Yena Te Unachinyingika Nyi?
Shina chili umwenemwene ngwo, kushakulu umwe mutu te mahasa kulima katanda mu munda wa mukwo?
Uno uli umwe wa mikanda wa Digest 1468 yize Mwanangana Justiniano atuhwishile, nawa uli umwe wa mikanda yize yikwete shimbi ja kushakulu
KULITA ni Mateu 13:24-26, Yesu kambile ngwenyi: “Wanangana wa malilu walifwa ngwe mutu yoze hakuwa mbuto yipema mu munda wenyi. Alioze shimbu atu achili mutulo, mukwa kole yeza yakuwa mwambu wamokomoko hakachi ka tiliku, mba yaya kwenyi. Alioze muze mafwo hasoka nikwima mbuto, hohene mwambu wamokomoko yiusoloka nawa.” Amwe akwa-kusoneka kakuhamika ngwo chishima chino chakakatukile ku yuma yamwenemwene, alioze kulita ni mikanda ya A-Roma ya ku mashimbu akunyima, yakwamba ngwo chuma chamutapu au, te muchihasa kulingiwa.
Yimwe dicionario ya Mbimbiliya yinambe ngwo, kulita ni shimbi ja A-Roma, chapwile mulonga unene kukuwa katanda mu munda wa mutu mukwo, ha kulifunyishina upi ni upi. Hakupwa ni shimbi yacho, chinasolola ngwo yuma yacho te yakulingiwa lume. Alastair Kerr umwe mukwa-mana hakutwala ku shimbi, yalumbununa ngwenyi, ha mwaka 533, muze Kristu te hafwa kulu, Mwanangana wa A-Roma Justiniano yatuhwisa umwe mukanda wenyi wa digesti. Mukanda wacho, wahanjikile hakutwala ku shimbi ya A-Roma, nawa hapwile maliji ja akwa-mana hakutwala ku shimbi, kukatuka ha miaka 100-250 muze te Kristu hafwa kulu. Kulita ni mukanda wacho, Ulpian umwe wa kuli akwa-mana jacho, kahanjikile hakutwala ha chimwe chikuma chize chalingiwile ha sekulu yamuchiali. Katanda nyi mamukuwa mu munda, te kakupihisa mbuto yeswe. Mu mukanda wacho, mwapwile shimbi jize te jakusambisa mukwa-minda hanga amufwete mbongo kuli mukwa-kole wenyi, hamukunda wa mbuto yize apihisa.
Yuma yacho te yakulingiwa mu Wanangana wa A-Roma akushakulu, yino yinasolola ngwo chikuma chize Yesu ahanjikile ha chishima chenyi te chakulingiwa ku mwono wa atu.