Mumu Liaka Twakushinakajiwa Ni Kufwa?

Zambi yalweza Alama ngwenyi, “ha tangwa muoliako [ku mutondo] kumukafwa lume.” (Uputukilo 2:17) Nyi Zambi katangile Alama ni Eva hanga afwe, kachi kakahele shimbi yacho. Alama te kananyingika ngwenyi, nyi malia ku mutondo wacho te mafwa.

Alama ni Eva te keshi ni chitela cha kulia ku mutondo wacho mba anunge ni mwono, mumu mu munda mwapwile mitondo yinji yakulia. (Uputukilo 2:9) Nyi te Alama ni Eva kakalile muhoko wa mutondo wacho, kachi kasolwele ngwo, kakwononokena Zambi yoze waahele mwono. Te masolola nawa ngwo, kakulemesa ulite wa Zambi wa kwasongwela.

Nyi tunafupu kunyingika mumu liaka Alama ni Eva afwile, chitangu tutalenu ha yize yalingiwile mu munda wa Endene. Satana Ndiapu kazachishile kapela hanga ahanjike mahuza. Mbimbiliya yinambe ngwo: “Kapela wakanyamine kuhiana tushitu eswe a mu yambu waze Yehova Zambi atangile. Iye yahula pwo ngwenyi, Kuma, Zambi hanambe ngwenyi, Kanda nukalia ku mitondo yeswe ya mu munda nyi?”—Uputukilo 3:1.

Mba Eva yamukumbulula ngwenyi: “Ku mitondo yeswe ya mu munda tunahase kulia. Alioze ku mihuko ya mutondo uze uli mukachi ka munda, Zambi hanambe ngwenyi, Kanda nuyilia, chipwe kukwatako, kuchina munufwa.” Kapela yamba ngwenyi: “Kufwa kunuchi kufwa, mumu Zambi kananyingika ngwenyi, Ha tangwa lize munuliako meso jenu malaula, munupwa ngwe Zambi, nikunyingika chipema ni chipi.” Ha kwamba maliji wano, Satana yasolola ngwo, Yehova kali mukwa-mahuza yoze te unaswekela Alama ni Eva yuma yipema.—Uputukilo 3:2-5.

Eva yatayiza maliji waze amulwezele. Iye yamona ngwenyi, “mutondo upema wa kulia. Nawa unawaha ku meso! Kashika, yazoza kwoko yahelako muhuko, yalia. Mbimbiliya yinambe ngwo: “Yahana nawa kuli mukwo-lunga hamwe nenyi, neye yalia.”—Uputukilo 3:6.

Achinyonga ha chinyengo chize Zambi evwile muze amwene ana jenyi waze azanga, kanasakula kwehuka kumwononokena! Yika Zambi alingile? Yamba kuli Alama ngwenyi: “Mukahiluka mu mavu se kuze kwene akuchijile. Mumu uli fufuta mba ku fufuta mukahilukila.” (Uputukilo 3:17-19) Ha chino, “matangwa eswe a mwono wa Alama makulakaji livwa a miaka ni makumi atatu a miaka, mba yafwa.” (Uputukilo 5:5) Muze Alama afwile kakayile nikumwe hanga atwameko, mwono wenyi yiunonga. Chino chinalumbunuka ngwo, Alama yapwa mavu, ngwe chize apwile muze Yehova te kanda achimutanga. Iye yakuwa. Chapihile chinji!

Ha mukunda wa shili, Alama ni Eva yatokesa ungunu ni uhashi wo wa kutwama ku miaka yeswe, nawa yapwa yihenge. Ha chino, ana jo no yahinga shili ni uhenge wacho. Mukanda wa A-Roma 5:12 unambe ngwo: “Kuli mutu umuwika [Alama] shili yanjilile hano hashi, ni ku shili kufwa chanjilile; chocho kufwa chahetele kuli atu eswe, mumu te eswe hanavulumuna.”

Mbimbiliya yinalumbununa shili ni kufwa ngwe, “chifuko chize hafuka nacho mavungu eswe, ni wanda uze hazazulwila helu lia mawanangana eswe.” (Izaia 25:7) Chifuko chacho chakufuka mavungu ngwe mwishi uze uli ni ulembe wakushiha atu. Kwamba pundu, “muli Alama eswe kakufwa.” (1 A-Korindu 15:22) Postolo Paulu kahulile ngwenyi: “Iya mangupulula ku mujimba uno wa kufwa?” Shina te kuli umwe yoze mahasa kumupulwila?—A-Roma 7:24.