‘Kaula Kanawa mu Ngano ja Yesu’

1-2. Mu mutapu uka Yesu ali kasongo ketu? Hana chilweza.

ACHINYONGA ngwe, yena ni amwe masepa je nunalingi wenyi kuma kuze kwalihola, kuli ponde ni lusenga. Yenu nuli ni ukwaso wa umwe yoze unanusongwela. Muze anende iye mahichika ngano hanji yiliato yenyi mu lusenga. Munuheta hamwe, hi kunushi kumona nawa mutu yoze unanusongwela! Chipwe chocho, yenu kunuchi kwivwa woma. Shimbu nwivwe woma, yenu munukaula kanawa mu ngano ja kasongo!

² Chizechene nawa, yetu akwa-Kristu, tunalingi wenyi mu chihela chize chalihola nawa cha ponde—hano hashi hapi. Chipwe chocho, Yehova hanatwehe kasongo mungunu—Mwanenyi, Yesu Kristu. Kashika mutuhasa kukaula kanawa mu ngano jize Yesu ahichikile. (1 Petu. 2:21) Mukanda umwe wakulumbununa Mbimbiliya unahanjika ha versu yino ngwo, Petulu katesele Yesu ni umwe kasongo. Chizechene ngwe umwe kasongo akuhichika ngano hashi, Yesu kahichikile ngano jenyi hanga tujikaule. Ha mutwe uno, mutunyingika chize chinalumbunuka kukaula kanawa mu ngano ja Yesu ha kukumbulula yihula yino yitatu: Yika? Mumu liaka? Nawa Kuchi?

 3. Yika chinalumbunuka kukaula mu ngano ja umwe mutu?

³ Yika chinalumbunuka kukaula mu ngano ja umwe mutu? Mbimbiliya kanji-kanji yakuzachisa maliji “kwenda” ni “molu” hanga yilumbunune chize umwe mutu apwa ku mwono wenyi. (Uputu. 6:9; Yishi. 4:26) Chilweza chize mutu akuhichika, mutuhasa kuchitesa ni ngano jize iye akuhichika muze anende. Kashika, mutuhasa kwamba ngwetu, kukaula mu ngano ja umwe mutu chinalumbunuka kukaula chilweza chenyi ha kumwimbulula.

 4. Yika chinalumbunuka kukaula mu ngano ja Yesu?

⁴ Mba, kukaula mu ngano ja Yesu, yika chinalumbunuka? Mu maliji akehe, chinalumbunuka kwimbulula chilweza chenyi. Ha chisoneko chize hanakatuka mutwe uno, postolo Petulu te kanahanjika wika ha chilweza chipema chize Yesu ahichikile ha kunyongonona mu lamba. Alioze kuli majila anji waze mutuhasa kwimbulwilamo Yesu. (1 Petu. 2:18-25) Kwamba umwenemwene, mutuhasa kwimbulula chilweza cha Yesu, che kwamba yuma yeswe yize ambile ni yize alingile.

 5. Shina yihenge mahasa kwimbulula chilweza cha Yesu ni ungunu weswe? Lumbununa.

⁵ Yetu tuli yihenge. Shina mutuhasa kukaula chilweza cha Yesu? Ewa, mutuhasa. Twiwulukenu ngwetu, Petulu kakambile ngwenyi twatamba kukaula mu ngano ja Yesu ni ungunu weswe, alioze ngwenyi, mutuhasa “kwimbulula chilweza cha [Yesu] kulita ni uhashi wetu.” Nyi twachilinga, mutukaula chiyulo cha postolo Yoano chinambe ngwo: ‘Chanutamba kwenda chizechene ngwe [Yesu] endele.’—1 Yoa. 2:6.

6-7. Mumu liaka mutuhasa kwamba ngwetu, kukaula mu ngano ja Yesu chakutukundamisa kuli Yehova?

⁶ Kukaula mu ngano ja Yesu chakutukundamisa kuli Yehova. Mumu liaka mutuhasa kwamba chocho? Chitangu, Yesu kahichikile chilweza chipema cha chize evwishile Zambi kuwaha. (Yoa. 8:29) Kashika, nyi mutukaula mu ngano jenyi, mutuvwisa Yehova kuwaha. Nawa mutuhasa kupwa ni shindakenyo ngwetu, Tata yetu wa mu malilu, makundama kuli waze eswe akusa tachi hanga apwe masepa jenyi.—Tia. 4:8.

⁷ Chamuchiali, Yesu kembulwile Tato ni ungunu weswe. Kashika ahashile kwamba ngwenyi: “Yoze wangumona, hamona mwe Tata.” (Yoa. 14:9) Mutuhasa kwimbulula yitanga ya Yesu ni chize te akutwama ni akwo. Chakutalilaho, iye kanakevwila keke umwe mukwa-mbumba, yalisa mu chihela cha pwo yoze wapwile ni musongo upi, nawa yevwila keke atu waze afwishile asoko jo. Muze twakwimbulula Yesu, twakwimbulula nawa Yehova. (Marku 1:40, 41; 5:25-34; Yoa. 11:33-35) Kashika, nyi twembulula yitanga ya Yehova mutukolesa usepa wetu ni iye.

 8. Lumbununa mumu liaka kukaula mu ngano ja Yesu muchitukwasa ‘kukumba’ hashi.

⁸ Kukaula mu ngano ja Yesu chakutukwasa hanga tuchine kulaluka ni yuma ya hano hashi. Ha ufuku wenyi wa kasula hano hashi, Yesu kahashile kwamba ngwenyi: “Hingunakumbu hashi.” (Yoa. 16:33) Yesu kakakawile manyonga, yitanga ni yuma yize atu hano hashi akuzanga. Iye kakechele nichimwe chimupiangule ku yize yamunehene hano hashi—kukalila jina lia Yehova. Mba yika mutwamba hali yetu? Hano hashi hali yuma yinji yize muyihasa kutupiangula mu mulimo wetu kuli Yehova. Kashika, chizechene ngwe Yesu, twatamba kulihulikila ha kulinga upale wa Yehova. Nyi twachilinga, ni yetu mutuhasa kwamba ngwetu, ‘mutukakumba’ hashi.—1 Yoa. 5:5.

 9. Yika twatamba kulinga mba tununge mu jila yize yinatwale ku mwono wa mutolo?

⁹ Kukaula mu ngano ja Yesu muchitutwala ku mwono wa mutolo. Muze umwe mukweze pichi ahulile ngwenyi, kuchi munguhasa kuzuka mwono wa mutolo, Yesu yamukumbulula ngwenyi: “Tweya ungukaule.” (Mateu 19:16-21) Muze ahanjikile ni A-Yunda waze te keshi kutayiza ngwo iye kali Kristu, Yesu yamba ngwenyi: “Mapanga jami. . . kakungukaula. Ngunaahe mwono wa mutolo.” (Yoa. 10:24-29) Nawa muze ahanjikile ni Nikondemu umwe mukwa-kuyula mu chota cha A-Yunda, Yesu yamba ngwenyi: “Mweswawo mamufuliela” te mapwa “ni mwono wa mutolo.” (Yoa. 3:16) Kuchi twakusolola ngwetu, twakufuliela muli Yesu? Twakuchilinga ha kukaula malongeso jenyi ni kwimbulula chilweza chenyi. Nyi twachilinga, mutununga mu jila yize yinatwale ku mwono wa mutolo.—Mateu 7:14.

10. Yika twatamba kulinga mba ‘tunyingike’ kanawa Yesu? (Yoano 17:3)

¹⁰ Mba tukaule kanawa mu ngano ja Yesu, chitangu twatamba kulinga chimwe chuma. Chuma chika chanacho? Kumunyingika. (Tanga Yoano 17:3.) “Kunyingika” Yesu, chili chuma chize twatamba kununga ni kulinga. Twatamba kumunyingika kanawa, kunyingika yitanga yenyi, mutapu uze iye akunyonga ni shimbi jize akukaula. Chipwe ngwe tuli ni miaka yinji mu umwenemwene, nihindu twatamba kusa tachi hanga tununge ni “kunyingika” Yehova ni Yesu.

11. Yika yili mu mikanda yiwana ya Evanjelu?

¹¹ Mba atukwase kunyingika Mwanenyi, Yehova yasa mu Liji lienyi mikanda yiwana ya Evanjelu. Mikanda yacho, yili ni sango ja ku mwono wa Yesu ni mulimo wenyi wa kwambujola. Yakutulweza yize Yesu alingile ni yize ambile, nawa yakusolola chize apwile ni kwivwa. Ni ukwaso wa mikanda yino yiwana, ‘mutuzewula’ kanawa chilweza cha Yesu. (Hepre. 12:3) Mikanda yacho, yinasolola ngano jize Yesu anakatuhichikila. Kashika nyi tunazange kunyingika kanawa Yesu, twatamba kulilongesa mikanda yacho. Nyi twachilinga, mutuhasa kukaula kanawa mu ngano jenyi.

12. Yika twatamba kulinga mba tuyuke ha yize tunatange mu Evanjelu?

¹² Mba tuyuke ha sango jize jili mu Evanjelu, twatamba kulinga yuma yinji hi wika ko kujitanga. Twatamba kusa mashimbu hanga tulilongese kanawa ni kupukuna ha yize tunalilongesa. (Tala nawa Yoshua 1:8.) Mutumona yikuma yaali yize muyitukwasa kupukuna ha yize tunatange mu Evanjelu ni chize mutuhasa kuyikaula ku mwono wetu.

13. Kuchi muhasa kusa mwono ha sango ja mu Evanjelu?

¹³ Chitangu, sako mwono ha sango ja mu Evanjelu. Eseka kunyonga, kumona, kupanjika, ni kwivwa chize yuma yalingiwile. Chuma chize muchikukwasa kuchilinga chili kuhengwola. Ululikiso wa Yehova wakutwaha yuma yinji yize yakutukwasa hanga tulilongese. Chikwo nawa, hengwola yuma yize yalingiwile ha nyima ni kulutwe lia yuma yize unalilongesa. Fupa sango hakutwala kuli atu ni yihela yize anatongola ha lusango wacho. Tala chize sango jize unatange ajisonekene mu Evanjelu jikwo. Mumu muchihasa kupwa ngwe, mu Evanjelu jikwo, chisoneko chacho chili ni sango jinji jize mukwa-kusoneka mukwo kakasele.

14-15. Kuchi mutuhasa kukaula ku mwono wetu yuma yize tunalilongesa mu Evanjelu?

¹⁴ Chamuchiali, kaula ku mwono we yize unalilongesa mu Evanjelu. (Yoa. 13:17) Hanyima lia kulilongesa umwe lusango wa mu Evanjelu, lihule ngwe: ‘Shina kuli yimwe nalilongesa mu Evanjelu yino, yize munguhasa kukaula ku mwono wami? Kuchi munguhasa kuzachisa lusango yono hanga ngukwase umwe mutu?’ Eseka kunyonga hali mutu yoze mukwasa. Hanyima muze mupwa ha shimbu yalita, ni zango lieswe lweza mutu wacho yize walilongesa.

¹⁵ Tutalenu chilweza cha chize mutuhasa kukaula yikuma yino yaali. Mutulilongesa lusango wa tuliwa chiswale yoze Yesu amwene mu tembele.

16. Kulita ni Marku 12:41, yika yalingiwileko?

¹⁶ Sako mwono ha lusango. (Tanga Marku 12:41.) Eseka ku kunyonga yuma yize yalingiwileko. Yapwile ha tangwa 11 ya Nisane ya mwaka 33 M.J, muze te hikwasala matangwa akehe hanga Yesu amushihe. Yesu kanapalikisa matangwa anji ni kulongesa mu tembele. Alioze te kanamuhungumiona kuli mangana a uwayilo wa A-Yunda. Anji a kuli ayo, yaputuka kulimika nenyi hakutwala ku ndundo jize te analingi najo yikomokeso. Akwo yamuhula yihula yikalu yize apwile ni kunyonga ngwe kechi kuhasa kuyikumbulula. (Marku 11:27-33; 12:13-34) Hakupalika cha mashimbu, Yesu yaya ku sali likwo lia tembele. Ku sali liacho, iye te kanahase kumona mishete yakusela milambu. Kota kapwile ha chihela chize te akuvuluka ngwo, chihela cha mapwo. Iye katwamine, nawa yaputuka kutala atu waze te anase milambu mu mishete. Yamona pichi anji waze te anasemo mbongo jinji. Kota kapwile hakamwihi ni mishete, kashika apwile ni kwivwa zungo lia mbongo jize te anasemo.

17. Kulita ni Marku 12:42, yika umwe pwo tuliwa alingile?

¹⁷ Tanga Marku 12:42. Ha amwe mashimbu Yesu yamona umwe pwo. Iye te ‘tuliwa chiswale.’ (Luka 21:2) Mwono wenyi wapwile ukalu chinji, kota te chakumukalila kuwana yuma yize malikwasa nayo hita tangwa. Chipwe chocho, yaya ku umwe mushete, atu chakuhona kunyingika, iye yasamo tumbongo twaali. Mbongo jacho japwile jikepe chinji jize te kujichi kuhasa kuneha zungo muze mujinjila mu mushete. Yesu kanyingikine mbongo jize iye asele mu mushete, twapwile tumbongo twaali tukepe tuze ha mashimbu jacho te akuvuluka ngwo lépton. Mbongo jacho japwile ni ndando yikepe, kashika te keshi kuhasa kujilanjila chipwe kajila umuwika yoze wapwile ni ndando yikepe ha mashimbu jacho.

18. Kulita ni Marku 12:43, 44, yika Yesu ambile hakutwala ku mulambu wa tuliwa?

¹⁸ Tanga Marku 12:43, 44. Yesu kakomokene chinji ha yize tuliwa yono alingile. Chocho yasanyika tumbaji twenyi, yamika kuze kuli tuliwa ni kwalweza ngwenyi: “Yono twamishi chiswale kambilamo kuhiana waze eswe ambila mu chikasa cha milambu.” Mba yalumbununa ngwenyi: “Eswe [chipi-chipi pichi] kanambilamo cha ku kulumbama cho; alioze iye cha ku kuhona chenyi hambilamo cheswe ali nacho, te yikumba yenyi yeswe.” Muze tuliwa yono washishika asele mbongo jenyi jeswe mu mushete wa milambu, iye nawa kasele mwono wenyi weswe mu moko ja Yehova.—Samu 26:3.

19. Longeso lika twawana ha maliji a Yesu hakutwala kuli tuliwa chiswale?

¹⁹ Kaula lusango wacho ku mwono we. Lihule ngwe, ‘Yika munguhasa kulilongesa ha maliji a Yesu hakutwala kuli tuliwa chiswale?’ Achinyonga ndambu hali tuliwa wacho. Iye kota kazangile kuhana yuma yinji kuli Yehova. Alioze kalingile yeswe yize te mahasa. Yahana kuli Yehova yuma yeswe yize apwile nayo. Yesu kanyingikine ngwenyi, kuli Yehova mulambu wenyi wapwile ulemu chinji. Hano twawanaho limwe longeso lilemu. Yehova kakuwahilila chinji, muze twakulihana hanga tumulingile ni mwono wetu weswe ni mbunge yetu yeswe. (Mateu 22:37; Kolo. 3:23) Yehova kakuwahilila chinji muze akumona mutulinga yeswe yize mutuhasa mu mulimo wenyi! Chino chinatale ha mashimbu ni tachi jize twakusa hanga twambujole sango lipema, tuye ku kukunguluka ni kulinga chuma cheswacho hanga tumuwayile.

20. Kuchi muhasa kukaula ku mwono we yize walilongesa ha lusango wa tuliwa? Hana chilweza.

²⁰ Kuchi muhasa kukaula ku mwono we lusango wa tuliwa? Nyonga hali mandumbu waze wanyingika. Hanji amwe a kuli ayo kananenganyana mumu kananyongo ngwo, keshi kuhasa kulinga nawa yuma yinji mu mulimo wa Yehova. Chakutalilaho, hanji unanyingika umwe kashinakaji yoze wayiza, nawa keshi ni tachi ja kukalakala chinji mu mulimo wa kwambujola ngwe chize apwile ni kulinga. Mumu lia chino, iye mahasa kulivwa ngwe keshi nawa ni ulemu. Hanji unewuluka umwe ndumbu, yoze ukwete musongo uze kuushi kuya. Amu keshi kuhasa nawa kukunguluka ku Zuwo lia Wanangana, iye mahasa kunenganyana ha mukunda wa chino. Yika muhasa kulinga? Hanjika nenyi liji “lipema lia kukolesa.” (Efwe. 4:29) Shimutwina nenyi malongeso apema waze ali ha lusango wa tuliwa chiswale. Nyi wachilinga, mumukwasa hanga apwe ni shindakenyo ngwenyi, Yehova kakuwahilila muze twakumwaha yize mutuhasa chipwe ngwe yuma yacho muyisoloka ngwe yili yikehe. (Yishi. 15:23; 1 Tesa. 5:11) Nyi wachichimieka mandumbu wano ha tachi jize akusa hanga alingile Yehova, musolola ngwo unakaula kanawa mu ngano ja Yesu.

21. Yika unazange kulinga?

²¹ Twakusakwilila chinji ha kunyingika ngwetu, mu Evanjelu muli yuma yinji hakutwala ku mwono wa Yesu. Mikanda yacho yakutukwasa kwimbulula Yesu ni kukaula kanawa mu ngano jenyi! Muhasa kulinga katalilo hanga ulilongese sango ja mu Evanjelu ha longeso lie lia wika, hanji ha Uwayilo wenu wa mu Usoko. Kanda tuvulama ngwetu, mba tuyuke ha kulilongesa Evanjelu, twatamba kusa mwono ha sango jacho ni kujikaula ku mwono wetu. Alioze kutwatambile wika kwimbulula yize Yesu alingile, twatamba nawa kupanjika yize iye ambile. Ha mutwe uze muusulaho, mutumona yize mutuhasa kulilongesa ha maliji akasula a Yesu muze apwile hano hashi.