Kuchi Mutuhasa Kusolola Ngwetu Twakuzanga Yehova?

1, 2. Kuchi Yehova anatulongesa kumuzanga?

JILA yipema yize umwe chisemi mahasa kulongeselamo ana jenyi, yili ha kwaasolwela chilweza chenyi mwene. Muze iye masolola zango hali ana jenyi, iye kanaalongesa chize atamba kusolola zango. Kukushi nawa niumwe yoze wakutuzanga chinji kuhiana Tata yetu Yehova. Kashika mutulilongesa chize twatamba kusolola zango “mumu iye waliangile kutuzanga.”—1 Yoano 4:19.

² Mu jila yika Yehova akusolwela ngwenyi iye mwe “waliangile kutuzanga”? Mbimbiliya yinambe ngwo: “Shimbu te tuchili yivulumunyi, Kristu watufwilile.” (A-Roma 5:8) Tata yetu ya zango Yehova, kahanyine mwanenyi ngwe ukuule hanga atupulwile ku shili ni kufwa. Chawana chino chilemu chapwisa chashi, yetu kukundama kuli Yehova ni kusolola zango lietu hali iye. Ha kuhana chitapo chino chinene, Yehova yahana chimwe chilweza. Iye yatulongesa ngwenyi twatamba kusolola zango lingunu ni kupwa yihanyi.—1 Yoano 4:10.

3, 4. Kuchi mutuhasa kusolola ngwetu twakuzanga Yehova?

³ Zango lili ndako yinene ya Yehova. Kashika mutuhasa kunyingika mumu liaka Yesu ambile ngwenyi shimbi yilemu yili ngwo: “Ukazanga Mwene Zambi ye ni mbunge ye yeswe, ni mwono we weswe, ni kunyonga che cheswe, ni ngolo je jeswe.” (Marku 12:30) Yehova kanazange hanga tumuzange ni “mbunge yeswe.” Chakuneha yinyengo yinji kuli Yehova nyi mutuzanga chinji umwe mutu hanji chimwe chuma kuhiana iye. Zango lietu kuli Yehova kuliatambile kupwa wika ku manyonga. Alioze Yehova kanatwite hanga tumuzange ni ‘kunyonga chetu cheswe’ ni ‘ngolo jetu jeswe.’ Chino chinalumbunuka ngwo lietu kuli Yehova linatale ha chize twanyonga ni yize twakulinga.—Tanga Mika 6:8.

⁴ Kashika twatamba kuzanga Yehova ku yitanga yetu eswe yaku mwono ni yuma yeswe yize tuli nayo. Nyi mutumusa kulutwe ku mwono wetu, mutusolola ngwetu chamwenemwene twakumuzanga. Mutwe uze wahwanga, twalilongesanga majila awana waze Yehova akusolwelamo zango lienyi kuli ana jenyi. Haliapwila tutalenu chize mutuhasa kukolesa zango lietu kuli Yehova ni kusolola ngwetu twakumuzanga.

 5. Muze mutunyonga ha yize yeswe Yehova akulinga hali yetu, yika yetu mutuzanga kulinga?

⁵ Nyi mutu matwaha chimwe chawana, kota yetu twakusolola usakwililo unji. Mumu twalemesa chawana chacho, nawa mutuchizachisa. Tiangu yasoneka ngwenyi: “Kuhana cheswe chipema ni yawana yeswe yingunu kuyakuhulumuka kwilu, ya kuli mwe Tata wa pangu, muli iye kumushi kwalumuka, chipwe chizulie cha kutewuluka.” (Tiangu 1:17) Kashika twakusakwilila chinji ngwetu Yehova kakutwaha yuma yeswe yize tunafupu hanga tupwe ni mwono nawa tuwahilile. Tunanyingika ngwetu iye kakutuzanga chinji nawa tunazanga kusolola kuli iye ngwetu ni yetu twakumuzanga. Shina yena che wakwivwa?

 6. Yika A-Izalele te atamba kulinga nyi te mazanga hanga Yehova awahise?

⁶ A Izalele katambwile yuma yinji yipema kuli Yehova. Ha kulakaji ja miaka iye yaasongwela ni shimbi jenyi, nawa yaaha yuma yeswe yize te ayo akufupa ku mwono wo. (Shimbi Yamuchiali 4:7, 8) Nawa A-Izalele kachi kasololwele kusakwilila cho kuli Yehova ha kwononokena shimbi jacho. Chakutalilaho, muze ayo apwile ni kuhana yitapo hanji milambu ayo kapwile ni kumwaha mihuko “yitangu ya kulia ya ku mbuto ya mu minda” yo mu chifuchi. (Kutuhuka 23:19) A-Izalele kanyingikine ngwo Yehova te manunga ni kwaawahisa nyi mamwononokena ni kumwaha yuma yipema yize apwile nayo.—Tanga Shimbi Yamuchiali 8:7-11.

 7. Kuchi mutuhasa kuzachisa “yikumba” yetu ya ndando hanga tusolole ngwetu twakuzanga Yehova?

⁷ Ni yetu nawa mutuhasa kusolola ngwetu twakuzanga Yehova hakumwaha “yikumba” yetu ya ndando. (Yishima 3:9) Twakuchilinga ha kuzachisa yuma yize tulinayo hanga tumuhalise. Chakutalilaho, mutuhasa kuhana milambu hanga tukwase mulimo wa Wanangana mu chikungulwila chetu ni hashi heswe. Chipwe ngwetu tukwete upite hanji tuli yiswale, yetu eswe mutuhasa kuhana yize tuli nayo hanga tusolole zango lietu kuli Yehova. (2 A-Korindu 8:12) Alioze kuli jila yikwo yize mutuhasa kusolola kuli Yehova ngwetu twakumuzanga.

8, 9. Jila yikwo yika yize mutusolwela kuli Yehova ngwetu twakumuzanga? Yika Mike ni asoko jenyi alingile?

⁸ Yesu katulongesele hanga tuliange kufupa chitangu Wanangana nawa kutwatambile kulipikala ni kulia hanji ni kuzala. Tata yetu kanalakenya kutwaha yuma yize mutufupa. (Mateu 6:31-33) Mutujikijila kuli Yehova ha kunyingika ngwetu iye makamanununa yilakenyo yenyi. Kwamba umwenemwene, nyi twakuzanga chinji umwe mutu, yetu mutujikijila muli mutu wacho. Ha chino, nyi twajikijila chinji muli Yehova, mutuhasa kusolola ngwetu twakumuzanga chinji. (Samu 143:8) Kashika mutuhasa kulihula ngwetu: ‘Manyonga jami ni chize nakuzachisa mashimbu jami ni tachi jami chakusolola ngwo chamwenemwene nakuzanga lume Yehova? Shina matangwa eswe, yami nakujikijila muli Yehova ngwami kakungufunga?

⁹ Mike ni asoko jenyi te kakujikijila muli Yehova. Muze Mike te uchili mukweze iye kazangile chinji kuya ni kwambujola sango lipema mu chifuchi chikwo. Chipwe muze te hambata kulu nawa te hapwa ni ana aali nihindu iye te uchili ni nyonga liacho. Muze Mike ni asoko jenyi atangile hakutwala kuli mandumbu ni mapangi akwo, waze apwile ni kukalakala kuze te kunafupiwa chinji akwa-kwambujola sango lipema, o yakwata chiyulo chakutepulula yimwe yuma ku mwono wo. Ayo yalanjisa zuwo lio linene, yaya ni kutwama mu zuwo likehe. Mike nawa yatepulula mingoso yenyi nawa yawana mwakulingila mingoso yacho mu chifuchi chikwo ha kuzachisa Internet. Ha chino, Mike ni asoko jenyi yahasa kuya mu chifuchi cheka, nawa yazanga chinji mulimo wo wa kwambujola sango lipema. Mike yamba ngwenyi, “Yetu twamwene kumanunuka cha maliji a Yesu ku mwono wami waze ali mu mukanda wa Mateu 6:33.”

10. Ngwe Mwanangana Ndawichi, mumu liaka chili chipema kuli yetu kupukuna ha yuma yize tunalilongesa hakutwala kuli Yehova?

¹⁰ Mwanangana Ndawichi yasoneka ngwenyi: “Malilu kakwambujola ulemu wa Zambi, Che kuzazuluka cha mwilu chakulweza utotombo wenyi.” Yawejela nawa ngwenyi: “Shimbi ya Yehova yingunu; yakuhuzulula mbunge. Shindakenyo ya Yehova kuyakola yakukanyamisa yizuzuke.” Muze Ndawichi apukwine ha shimbi ja mana ja Yehova ni ha yitangiwa yenyi yipema, iye kakundamine kuli Yehova nawa kazangile kusolola zango lienyi kuli iye. Ndawichi yamba ngwenyi: “Maliji a mu kanwa liami, ni kupukuna cha mbunge yami chikapeme kumeso je, yena Yehova liwe liami, kanda Mukwa-Kungukula.”—Samu 19:1, 7, 14.

11. Kuchi mutuhasa kuzachisa chinyingi chize Yehova akutwaha hanga tusolole zango lietu hali iye? (Tala chizulie cha uputukilo)

¹¹ Musono Yehova kanatulongesa yuma yinji hakutwala kuli iye, upale wenyi, yitangiwa yenyi, ni Liji lienyi. Atu anji hano hashi kakwaakolweza hanga alilongese, alioze shikola jinene-jinene ha mashimbu anji jakulingisa atu hanga atokese zango lio kuli Zambi. Kulisa ha chino, Yehova keshi kuzanga wika hanga tupwe ni chinyingi, alioze iye nawa kakutukwasa hanga tupwe ni mana. Iye kanazange hanga tuzachise yuma yize twakulilongesa ha upeme wetu ni kukwasa akwetu. (Yishima 4:5-7) Chakutalilaho, iye kanazange hanga twambujole “chinyingi cha umwenemwene,” kuli akwetu ni kwaakwasa hanga akalilamwine. (1 Timoteu 2:4) Twakusolola zango lietu kuli Yehova ni kuli atu ha kwaalongesa hakutwala ku Wanangana wa Zambi ni yuma yize muukalinga hali atu.—Tanga Samu 66:16, 17.

12. Yika umwe mukweze wa pwo ambile hakutwala ku chimwe chawana cha kuli Yehova?

¹² Akweze no mahasa kupukuna ha yuma yeswe yize Yehova akwaaha ni kwaalongesa. Shannon nihindu kakwiwuluka chize evwile ha chimwe kukunguluka cha mambonge cha kwamba ngwo, “A Devoção Piedosa,” chize akungulukile muze te uchili ni miaka 11 hamwe ni mwanakwo wa pwo wa miaka 10. Ha amwe mashimbu a kukunguluka chacho cha mambonge akweze eswe, hamwe ni Shannon ni mwanakwo yaalweza hanga atwame ku chimwe chihela cheka. Ku uputukilo, iye te keshi kuhasa kuhwima mbunge. Alioze yakomoka chinji ha kumona akweze eswe te kanatambula mukanda Os Jovens Perguntam—Respostas Práticas. Kuchi aye evwile hakutwala kuli Yehova muze atambwile chawana chino chipema? Aye yamba ngwenyi: “Ha shimbu liacho namwene ngwami Yehova kali wamwenemwene nawa kakunguzanga chinji. Tunawahilila chinji kuli Zambi yetu munene Yehova yoze wakutwaha yuma yino yipema, yawana yingunu!”

13, 14. Yika twatamba kulinga nyi Yehova matufumba, nawa mumu liaka?

¹³ Mbimbiliya yinatwiwulula ngwo: “Mweswe Yehova kamuzanga kakumukanjisa, ngwe lunga kakukanjisa mwanenyi yoze wamuwahila.” (Yishima 3:12) Nyi mututayiza fumbo lia Yehova ni kwecha hanga atulongese, mutulilongesa kulinga yuma yipema ni kupwa ni sambukila. Chochene, “lamba lieswe lia kufumba linasoloka haliapwila ngwe kulishi uwahililo, alioze chinyengo wika.” (A-Hepreu 12:11) Chipwe chocho, yika twatamba kulinga nyi Yehova matufumba? Kutwatambile kulengulula chiyulo cha Yehova hanji kwivwa uli nyi kutwazangile kulinga hanji kwivwa yuma yize anatulweze. Twakuzanga Yehova, kashika twakupanjika kuli iye ni kwalumuna yitanga yetu.

¹⁴ Ha mashimbu a Malakia, A-Yunda kakapwile ni kukaula shimbi ja Yehova. Ayo kakapwile ni kuhana ulemu ha kunyingika ngwo yitapo yize apwile ni kuhana te yishi kuwahilila Yehova. Kashika, Yehova ahele chiyulo chilemu hakutwala ku yitanga yacho. (Tanga Malakia 1:12, 13.) Kwamba umwenemwene, Yehova kaahele yiyulo ha mashimbu anji, alioze ayo kakapwile ni kumupanjika. Kashika, iye aalwezele ngwenyi: “Mungutuma shingo hali yenu. yiwape yenu munguyishinga.” (Malakia 2:1, 2) Chili zwalala ngwo, nyi twanunga ni kulengulula chiyulo cha Yehova hanji kunyonga ngwo kuchishi ni ulemu, mutupihisa usepa wetu ni iye.

15. Manyonga aka twatamba kwehuka?

¹⁵ Hashi ha Satana hakukolweza atu hanga alisute ni kuhona zango lingunu. Atu anji keshi kuzanga kwaafumba hanji kwaalweza yize malinga. Amwe kakupanjika chiyulo mumu kanachizange. Yetu kutwatambile kupwa ngwe atu amutapu au. Mbimbiliya yinatulweze ngwo “kanda nuliendela ni ndako ja mwakono.” Ha chino twatamba kunyingika yuma yize Yehova anashimbwila hali yetu ni kulinga yuma yize muyimuvwisa kuwaha. (A-Roma 12:2) Iye kakuzachisa ululikiso wenyi hanga atwehe yiyulo ha mashimbu alita. Chakutalilaho, kakutwiwulula hakutwala ku usepa wa mapwo ni malunga waze kanda achilimbata, chize twatamba kusakula masepa jetu ni chize twatamba kukwata chiyulo ha mashimbu a kuheha ni kulenga. Muze mututayiza ni zango lieswe fumbo lia Yehova ni kulinga yuma yize muyimuvwisa kuwaha, mutusolola ngwetu tunasakwilila ha usongwelo wenyi nawa ngwetu twakumuzanga chinji.—Yoano 14:31; A-Roma 6:17.

16, 17. (a) Mumu liaka twatamba kunyingika chitangu yize Yehova kunyonga mba tukwate yiyulo? (b) Kuchi A-Izalele asolwele ngwo te keshi kujikijila kuli Yehova?

¹⁶ Twanuke kakujikijila kuli yisemi jo hanga akwase ni kwaafunga. Chipwe makulwana no mahasa kwita ukwaso kuli yisemi jo. Ayo kananyingika ngwo chipwe makwata yiyulo yo ene, nihindu yisemi jo mahasa kwaaha usongwelo upema. Tata yetu, Yehova, kakutwecha hanga tukwate yiyulo yetwene. Amu twakujikijila kuli iye ni kumuzanga, kashika mashimbu eswe twakumwita ukwaso ni kufupa kunyingika chize iye akunyonga muze kanda tuchikwata chiyulo nichimwe. Nyi mutujikijila kuli Yehova, iye matwaha spiritu yenyi yisandu hanga yitukwase kulinga yuma yize yalita.—A-Fwilipu 2:13.

¹⁷ Ha mashimbu a Samuele, A-Izalele kahonene kukumba jita ni A-Filistea. Shimbu te ahule kuli Yehova yize te atamba kulinga, ayo yamba ngwo: “Tusakenu mushete wa usendo wa Yehova ku Shilo, mba muze muheta hakachi ketu muutulamwina kuli akwa kole jetu.” Mba yika yilingiwile ha chiyulo chize akwachile? “Kwapwile kushiha chinene, mumu kwafwile akuli A-Izalele makumi atatu atununu (30.000) a maswalale akwenda hashi.” (1 Samuele 4:2-4, 10, 11) A-Izalele kanyongene ngwo nyi hambata wika Mushete wa usendo mukachi ko, Yehova te makwasa ni kwaafunga. Alioze ayo kaketele ukwaso wa Yehova hanji kufupa kunyingika yize te akunyonga. Muze, ayo alinge yize te ananyongo ngwo yinapeme, ayo yamona lamba.—Tanga Yishima 14:12.

18. Yika Mbimbiliya yakulongesa hakutwala ku kujikijila kuli Yehova?

¹⁸ Umwe mukwa-kwimba Masamu yoze wazangile chinji Yehova ni kujikijila muli iye yasoneka ngwenyi: “Talatala kuli Zambi, mumu mungwiza kumuhalisa ha kungukwasa ku meso jenyi. Zambi yami, mbunge yami yinahongo muchima, kashika nakukwiwuluka.” (Samu 42:5, 6) Shina ni yena che wakwivwa hakutwala kuli Yehova? Shina yena wakukundama kuli iye ni kumujikijila? Ena muhasa kujikijila chinji kuli iye. Mbimbiliya yinatulweze ngwo: “Fuliela Yehova ni mbunge ye yeswe; kanda ukajikijila ha malinjekela ja yena mwene. Ukamutayize mu yilinga ye yeswe mba iye makalulamisa majila je.”—Yishima 3:5, 6.

19. Kuchi mutusolola ngwetu twakuzanga Yehova?

¹⁹ Amu hanatuzanga chitangu, Yehova kakutulongesa chize mutuhasa kumuzanga. Mashimbu eswe tunyongenu ha yize akulinga hali yetu, ni chize iye akutuzanga chinji. Ha chino mutusolola ngwetu twakumuwayila ni mbunge yetu yeswe, ni mwono wetu weswe, ni kunyonga chetu cheswe ni ngolo jetu jeswe.—Marku 12:30.