‘Iwulukenu Waze Apwa Tusongo Twenu’

A MALIJI ja postolo Paulu ali ha A-Hepreu 13:7, mutuhasa nawa kwalumbununa ngwetu: “Iwulukenu waze akunuyula.” Kukatuka ha Pentekoste ya mwaka 33 M.J., apostolo ashishika a Mwene wetu Yesu Kristu e apwile chizavu cha tusongo chize chapwile ni kusongwela chikungulwila chitangu cha akwa-Kristu. (Yili. 6:2-4) Kukatuka ha mwaka 49 M.J., chizavu cha tusongo yichitohwa, yimupwa nawa atu akwo hi apostolo ja Yesu wika ko. Chocho muze kwejile pande ja kupwisa atu ngalami, mu chizavu cha tusongo ku Yerusaleme mwapwile “apostolo ni makulwana.” (Yili. 15:1, 2) Ayo e apwile ni chiteli chakutala ha pande jeswe jize jakwachile hali akwa-Kristu eswe. Ayo kapwile ni kutuma mikanda ni yiyulo hanga yitakamise yikungulwila ni kukwasa tumbaji hanga alinunge. Yikungulwila yapwile ni kwononoka ni kuzeyela usongwelo wa chizavu cha tusongo, chocho Yehova yayipala chinji.—Yili. 8:1, 14, 15; 15:22-31; 16:4, 5; Hepre. 13:17.

² Muze apostolo afwile, atu anji yatanguka. (2 Tesa. 2:3-12) Ngwe chize Yesu ambile mu chishima chenyi cha tiliku ni mwambu, mwambu (akwa-Kristu a mahuza) yiwoka kuhiana tiliku (akwa-Kristu akuwayisa). Hakupalika cha miaka, yizavu yeswe yayecha hanga yisokele hamuwika ndo ha kangonde wa kucha, “che kumanunuka cha miaka.” (Mateu 13:24-30, 36-43) Ha mashimbu jacho kwapwile amwe akwa-Kristu akuwayisa hano hashi. Alioze kukwakapwile chizavu cha tusongo, chekwamba, kukwakapwile jila niyimwe yize te Yesu mazachisa hanga ahane usongwelo kuli tumbaji twenyi. (Mateu 28:20) Alioze, iye yalakenya ngwenyi yuma kumuyikalumuka ha kangonde wa kucha.

³ ‘Iya kevwe ndungo wamwenemwene, wakanyama?’ Yesu Kristu kahulile chihula chino muze aputukile chishima chize chinalingi “chilayi” cha “kumanunuka cha miaka.” (Mateu 24:3, 42-47) Yesu yasolola ngwenyi ndungo wamwenemwene te mahana kulia cha ku spiritu kuli atu ja Zambi “ha mwaka wacho.” Ku sekulu yitangu Yesu kazachishile chizavu cha malunga hanga asongwele, hi mutu umuwika ko. Ni musono nawa, ndungo wamwenemwene yoze anazachisa ha kumanunuka cha miaka hi mutu umuwika ko, alioze chizavu cha malunga.

⁴ Iya yoze Yesu atongwele hanga apwe ni kulisa tumbaji twenyi? Chinalite kuli iye kuzachisa akwa-Kristu akuwayisa waze ali hano hashi. Mbimbiliya yinaavuluka ngwo “asasendote a ku wanangana” waze akwete mulimo wa ‘kwambujola kuhiana cha yoze hanaatambika akakatuke ku milima ni kwiza ku pangu lienyi lia kukomwesa.’ (1 Petu. 2:9; Mala. 2:7; Uso. 12:17) Shina akwa-Kristu eswe akuwayisa kali mu chizavu cha ndungo wamwenemwene? Ka. Muze Yesu alingile chikomokeso cha kulisa mbunga ya malunga 5,000, hamwe ni mapwo ni twanuke akehe, iye kahanyine kulia chacho kuli tumbaji, mba tumbaji yachihana ku mbunga. (Mateu 14:19) Chekwamba, yalisa atu anji ha kuzachisa atu akehe wika. Ni musono nawa, Yesu kakuhana kulia cha ku spiritu mu jila yalifwa.

⁵ Kashika “kaselo wamwenemwene, wakanyama,” kali chizavu chikehe cha mandumbu akuwayisa waze akulinga mulimo wakululieka ni kuhana kulia cha ku spiritu ha mashimbu wano a kusoloka cha Kristu. (Luka 12:42) Ha matangwa wano a kusula, ‘ndungo wamwenemwene, wakanyama’ kali Chizavu cha Tusongo cha Yela ja Yehova. Mandumbu wano akuwayisa kakukalakalila hamuwika ku chishina chinene cha Yela ja Yehova.

⁶ Kristu kanazachisa chizavu chino hanga atuhwise sango ja kumanunuka cha uprofeto wa Mbimbiliya ni kuhana usongwelo walita wa chize twatamba kukaula shimbi ja Mbimbiliya ku mwono wetu. Kulia cha ku spiritu kakuchihana kupalikila mu yikungulwila ya Yela ja Yehova. (Iza. 43:10; Ngala. 6:16) Ha mashimbu waze asonekene Mbimbiliya, ndungo hanji kaselo washishika mwe te wakusongwela yuma ha zuwo. Ni ndungo wamwenemwene wakanyama neye kali ni mulimo wakusongwela yuma ku zuwo lia ufulielo. Ndungo wamwenemwene kakutala ha yikwata yeswe ya mu ululikiso, mulimo wa kwambujola, kukunguluka cha mbonge ni cha mambonge, kutongola tulayi apwe mu yihela yalisa mu ululikiso wetu, ni kusoneka mikanda ya Mbimbiliya hanga akwase nacho “akwa-zuwo lienyi.”—Mateu 24:45.

⁷ Mba “akwa-zuwo lienyi” aya? Mu maliji akehe, kali waze eswe akutambula kulia. Ku uputukilo wa matangwa a kusula, akwa-zuwo lienyi eswe kapwile akwa-Kristu akuwayisa. Hanyima, hali akwa-zuwo lienyi yihanjila mbunga yinene ya “mapanga akwo.” (Yoa. 10:16) Yizavu yino yeswe yaali yakutambula kulia cha ku spiritu kukatuka kuli ndungo wamwenemwene.

⁸ Ha luyinda munene, muze Yesu makeza hanga apatwile ni kwenyeka yuma ya mwakono, henaho iye makasa ndungo wamwenemwene akatale “ha yikumba yenyi yeswe.” (Mateu 24:46, 47) Eswe ali mu chizavu cha ndungo wamwenemwene makatambula chihinga cho mu malilu. Makalichinga ni akwo mu chizavu cha 144,000 hanga akayule hamwe ni Kristu mu malilu. Chipwe ngwe kukuchi kapwa nawa ndungo wamwenemwene wakanyama, nihindu, Yehova ni Yesu makapwa ni kuhana kulia kuli atu jo hano hashi mu Wanangana wa Mesaya kupalikila muli “yilolo” waze makatongola.—Samu 45:16.

⁹ Kuli yuma yinji yize twatamba ‘kwiwulukila waze ali tusongo twetu’ ni kwajikijila chinji. Kuchi kulinga chino muchihasa kutukwasa? Postolo Paulu yamba ngwenyi: “Ayo kakulawoka ha mbunge jenu, chizechene ngwe waze makalumbununa kuli Zambi, hanga akalinge chino ni uwahililo, hi ni kutwa mikuma ko, mumu chino kuchichi kanufumbula.” (Hepre. 13:17) Chili chilemu kwononoka ni kuzeyela ku usongwelo wa tusongo twetu, mumu o kakutufunga ku ufulielo ni ku mwono wetu nawa.

¹⁰ Paulu yasoneka ha 1 A-Korindu 16:14 ngwenyi: “Yuma yize yeswe munulinga yilingenu ni zango.” Yiyulo akukwata hakutwala kuli atu ja Zambi kakuyikwata ni zango. Hakutwala ku zango, mukanda wa 1 A-Korindu 13:4-8 unambe ngwo: “Zango uhomboloji lili nawo, utu lili nawo. Zango kulishi kupwa ni lufwachinda. Zango kulishi kulisangala, kulishi kulifuza. Kulishi kulinga chize kuchatele, kulishi kufupa yuma yalio-liene, kulishi kutenuka nikawashi, kulishi kushinginyeka yipi; kulishi kuwahilila mu uhenge, alioze kuliakuwahilila mu umwenemwene. Kuliakulihumikiza ni yuma yeswe, kuliakufuliela yuma yeswe, kuliakutalatala yuma yeswe, kuliakunyongonona mu yuma yeswe. Zango kulishi kuhwa nilimwe tangwa.” Kashika tujikijilenu ha usongwelo uze akutwaha, mumu hitwamona ngwetu yiyulo yeswe akukwata hakutwala kuli tuvumbi twa Yehova kakuyikwata ni zango. Chikwo nawa, yino yeswe yinasolola zango lia Yehova.

¹¹ Eswe waze Yehova anazachisa hanga asongwele atu jenyi kali yihenge, ngwe chize chapwile ku sekulu yitangu. Chochene, Yehova kazachishile atu yihenge ku mashimbu akunyima ha kumanununa upale wenyi. Noa katungile ulungu ni kwambujola hakutwala ku unongeso uze wejile ha matangwa jenyi. (Uputu. 6:13, 14, 22; 2 Petu. 2:5) Mose kamutongwele hanga achize atu ja Yehova ku Engitu. (Kutuhu. 3:10) Zambi yasongwela malunga yihenge hanga asoneke Mbimbiliya. (2 Timo. 3:16; 2 Petu. 1:21) Kutwatambile kwecha kujikijila ku ululikiso wa Zambi musono, mumu ngwo Yehova kanazachisa yihenge hanga asongwele mulimo wa kwambujola ni kutayisa tumbaji. Alioze tuujikijilenu, mumu tunanyingika ngwetu ululikiso wacho kuuchi kuhasa kulinga nichimwe chakuhona ukwaso wa Yehova. Chipwe ngwe ululikiso wa Yehova kuwakupalika mu yimwe yipikalo, nihindu ndungo wamwenemwene kakusolola ngwenyi spiritu ya Zambi ye yinasongwela yuma. Musono, chihanda cha ululikiso wa Yehova hano hashi chinatambula yiwape yinji. Kashika, twatamba kuukwasa ni kuujikijila ni mbunge yetu yeswe.

¹² Eswe waze akutongola hanga atambule yiteli mu chikungulwila, kakusolola ufulielo wo ha kutayiza ni chiseke milimo akwaha ni kuyilinga ni mbunge yeswe. (Yili. 20:28) Ni yetu akwa-kwambujola Wanangana, twatamba kwambujola ni mbunge yeswe ku zuwo ni zuwo, kufunyina atu ni kusongwela malongeso a Mbimbiliya. (Mateu 24:14; 28:19, 20) Nyi tunazange kuyuka ha kulia cha ku spiritu chize ndungo wamwenemwene akuhana, twatamba kulilulieka ni kuya ku kukunguluka cha chikungulwila, cha mbonge ni cha mambonge. Twakuyuka chinji ha kupwa hamwe ni mandumbu jetu ha kukunguluka chacho.—Hepre. 10:24, 25.

¹³ Twakujikijila chinji mu ululikiso wa Zambi muze twakuukwasa ha kuhana milambu. (Yishi. 3:9, 10) Nyi twamona ngwetu mandumbu jetu kanafupiwa umwe ukwaso, twakwakwasa kawashi-washi. (Ngala. 6:10; 1 Timo. 6:18) Twakuchilinga hamukunda wa zango, hanga tusolole kuli Yehova ni ululikiso wenyi ngwetu twakusakwilila chinji ha yiwape yeswe yize akutwaha.—Yoa. 13:35.

¹⁴ Twakusolola nawa ngwetu twakujikijila mu ululikiso wa Zambi ha kukaula yiyulo yize akukwata mu ululikiso wacho. Twakulinga chino, ha kwononokena usongwelo uze akutwaha kuli waze anatusongwela, ngwe tulayi a mambonge ni makulwana a mu yikungulwila. Mandumbu jacho no kali mukachi ka ‘tusongo twetu’ waze twatamba kwononokena ni kuzeyela. (Hepre. 13:7, 17) Chipwe ngwe kutwanyingikine yize akwachila yiyulo yimwe, nihindu tunanyingikenu ngwetu kuyikaula muchitukwasa chinji. Hakulinga chino, Yehova matuwahisa mumu tunononokena Liji lienyi ni ululikiso wenyi. Chocho, mutusolola ngwetu tunazeyela Mwata wetu, Yesu Kristu.

¹⁵ Ewa, twatamba kujikijila pundu muli ndungo wamwenemwene, wakanyama. Zambi ya mwakono Satana, kanase tachi jinji hanga asawise jina lia Zambi ni ululikiso wenyi. (2 Kori. 4:4) Kanda tufwa mu miheto ya Satana. (2 Kori. 2:11) Iye kananyingika ngwenyi “mwaka ukepe wika ali nawo” hanga amunyase mu jondo, kashika anase tachi apiangule atu anji a Yehova. (Uso. 12:12) Kashika, amu Satana anase tachi hanga apiangule atu, etu tukundamenu wika kuli Yehova. Tufulielenu muli Yehova ni jila yize anazachisa hanga asongwele atu jenyi musono. Nyi twachilinga, mutulinunga ni mandumbu jetu eswe a mu ufulielo.