2. Yuma yika hanji yitanga yika twakumona chize ha mwaka 1914?

Tumbaji twa Yesu kamuhulile ngwo: “Chilayi cha kuheta che chika, ni cha kumanunuka cha miaka?” (Mateu 24:3) Yesu yaaha chilayi cha yuma yize te muyilingiwa muze maputuka kuyula mu Wanangana wa Zambi mu malilu. Yuma yimwe yize ambile yili: Jita, zala ni minyiko yinene. (Tanga Mateu 24:7.) Mbimbiliya yaprofetezele nawa ngwo, ha “matangwa a kusula” yitanga ya atu te muyipwisa “miaka yikalu” chinji. (2 Timoteu 3:1-5) Yuma ni yitanga yacho, yakusoloka zwalala kukatuka ha mwaka 1914.

3. Mumu liaka yuma ya hano hashi yaputukile kupiha chinji muze Wanangana wa Zambi waputukile kuyula?

Muze Yesu amupwishile Mwanangana mu Wanangana wa Zambi, yasa jita ni Satana ni andemoniu jenyi mu malilu. Chocho, Yesu yakumba Satana. Mbimbiliya yinambe ngwo, “amunyashine ndo hashi, ni angelo jenyi hamwe nenyi.” (Usolwelo 12:9, 10, 12) Satana kali ni ufwatulo unji mumu kananyingika ngwenyi, kwasala hakehe amunongese. Kashika anamwesa lamba linji atu eswe hano hashi. Kanda ukomoka ha kumona yuma yipi yize yinalingiwa hano hashi! Wanangana wa Zambi muukahwisa lamba lieswe.