‘Liji lia Zambi . . . Ndundo Likwete’

 1. Ushindakenyo uka tuli nawo ngwetu Liji lia Zambi ndundo likwete? (Tala chizulie ha uputukilo.)

TUVUMBI twa Yehova kakwete shindakenyo ngwo liji lienyi, sango jenyi kuli atu, ‘jikwete mwono ni ndundo.’ (A-Hepreu 4:12) Twakumona ndundo ja Mbimbiliya ku mwono wetu ni ku mwono wa akwetu. Amwe, shimbu te kanda achipwa tuvumbi twa Yehova te eji, akwa-kunwa yitumbo ya kuzengewesa hanji yitanji. Eka te kakwete lufuma ni upite unji alioze te kakulivwa ngwe yimwe yinahono ku mwono wo. (Chilumbununyi 2:3-11) Alioze, atu anji waze te keshi ni kutalatala nawa te hanatoko haliapwila kali ni usongwelo ni kutalatala. Ha miaka yinji twalivwisa kuwaha kutanga yakulitakana nayo mu Kaposhi wa Kutalila ha mutwe wakwamba ngwo, “Mbimbiliya Yakwalumuna Mwono wa Atu.” Mbimbiliya yatamba kukwasa atu anunge kukolesa usepa wo ni Yehova chipwe tuhu hapwa Akwa-Kristu.

 2. Kuchi ndundo ja Liji lia Zambi jakwashile atu ku sekulu yitangu?

² Kutuushi kukomoka hakumona atu anji malumuna yitanga yo muze malilongesa umwenemwene. Ni mandumbu jetu a ku sekulu yitangu, waze apwile ni kutalatala cha kuya mu malilu no kalumwine yitanga yo. (Tanga 1 A-Korindu 6:9-11.) Muze Paulu ahanjikile hali waze te kechi kahinga Wanangana wa Zambi, iye yamba ngwenyi: ‘Amwe hakachi kenu che apwile.’ Liji lia Zambi ni spiritu yenyi yisandu yakwashile atu jacho hanga alumune yitanga yo. Alioze amwe akuli ayo chipwe muze te hapwa Akwa-Kristu, kalingile uhenge unene uze wapihishile usepa wo ni Yehova. Chakutalilaho, Mbimbiliya yakutongola umwe ndumbu wakuwayisa yoze asosolwele mu chikungulwila. Kulutwe, yalumuna yitanga yenyi ni kufuna mu chikungulwila. (1 A-Korindu 5:1-5; 2 A-Korindu 2:5-8) Chakututakamisa ha kunyingika ngwetu, hamukunda wa ndundo ja Liji lia Zambi, mandumbu jetu kakusa tachi hanga alumune yitanga yo.

 3. Yika mutulilongesa mu mutwe uno?

³ Liji lia Zambi likwete ndundo jinji. Muze Yehova anatwehelio, twatamba kulizachisa kanawa. (2 Timoteu 2:15) Mutwe uno muusolola yize mutuhasa kulinga ha kuzachisa ndundo ja Mbimbiliya (1) mu mwono wetu, (2) mu mulimo wa kwambujola, ni (3) muze tunalongesa mu chikungulwila. Yize mutulilongesa mu mutwe uno, muyitukwasa tuzange chinji Tata yetu wa mu malilu, yoze wakutulongesa hanga tuyuke, ni kumusakwilila.—Izaia 48:17.

 4. (a) Yika mutuhasa kulinga mba Liji lia Zambi litukwase? (b) Kuchi mutuhasa kusa shimbu hanga tutange Mbimbiliya?

⁴ Mba tweche Liji lia Zambi hanga litukwase, twatamba kulitanga mashimbu eswe. Twatamba kweseka kulitanga hita tangwa. (Yoshua 1:8) Anji akuli yetu tukwete milimo yinji, chipwe chocho, kutwatambile kwecha milimo yetu hanji chuma cheswacho chitukwike tuhone kutanga Mbimbiliya. (Tanga A-Efwesu 5:15, 16.) Mutuhasa kuwana shimbu ha chimene, ha mashimbu amwe a mwalwa, hanji ha ufuku. Twakutayiza yize asonekene mukwa-kwimba masamu ngwenyi: “Shimbi ye kunayizanga chimwe! Yapwa kupukuna chami tangwa lieswe nganganga.”—Samu 119:97.

5, 6. (a) Mumu liaka twatamba kupukuna? (b) Kuchi mutuhasa kupukuna kanawa? (c) Kuchi kutanga Mbimbiliya ni kuyipukuna chakunukwasa?

⁵ Alioze kutwatambile kusulila wika ha kutanga Mbimbiliya. Twatamba kuyipukuna hanji kunyonga chinji ha yize tunatangemo. (Samu 1:1-3) Nyi twalinga chocho, mba tuhase kukaula mana a Mbimbiliya ku mwono wetu.Kashika, chipwe mututanga Mbimbiliya ha mafwo, hanji mu telefone, nyi ha computador twatamba kwecha Liji lia Zambi lialumune yitanga yetu.

⁶ Kuchi mutuhasa kupukuna kanawa? Muze tunatange Mbimbiliya, twatamba kumana ni kulihula ngwetu: ‘Yika yino yinangulweza hali Yehova? Kuchi munguhasa kukaula yize ngunatange ku mwono wami? Yika yinachifupiwa kwalumuna ku mwono wami?’ Muze mutupukuna ha Liji lia Zambi ni kulemba hakutwala ha yize tunatange, mutuzanga kuyikaula ku mwono wetu. Mba, mutuhasa kwivwa ndundo ja Liji lia Zambi ku mwono wetu.—2 A-Korindu 10:4, 5.

 7. Kuchi mutuhasa kuzachisa kanawa Liji lia Zambi mu mulimo wa kwambujola?

⁷ Chili chilemu kuzachisa chinji Liji lia Zambi hakwambujola ni kulongesa atu. Umwe ndumbu yamba ngwenyi, “Nyi unambujola ku zuwo ni zuwo hamwe ni Yehova, shina yena wika muopwa ni kuhanjika nyi mwecha iye ahanjike?” Nyi mututangila mutu Mbimbiliya che kwamba ngwo tunechi Yehova hanga ahanjike nenyi. Chisoneko cha kusakula kanawa chikwete ndundo kuhiana yeswayo mutuhasa kuhanjika. (1 A-Tesalonika 2:13) Muze uli mu mulimo wa kwambujola, shina wakusa tachi hanga utange yisoneko mu Mbimbiliya nyi?

 8. Mumu liaka kutwatambile kusulila wika ha kutanga yisoneko muze tunambujola?

⁸ Chikwo nawa, kutwatambile nawa kusulila wika hakutangila waze twawana mu munda versu ya Mbimbiliya. Atu anji keshi kanyingikine ulumbunwiso wa Mbimbiliya. Chino chalingiwile ku sekulu yitangu, ni musono nawa chakulingiwa. (A-Roma 10:2) Kutwatambile kunyonga ngwetu mutu twatangila chisoneko mu munda kachivwa kanawa. Mutuhasa kumukwasa ha kuhilukila maliji hanji manyonga alemu a versu ni kumusolwela ulumbunwiso wa versu jacho. Nyi mutulinga chocho, Liji lia Zambi muliheta ku mbunge ja atu.—Tanga Luka 24:32.

 9. Kuchi mutuhasa kukwasa atu hanga alemese Mbimbiliya ha yize mutwamba shimbu kanda tuchitanga chisoneko? Hana chilweza.

⁹ Yize mutuhanjika shimbu kanda tuchitanga chisoneko muyihasa nawa kukwasa mwenya-zuwo alemese Mbimbiliya. Chakutalilaho, mutuhasa kwamba ngwetu, “Tutalenu yize Tangi yetu anambe ha chikuma chino.” Hanji nyi tunahanjika ni mutu yoze ukwete ufulielo walisa ni wa akwa-Kristu, mutuhasa kwamba ngwetu, “Tutalenu yize Yisoneko Yisandu yinatulweze.” Nyi mutuwana mutu yoze keshi kuya mu yingeleja niyimwe, mutuhasa kumuhula ngwetu, “Hiunevu kama maliji wano aku shakulu nyi?” Nyi mutunyingika ngwetu hita mutu kakwete yize afuliela, muchitukwasa tululieke kanawa maliji waze mutulianga kuhanjika.—1 A-Korindu 9:22, 23.

10. (a) Yika yalingiwile kuli umwe ndumbu? (b) Kuchi nwamwene ndundo ja Liji lia Zambi mu mulimo wenu wa kwambujola?

¹⁰ Mandumbu anji kanyingika ngwo kuzachisa Liji lia Zambi muchihasa kukwasa chinji atu waze akwambulwila sango lipema. Chakutalilaho, umwe ndumbu yaya ni kumeneka kashinakaji yoze te wakutanga mikanda yetu ha miaka yinji. Limwe tangwa, shimbu amwehe wika Kaposhi wa Kutalila mwaha, ndumbu wacho yamutangila chisoneko. Yatanga 2 A-Korindu 1:3, 4, uze wakwamba ngwo: ‘Tato ya keke, kanda Zambi ya kulembejeka cheswe. . . kakututakamisa mu lamba lietu lieswe.’ Maliji wano kakwachile ku mbunge ya kashinakaji wacho, chocho yeta ndumbwetu hanga atange nawa chisoneko chacho.Mba, lunga wacho yamba ngwenyi, iye ni mukwo-pwo te kanafupiwa lume utakamiso. Mumu lia chisoneko chino, iye yazanga chinji kunyingika Mbimbiliya. Kashika, kuzachisa Liji lia Zambi mu mulimo wetu wa kwambujola chikwete ndundo jinji!—Yilinga 19:20.

11. Chiteli chika ali nacho mandumbu waze akulongesa mu chikungulwila?

¹¹ Twakuzanga chinji kuya ku kukunguluka cha ha chikungulwila, cha mbonge ni cha mambonge. Chitela chilemu twakuyilako chili kuwayila Yehova. Nawa twakuyuka chinji ha yize twakulilongesako. Hachino, mandumbu waze akuhanjika pande ku yihela yacho kali ni mulimo ulemu chinji . (Tiangu 3:1) Katamba kupwa ni ushindakenyo ngwo yize analongesa yinakatuka mu Mbimbiliya. Nyi nuli mulimo uno, kuchi munuhasa kuzachisa ndundo ja Liji lia Zambi hanga nuhete ku mbunge ja atu waze nunalongesa?

12. Kuchi mukwa-kuhanjika pande mahasa kupwa ni shindakenyo ngwenyi pande jenyi jinakatuka ha Yisoneko?

¹² Yisoneko yatamba kupwa chihanda chilemu cha pande jize mutuhanjika. (Yoano 7:16) Kashika twatamba kukanyama ha chize mutuhanjika pande jetu ni yakulitakana nayo hanji yilweza yize mutuzachisa kuchina mutuhona kusolola ulemu wa Mbimbiliya. Chikwo nawa, twiwulukenu ngwetu kutanga Mbimbiliya chinalise ni kulongesa yize yili mu Mbimbiliya. Kashika, nyi mutanga yisoneko yinji, atu kechi kwiwuluka yisoneko yacho. Hachino, sakula kanawa yisoneko yize muzanga kutanga. Mba, hi pwako ni shimbu lia kuyitanga, kuyilumbununa, kuhana yilweza ni kusolola kanawa chize atu atamba kuyikaula. (Nehemia 8:8) Nyi manwaha pande jakusoneka kulu, senu shindakenyo ngwenu nwalilongesa kanawa pande ni yisoneko yize yiliho. Nyingikenu kanawa chize yikuma yinalite ni yisoneko yize yiliho. Mba, hi zachisenu yimwe yisoneko yacho hanga nulongese kanawa yikuma yize yili ha pande. (Muhasa kuwana yikuma yipema ha malongeso 21 ndo 23 ha mukanda Beneficie-se da Escola do Ministério Teocrático.) Alioze chuma chahiana ulemu, itenu Yehova anukwase kulumbununa kanawa manyonga jenyi waze ali mu Mbimbiliya.—Tanga Ezera 7:10; Yishima 3:13, 14. 

13. (a) Kuchi chisoneko evwile umwe ndumbu ku kukunguluka chamukwachile ku mbunge? (b) Kuchi mutapu uze akuzachishilamo Mbimbiliya ha kukunguluka chetu muchihasa kutukwata ku mbunge?

¹³ Muze umwe ndumbu wa pwo mu Austrália te uchili kanuke, kapalikile mu yuma yinji yipi, nawa chipwe ngwe hanyima yeza ni kunyingika Yehova, nihindu te keshi kufuliela pundu ngwo Yehova kakumuzanga. Ha chimwe kukunguluka, ndumbu wacho yevwa chisoneko chize chamukwachile ku mbunge. Yapukuna ha chisoneko chacho ni kuhengwola mu yisoneko. Achi yichimukwasa kutanga versu nawa jikwo mu Mbimbiliya. Mba hanyima yapwa ni shindakenyo ngwo, kumana Yehova kamuzanga.a (Tala maliji mushi lia lifwo.) Kanda nuchivwa kama chisoneko ha kukunguluka cha chikungulwila, cha mbonge ni cha mambonge chize chanukwachile ku mbunge nyi?—Nehemia 8:12.

14. Kuchi mutuhasa kusolola ngwetu twakulemesa ni kuzanga Liji lia Yehova?

¹⁴ Kutala kutushi ni kusakwilila Yehova ha kutusonekena Liji lienyi Mbimbiliya nyi? Iye kalakenya ngwenyi Liji lienyi mulilinduluka ndo ku miaka yeswe, mba kanafungu chilakenyo chenyi. (1 Petulu 1:24, 25) Kashika, twatamba kutanga Mbimbiliya hita tangwa, kukaula yize tunatange ku mwono wetu, ni kuyizachisa tukwase akwetu. Nyi mutulinga chocho, mutusolola pundu ngwetu, twakuzanga ni kulemesa Mbimbiliya, nawa chahiana ulemu, kuzanga chinji Mwenyayo, Yehova Zambi.