Muhasa ‘Kuzula Utu Ukulu’

 1. Kuchi mwono we wapwile muze te kanda uchililongesa MbimbilIya?

KUCHI mwono we wapwile muze te kanda uchiputuka kulilongesa Mbimbiliya ni Yela ja Yehova? Anji a kuli yetu kutushi kuzanga kwiwuluka chize mwono wetu wapwile. Yuma yize akwa-hashi akwamba hakutwala ku chipi ni chipema te yakupiangula manyonga ni yitanga yetu. Hachino, ‘te kutalatala kutushi nacho, twapwile kutushi ni Zambi hano hashi.’ (Efwe. 2:12) Alioze, longeso lia Mbimbiliya yilialumuna mwono wetu!

 2. Yika wanyingikine muze waputukile kulilongesa Mbimbiliya?

² Muze waputukile kulilongesa Mbimbiliya yiunyingika ngwe, kuli umwe Tata wa mu malilu yoze wakukuzanga chinji. Yiunyingika nawa ngwe, nyi unazange kuvwisa Yehova kuwaha ni kupwa mu usoko wenyi, watamba kwalumuna mwono we, mulali uze wakumwenamo yuma ni chize wakunyonga. Walilongesele nawa kulinga yize Yehova akuzanga ni kwehuka yize keshi kuzanga.—Efwe. 5:3-5.

 3. Kulita ni A-Kolosu 3:9, 10, yika Yehova anazange hanga tulinge, nawa yika mutumona ha mutwe uno?

³ Yehova kali Tata nawa Tangi yetu. Kashika, kali ni ulite wa kulweza asoko jenyi yize atamba kulinga ni yize katambile kulinga. Nawa shimbu kanda achitupapachisa, iye kakutwita hanga tuzule ‘utu ukulu hamwe ni yilinga yawo.”b (Tanga A-Kolosu 3:9, 10.) Mutwe uno muukwasa waze anazange kutambula upapachiso hanga akumbulule yihula yino yitatu: (1) ‘Utu ukulu’ yika unalumbunuka? (2) Mumu liaka Yehova anazange hanga tuuzule? (3) Kuchi mutuhasa kuchilinga? Mutwe uno muukwasa nawa waze hanapapachisa hanga ehuke manyonga ni yitanga ya utu ukulu.

 4. Yitanga yika akusolola mutu yoze ukwete ‘utu ukulu’?

⁴ Mutu yoze ukwete ‘utu ukulu,’ kanji-kanji kakunyonga ni kulinga yuma ya musunya. Iye mahasa kupwa ni kuzo, kaleleso, kulizata ni kulivutula ni kawashi. Mahasa kutala yuma ya sonyi ni yinema ya upupilo hanji ya luchisa. Iye mahasa kupwa ni yimwe yitanga yipema, ni kwivwa yikola ku mbunge mumu lia yuma yipi yize akuhanjika ni yize akulinga. Alioze, keshi ni nyonga lia kwecha yuma yacho.—Ngala. 5:19-21; 2 Timo. 3:2-5.

 5. Shina mutuhasa kwecha yitanga yeswe ya utu ukulu? Lumbununa. (Yilinga 3:19)

⁵ Tulieswe tuli yihenge. Kashika, kutuchi kuhasa kuchiza mu mbunge yetu usolo upi ni manyonga eswe api. Ha mashimbu amwe, mutulinga hanji kwamba yuma yimwe yize hanyima mutwivwa yikola ku mbunge. (Jere. 17:9; Tia. 3:2) Alioze nyi mutuzula utu ukulu, mutwehuka yitanga ya musunya ni ndako jikwo jipi. Hachino, mutupwa ni yitanga yaha.—Iza. 55:7; tanga Yilinga 3:19.

 6. Mumu liaka Yehova anatukolweza hanga tweche manyonga ni ndako jipi?

⁶ Yehova kanatukolweza hanga tweche manyonga ni ndako jipi mumu kakutuzanga chinji, nawa kanazange hanga tuwahilile ku mwono. (Iza. 48:17, 18) Iye kananyingika ngwenyi, waze keshi kusa tachi hanga eche yuma yipi kakulimwesa lamba hamwe ni akwo. Kakwivwa yikola ku mbunge muze akumona mutulinga yuma yize yakutupinjisa ni kupinjisa akwetu.

 7. Kulita ni A-Roma 12:1, 2, yika yetweswe twatamba kusakula?

⁷ Masepa hanji asoko jetu amwe, mahasa kutuseha muze tunase tachi hanga tweche yitanga yipi. (1 Petu. 4:3, 4) Ayo mahasa kutulweza ngwo tuli ni ulite wakulinga yeswayo mutuzanga, nawa ngwo kutwatambile kwecha hanga akwetu atulweze yize twatamba kulinga. Alioze, waze akulituna kukaula shimbi ja Yehova, keshi ni utuswilo wamwenemwene. Kwamba pundu, ayo kakwecha hanga chifuchi chino cha Satana chaasongwele. (Tanga A-Roma 12:1, 2.) Tulieswe twatamba kusakula nyi mutununga ni utu ukulu uze akusongwela ku shili ni chifuchi chino cha Satana, nyi hanji mutwecha hanga Yehova atukwase kwecha yitanga yipi ni kupwa ni yitanga yipema.—Iza. 64:8.

 8. Yika muyitukwasa mba twehuke manyonga ni yitanga yipi?

⁸ Yehova kananyingika ngwenyi, chakufupiwa mashimbu ni tachi mba twehuke manyonga ni yitanga yipi. (Samu 103:13, 14) Alioze, kupalikila mu Liji lienyi, spiritu yisandu ni ululikiso wenyi, Yehova kakutwaha mana, tachi ni ukwaso uze tunafupiwa hanga twalumune yitanga yetu. Kwamba pundu, iye hanakukwase. Haliapwila, tuhengwolenu yize muhasa kulinga mba uzule utu ukulu ni kujama hanga akupapachise.

 9. Kuchi Liji lia Zambi mulihasa kukukwasa?

⁹ Zachisa Mbimbiliya hanga ulihengwole kanawa. Liji lia Zambi lili ngwe katalilo; mulihasa kukukwasa kuhengwola mutapu uze wakunyonga, kuhanjika ni yitanga ye. (Tia. 1:22-25) Longeshi we wa Mbimbiliya ni mandumbu akwo ajama no mahasa kukukwasa. Chakutalilaho, ayo mahasa kuzachisa Mbimbiliya hanga akukwase kumona ulelu ni yitanga yipema yize ukwete. Mahasa kukulongesa chize muhengwola sango jize mujikukwasa hanga wehuke yitanga yipi. Nawa Yehova manunga ni kukukwasa mashimbu eswe. Iye mahasa kukukwasa kanawa mumu kananyingika yize yili mu mbunge ye. (Yishi. 14:10; 15:11) Kashika, nunga ni kulemba kuli iye ni kulilongesa Liji lienyi matangwa eswe.

10. Yika walilongesa ha chilweza cha Elie?

¹⁰ Pwako ni shindakenyo ngwo shimbi ja Yehova japwa jipema. Yeswe yize Yehova akutwita hanga tulinge yakutuyukisa. Mutu yoze wakukaula shimbi jenyi kakulisa vumbi, kunyingika ulemu wa mwono ni kupwa ni uwahililo wamwenemwene. (Samu 19:7-11) Alioze waze keshi kukaula shimbi ja Yehova, kakumona lamba lize liakwiza ha kulinga yitanga ya musunya. Tutalenu yize ambile Elie hakutwala ku kwehuka shimbi ja Zambi. Kamulelele kuli yisemi waze akuzanga Yehova. Alioze ku ukweze, yalikata ni masepa api. Chocho, yaputuka kushipa, kulinga utanji ni kwiya. Yapwa chitenu ni kuneha mbwanja. Mwene ngwenyi: “Nalingile yuma yeswe yize nalilongesele ngwami, mukwa-Kristu katambile kulinga.” Alioze, kakavulamine yuma yize alilongesele ku wanuke. Chocho, yaputuka kulilongesa nawa Mbimbiliya. Yasa tachi jinji hanga eche ndako jenyi jipi, hachino yamupapachisa ha mwaka 2000. Kuchi kukaula shimbi ja Yehova chamuyukishile? Iye yamba ngwenyi: “Haliapwila nguli ni sambukila ya ku mbunge hamwe ni mbunge yitoma.”c Chilweza chino chinasolola ngwo, waze akulituna kukaula shimbi ja Yehova kakulinehena lamba. Chipwe chocho, nihindu Yehova kanazange kwakwasa kwalumuna yitanga yo.

11. Yuma yika Yehova akuvwila lwaji?

¹¹ Lilongese kuvwila lwaji yuma yize Yehova akuvwila lwaji. (Samu 97:10) Mbimbiliya yinambe ngwo, Yehova kakuvwila lwaji “meso akulizelula; kanwa lia mahuza; [ni] moko a kushiha mutu chitela chakuhi.” (Yishi. 6:16, 17) Iye nawa “kakuvwila lwaji mukwa kumwanga manyinga, ni mukwa kwonga.” (Samu 5:6) Yehova kanongesele atu ha matangwa ja Noa, mumu kazalishile hashi heswe ni upupilo. (Uputu. 6:13) Tutalenu chilweza chikwo. Kupalikila muli profeta Malakia, Yehova yamba ngwenyi, kakuvwila lwaji atu waze akufupa kulilakula ni waze alimbata no chakuhona chitela. Zambi keshi kutayiza uwayilo wo nawa makaapatwila mumu lia yitanga yo yipi.—Mala. 2:13-16; Hepre. 13:4.

12. Kuvwila ‘lwaji ungulungulu’ yika chinalumbunuka?

¹² Yehova kanazange hanga tuvwile ‘lwaji ungulungulu weswe.’ (Roma 12:9) Kuvwila “lwaji” chimwe chuma, chinalumbunuka kuchivwila ngenye ni kuchehuka. Achinyonga chize muwivwa nyi makwita hanga ulie chimwe kulia chapola. Hanji muwivwa ku mbunge pwi nyi munyonga ha kulia chacho. Yino ye twatamba kwivwa muze tunambe kulinga yuma yize Yehova keshi kuzanga.

13. Mumu liaka twatamba kufunga manyonga jetu?

¹³ Funga manyonga je. Manyonga jetu e akusongwela yitanga yetu. Kashika Yesu atulongesele ngwenyi, twatamba kwehuka manyonga eswe waze mahasa kututwala hanga tulinge shili yinene. (Mateu 5:21, 22, 28, 29) Pundu lume, twakuzanga kuvwisa Tata yetu wa mu malilu kuwaha. Mba tuchilinge, chili chilemu kwehuka ni kawashi manyonga api waze meza mu mbunge yetu!

14. Yika kuhanjika chetu chakusolola hali yetu, nawa yika twatamba kulihula?

¹⁴ Funga limi lie. Yesu kambile ngwenyi: “Yuma yize muyituhuka mu kanwa muyituhuka mu mbunge.” (Mateu 15:18) Ewa, yize twakuhanjika yakusolola yuma yinji yize yili mu mbunge yetu. Kashika, muhasa kulihula ngwe: ‘Shina nakuhanjika umwenemwene mashimbu eswe chipwe ngwe chino muchingusa mu ponde? Nyi hingunambata, shina nakusa tachi hanga nguchine kusolola zango lia ulo kuli mutu yoze kuchalimbachile nenyi? Kutala nakwehuka kuhanjika-hanjika yuma ya upangala? Shina nakulihumikiza muze umwe mangwihia?’ Kupukuna ha yihula yino muchikukwasa chinji. Kuhanjika chetu mutuhasa kuchitesa ni mbutau ja chimwe chikuto. Nyi wasepula mbutau ku chikuto, muchipwa chashi kuchizula. Chizechene nawa, nyi musa tachi hanga wehuke kuhanjika pande ja sonyi, mahuza ni yuma ya upangala, muchipwa chashi kuzula utu ukulu.

15. Yika chinalumbunuka kuhata ‘utu wetu ukulu’ ha mutondo?

¹⁵ Sako tachi hanga walumune utu we. Postolo Paulu kazachishile chimwe chilweza chipema hanga atukwase kumona ulemu wa kwalumuna yitanga yetu. Iye kasonekene ngwenyi, twatamba kuhata ‘utu wetu ukulu’ ha mutondo. (Roma 6:6) Yesu kaliechele hanga amuhate ha mutondo, mumu kazangile kuvwisa Yehova kuwaha. Chizechene nawa, nyi tunazange kuvwisa Yehova kuwaha, twatamba kwecha ndako ni yuma yize Yehova akuvwila lwaji. Nyi twachilinga, mutupwa ni mbunge yitoma nawa mutupwa ni kutalatala cha mwono wa mutolo. (Yoa. 17:3; 1 Petu. 3:21) Nyingika ngwe, Yehova kechi keza kalumuna shimbi jenyi hanga atuvwise kuwaha. Kwamba umwenemwene, yetu e twatamba kwalumuna yitanga yetu ni kukaula shimbi jenyi.—Iza. 1:16-18; 55:9.

16. Mumu liaka watamba kununga ni kukumba usolo upi?

¹⁶ Nunga ni kukumba usolo upi. Chipwe hanyima lia kukupapachisa, mufupiwa kununga ni kusa tachi hanga ukumbe usolo wa musunya. Tutalenu chilweza cha umwe ndumbu avuluka ngwo Maurício. Muze apwile mukweze, yaputuka kulinga utumwa. Kulutwe lia amwe mashimbu, yalinyingika ni Yela ja Yehova, chocho yaputuka kulilongesa Mbimbiliya. Hanyima lia kwalumuna mwono wenyi, yamupapachisa ha mwaka 2002. Chipwe ngwe kakuwayila Yehova ha miaka yinji, Maurício yamba ngwenyi: “Kwamba umwenemwene ha mashimbu amwe te nakupinda ni manyonga a usolo upi.” Iye keshi kwecha yino hanga yimuhongese. Shimbu ahonge, yamba ngwenyi: “Yize yakungutakamisa yili kunyingika ngwami, muze nakwehuka usolo upi, nakuvwisa Yehova kuwaha.”d

17. Yika yakutakamisa ha chilweza cha pangi Nabiha?

¹⁷ Eta ukwaso kuli Yehova, nawa jikijila ha spiritu yenyi hi ha tachi je ko. (Ngala. 5:22; Fwili. 4:6) Twatamba kusa tachi mba tuzule utu ukulu ni kuumbila. Tutalenu chilweza cha umwe pangi avuluka ngwo, Nabiha. Tato kanakamwechelela muze te ali wika ni miaka yisambano. Iye yamba ngwenyi: “Chino changunehenene yikola yinji ku mbunge.” Muze te anayi ni kukola, Nabiha yapwa chinji chitenu. Yaputuka kulikata ni akwa-kulanjisa droga, chocho yamusa mu zuwo lia ususu ni kulingamo yimwe miaka. Yela ja Yehova waze ayile ni kumeneka zuwo liacho lia ususu, yaputuka kumulongesa Mbimbiliya. Nabiha yaputuka kwalumuna yitanga yenyi. Yamba ngwenyi: “Chapwile chashi kwecha jimwe ndako jipi napwile najo, alioze chakaliwile chinji kwecha kushipa.” Nabiha kasele tachi jinji, ha kupalika cha mwaka umuwika ni ndambu yahasa kulitwamina kushipa. Kuchi ahashile kuchilinga? Mwene ngwenyi: “Chuma changukwashile kwecha ndako jipi, chili kununga ni kulemba kuli Yehova ni mbunge yeswe.” Haliapwila iye kakulweza akwo ngwenyi: “Nyi nahashile kwalumuna yitanga yami hanga nguvwise Yehova kuwaha, mutu mweswawo neye mahasa kuchilinga!”e

18. Kulita ni 1 A-Korindu 6:9-11, yika tuvumbi anji a Yehova ahashile kulinga?

¹⁸ Ku sekulu yitangu, malunga ni mapwo amwe waze Yehova asakwile hanga akayule hamuwika ni Kristu mu malilu, kapwile ni kulinga yuma yipi shimbu te kanda achipwa akwa-Kristu. Chakutalilaho, amwe kapwile ni kulinga utanji, utumwa ni kwiya. Alioze ni ukwaso wa spiritu yisandu, ayo yahasa kwalumuna utu wo. (Tanga 1 A-Korindu 6:9-11.) Ni musono nawa, Mbimbiliya yinakwase tununu a tununu twa atu hanga alumune yitanga yo.f Atu jacho kahashile kwecha ndako jipi jize te hijasa miji mu mambunge jo. Yilweza yo yinasolola pundu ngwo, chipwe yena muhasa kwalumuna utu we ni kwecha yitanga yipi hanga ujame ni kukupapachisa.

19. Yika mutushimutwina ha mutwe uze muusulaho?

¹⁹ Kuchizako kusa tachi hanga tuzule utu ukulu, waze anazange kwapapachisa katamba kulikolweza hanga azale utu waha. Ha mutwe muusulaho, mutushimutwina chize mutuhasa kuchilinga ni chize akwetu mahasa kutukwasa.