo ambile hakutwala ku usepa watwama hakachi ka Yesu ni Yehova Zambi “mwe Chitunda”?
Tanga Mateu 3:16, 17.
Yika liji liatuhukile mu malilu liambile ha upapachiso wa Yesu?
Ku nyonga lie, liji liacho liapwile liaya?
Tanga Yoano 14:28.
Kulita ni chisoneko, iya yoze wahiana mukwo, shina tata nyi mwana?
Yika Yesu ambile kwamba muze asanyikine Yehova ngwenyi Tata?
Tanga Yoano 12:49.
Shina Yesu kakunyonga ngwenyi iye ni Tato kali mutu umuwika? Yika ena wakunyonga?
5. Yuma yize yasolwele ngwo Yesu mwe Mesaya
Mu Mbimbiliya muli uprofeto unji uze wakwashile atu kunyingika Mesaya—yoze Zambi asakwile hanga alamwine atu. Tala CHINEMA hanga umone uprofeto umwe uze wamanunukine hali Yesu muze ejile hano hashi.
Tanga uprofeto uno mu Mbimbiliya, mba nushimutwine yihula yinahateho:
Tanga Mika 5:2 hanga unyingike kuze Yesu te masemukina.b
Shina kusemuka cha Yesu chamanunwine uprofeto uno?—Mateu 2:1.
Tanga Samu 34:20 ni Zekaria 12:10 hanga umone yize Mbimbiliya yaliangile kwamba hakutwala ku kufwa cha Mesaya.
Shina uprofeto uno wamanunukine?—Yoano 19:33-37.
Kuchi wanyonga, shina Yesu mwe walingishile yuma hanga uprofeto uno umanunuke?
Yika yino yinasolola hali Yesu?
6. Twakuyuka chinji ha kulilongesa hakutwala kuli Yesu
Mbimbiliya yakwamba ngwo, chili chilemu chinji kulilongesa hakutwala kuli Yesu ni ha mulimo wenyi. Tanga Yoano 14:6 ni 17:3, mba nushimutwine chihula chino:
Mumu liaka chili chilemu kulilongesa hakutwala kuli Yesu?
Yesu kazulwile jila hanga tupwe masepa ja Zambi. Kalongesele umwenemwene hakutwala kuli Yehova. Chikwo nawa, kupalikila muli iye mutuhasa kuzuka mwono wa mutolo
ATU AMWE KAKWAMBA NGWO: “Yela ja Yehova keshi kufuliela muli Yesu.”
Kuchi muhasa kukumbulula?
YIZE WALILONGESA
Yesu kali mungelo wa ndundo. Iye mwe Mesaya, Mwana wa Zambi.
Kuhitulula
Mumu liaka Yesu akumuvuluka ngwo, “iye mutangu wa yuma yeswe”?
Yika Yesu alingile shimbu te kanda eza hano hashi?
Kuchi tunanyingika ngwetu Yesu mwe Mesaya?
HENGWOLA NAWA
Lilongese nawa mumu liaka tunanyingika ngwetu Yesu mwe Mesaya.
“Shina Uprofeto Wakusolola Ngwo Yesu Mwe Mesaya?” (Lusango wa ha internet)
Nyingika nyi Mbimbiliya yakulongesa ngwo Zambi kasemene Yesu ngwe chizechene atu akusema ana jo.
“Mumu Liaka Yesu Akumuvuluka Ngwo Mwana wa Zambi?” (Lusango wa ha internet)
Nyingika mumu liaka longeso lia Tuzambi Atatu kulishi kulita ni yize Mbimbiliya yakulongesa.
“Shina Yesu mwe Zambi?” (Kaposhi wa Kutalila 1 wa Abril, 2009)
Nyingika chize mwono wa umwe pwo walumukine muze ahengwile yize Mbimbiliya yakwamba hakutwala kuli Yesu.
“Umwe Pwo Ka-Yunda Kanalumbununa Mumu liaka Aalumwine Ufulielo Wenyi” (Laulenu!, wa Maio 2013)
a Malongeso 26 ni 27 makasolola mumu liaka atu anafupiwa ukuule ni chize Yesu atukulile.
b Tala Maliji Akusongo 2 hakutwala ku uprofeto uze wahanjikile ha mashimbu waze Yesu te meza hashi.