Vumbi ni Ulemu Mushi lia Ufunge wa Zambi

MUZE apwile hano hashi, Yesu kembulwile kanawa utu ni chize Tato wa mu malilu akulinga yuma. Iye kambile ngwenyi: “Chishi kulinga nichimwe cha kuli yami mwene; alioze chizechene ngwe Tata wangulongesele, yenayo nakuhanjika . . . nakulinga matangwa eswe yuma yize ya kupemena kuli iye.” (Yoano 8:28, 29; A-Kolosu 1:15) Nyi twahengwola mutapu uze Yesu apwile ni kuhanjika ni mapwo ni chize te akunyonga hali ayo, muchitukwasa kunyingika chize Zambi akunyonga hali mapwo ni chize iye anazange hanga tutwame no.

Kulita ni mikanda ya Evanjelu, amwe akwa-mana kambile ngwo, mutapu uze Yesu apwile ni kuhanjika ni mapwo te walisa ni chize atu ha mashimbu jenyi apwile ni kuhanjika no. Mu mulali uka? Chikwo nawa chili chilemu kulihula ngwe, shina malongeso a Yesu ni haliapwila kakukwasa mapwo kupwa ni utuswilo?

Yesu kakapwile ni kumona mapwo ngwe kaatangile mumu lia kulisumbakenya. Kulita ni kunyonga cha amwe mangana a uwayilo wa A-Yunda, nyi mutu mahanjika ni umwe pwo hanji lunga, te muchimutwala ku usolo wa kulinga utanji. Amu apwile ni kwamona ngwe chitalingiso, mapwo te kakwakanjisa kuhanjika ni atu a malunga ha mbunga hanji kukatuka cha chakuhona kufuka kumeso. Chikwo nawa, Yesu kakakanjishile malunga kuhanjika ni mapwo, alioze katowezele malunga hanga afunge usolo wo ene ni kulemesa mapwo.—Mateu 5:28.

Yesu kambile nawa ngwenyi: “Mweswawo malakula mukwo-pwo akambate weka mavulumuna pwo lienyi mulonga wa utanji.” (Marku 10:11, 12) Iye yalituna a longeshi waze te akutayiza malunga kulakula mapwo jo “mumu lia chikuma cheswacho.” (Mateu 19:3, 9) Nyonga lia kuvulumuna pwo mulonga wa utanji A-Yunda anji te kalinyingikine. Alongeshi jacho te kakulongesa ngwo, lunga kechi kuhasa kulinga utanji hanyima lia pwo lienyi, alioze pwo wika mwe mahasa kuchilinga! Kulita ni limwe kumbululo hakutwala ku Mbimbiliya, “Yesu ha kusa shimbi yimuwika hali pwo ni lunga, yazundula ulemu wa mapwo.”

Chize malongeso a Yesu anakwate ku mwono wa atu musono: Mu yikungulwila ya Yela ja Yehova, mapwo kakusehejela kanawa ni malunga chakuhona kwaachina. Alioze, ayo katambile kwevwila woma mumu kaanyingikine kanawa, hanji chize akusoloka, mumu malunga a ku ufulielo kakukeya hanga amone “makulwana ja mapwo ngwe amama; mapwo ni miaka yikepe ngwe mapangi, ni kulinanga cheswe.”—1 Timoteu 5:2.”

Yesu kapwile ni mashimbu akulongesa mapwo. Kulisa ni alongeshi waze apwile ni kulengulula mapwo, Yesu kaalongesele ni kwatakamisa hanga apwe ni kukasunuka muze anahanjika. Ha chisuho chimwe, muze iye alitunyine kukanjisa Maria ha uwahililo wa kulilongesa, Yesu kasolwele ngwo chihela cha mapwo hi wika ko kuteleka. (Luka 10:38-42) Malongeso a Yesu kakwashile chinji Marta mwakwo ya Maria, chino chasolokele zwalala ha makumbululo apema waze ahanyine hanyima muze Lazaru afwile.—Yoano 11:21-27.

Yesu kapwile ni kulihulumba ha yize mapwo te akunyonga. Ha mashimbu jacho, mapwo anji A-Yunda kapwile ni kufuliela ngwo mba mutu awahilile ku mwono, katamba kupwa ni mwana wa lunga, nyi muchilita yoze uli profeta. Muze umwe pwo unakakolojoka ngwenyi: “Jimo lize lianusemene kuliawaha!” Yesu yawana uhashi hanga amulweze chimwe chuma chipema. (Luka 11:27, 28) Ha kusolola ngwo ufulielo che chuma chitangu chahiana ulemu, Yesu yamulweza chimwe chuma chilemu chahiana yize akwalongesa kulinga.—Yoano 8:32.

Chize malongeso a Yesu anakwate ku mwono wa atu musono: Mu yikungulwila ya akwa-Kristu makulwana kakuwahilila ni makumbululo waze mapwo akuhana muze twakukunguluka. Ayo kakulemesa mapwo waze ajama ha kupwa “alongeshi a yuma yipema” ni yilweza yo ya utakamiso. (Titu 2:3) Chikwo nawa kakwajikijila ha kwambujola sango lipema lia Wanangana wa Zambi.—Masamu 68:11; tala mushete “Shina Postolo Paulu Kakanjishile Mapwo Kuhanjika?” ha lifwo  9.

Yesu kapwile ni kufunga kanawa mapwo. Ha mashimbu akunyima, atu kapwile ni kulengulula ana a mapwo ni kulemesa ana a malunga. Hakutwala ku chikuma chacho, yimwe shimbi ya Talmude yakwamba ngwo “Kawaha yoze uli ni ana a malunga, kuhiana yoze uli ni ana a mapwo.” Yisemi amwe kapwile ni kumona mwana wa pwo ngwe yimwe yilemu, ayo te katamba kumufupila umwe lunga ni kumufweta, nawa te keshi kuhasa kumujikijila muze ayo mapwa tushinakaji.

Yesu kasolwele ngwenyi mwono wa mwana wa pwo te uli ulemu ngwe chizechene mwono wa mwana wa lunga uli, kashika ahindwishile mwana wa pwo wa Yaru, ngwe chizechene ahindwishile mwana wa lunga wa umwe tuliwa wa ku Naine. (Marku 5:35, 41, 42; Luka 7:11-15) Hanyima lia kuwuka umwe pwo yoze te unanenganyana ni “spiritu ya kuyiza kumi ni miaka nake,” Yesu yamusanyika ngwo “mwana wa Apalahama,” maliji waze keshi kusoloka mu yisoneko ya A-Yunda. (Luka 13:10-16) Ha kuzachisa maliji wano a vumbi nawa a zango, iye kakamumwene wika ngwe yoze wakutwama mu chihunda, alioze kamwene nawa ufulielo wenyi ukolo.—Luka 19:9; A-Ngalashia 3:7.

Chize malongeso a Yesu anakwate ku mwono wa atu musono: Amwe maliji a ku Ásia kakwamba ngwo: “Kukolesa mwana wa pwo chili ngwe kuhinjila meya mu munda wa mwenyembo we.” Yisemi akwa-Kristu a zango, keshi kukaula nyonga lia mutapu au. Kakufunga kanawa ana jo eswe a mapwo ni a malunga. Chikwo nawa, kakusa tachi hanga aalongese ni kwafunga kanawa ku mujimba.

Yesu kafulielele mapwo. Mu yota ya kusopesela ya A-Yunda, uchela uze mutu wa pwo apwile ni kwambulula kapwile wika ni kwaamona kulita ni manyonga ja kapinji. Josefo umwe mukwa-kuhengwola sango ja shakulu yamba ngwenyi: “Kutushi kuhasa kutayiza uchela wa atu a mapwo mumu chize aatangile.”

Kulisa ni mukwa-kuhengwola yono, Yesu yasakula mapwo hanga apwe yela a uhindukilo wenyi. (Mateu 28:1, 8-10) Chipwe ngwe mapwo jacho kamwene chize amushihile ni kumufunda Mwene wo, nihindu yichipwa chikalu hanga apostolo aafuliele. (Mateu 27:55, 56, 61; Luka 24:10, 11) Alioze, ha kusoloka chitangu kuli mapwo, Kristu yasolola ngwo ayo mahasa kupwa ni chihanda ha kwambujola ngwe chizechene tumbaji twenyi apwile ni kulinga.—Yilinga 1:8, 14.

Chize malongeso a Yesu anakwate ku mwono wa atu musono: Mukachi ka Yela ja Yehova, malunga waze ali ni yiteli mu yikungulwila, kakusolola ngwo kakulemesa mapwo ha kutala kanawa ha yize mapwo akufupiwa. Malunga akwa-Kristu ‘kakusela ulemu’ mapwo jo muze akwapanjika kanawa.—1 Petulu 3:7; Uputukilo 21:12.

Muze malunga akukaula chilweza cha Kristu, mapwo kakulivwa ngwo kali alemu nawa kali ni utuswilo ngwe chize Zambi azangile. (Uputukilo 1:27, 28) Shimbu apwe akwa-kutumina, malunga akwa-Kristu kakwecha hanga shimbi ja mu Mbimbiliya jaasongwele, chino chakukwasa hanga mapwo jo awahilile.—A-Efwesu 5:28, 29.

Tutalenu chilweza cha Yelena. Iye kapwile ni kumona lamba mumu lia kumuhungumuna kuli mukwo-lunga, yoze wakolele ku chihela chize te akutayiza hanga mapwo aambate kutachi hanji kwalamba-lamba. Hazehene, Yelena yaputuka kulilongesa Mbimbiliya. Iye yamba ngwenyi: “Yuma yize nalilongesele mu Mbimbiliya yangutakamishine chinji.” “Yingunyingika ngwami, kuma kwapwile umwe yoze te wakunguzanga chinji, wakungulemesa ni kulihulumba hali yami. Chikwo nawa yingunyonga ngwami, nyi mukwetu-lunga neye malilongesa Mbimbiliya, chino muchimukwasa hanga alumune yitanga yenyi yipi yakungumwesa lamba. Yize napwile nikushimbwila yamanunukine muze mukwetu-lunga atayijile kulilongesa Mbimbiliya ni kumupapachisa hanga apwe Chela cha Yehova.” Yelena yamba nawa ngwenyi, “iye yapwa chilweza chipema cha kulihumikiza. Twalilongesele kulikonekena umwe ni mukwo.” Chikwo nawa yino yangwaha shindakenyo ngwami: “Shimbi ja mu Mbimbiliya jangukwasa kulivwa ngwo nguli ni ulemu ni ufunge mu ulo wami.”—A-Kolosu 3:13, 18, 19.

Yino kuyishi kulingiwa wika kuli Yelena. Tununu a tununu a mapwo akwa-Kristu kanawahilila mumu kakusa tachi hanga akaule shimbi ja mu Mbimbiliya mu ulo hamuwika ni malunga jo. Chikwo nawa, ayo kakuwana utakamiso ni vumbi muze akupwa hamuwika ni mandumbu jo akwa-Kristu.—Yoano 13:34, 35.

Akwa-Kristu eswe malunga ni mapwo, kananyingika ngwo, ayo kali yivulumunyi nawa yihenge. Alioze muze akusa tachi hanga akundame kuli Tato wa zango Yehova, ayo kali ni kutalatala cha ‘kutusuka ku undungo wa kupola ndo ku kutusuka cha uhenya wa ana a Zambi.’ Chino chili kutalatala chipema chize alinacho malunga ni mapwo waze ali mushi lia ufunge wa Zambi!—A-Roma 8:20, 21.