Kuchi Muhasa Kupwa ni Uwahililo mu Usoko?—Chihanda 2

Ana kali chawana cha Yehova. Iye kakushimbwila hanga yisemi afunge kanawa chawana chacho. Yehova kakuhana usongwelo unji kuli yisemi hanga ahase kuchilinga. Usongwelo wacho wakusolola yize ana mahasa kulinga hanga usoko wo upwe ni uwahililo.

1. Usongwelo uka Yehova akuhana kuli yisemi?

Yehova kakushimbwila hanga yisemi azange ana jo ni kupalikisa mashimbu hamwe no. Kanazange nawa hanga yisemi afunge ana ku yuma yipi ni kuzachisa shimbi ja Mbimbiliya hanga aafumbe. (Yishima 1:8) Yehova kanalweze yisemi ngwenyi: ‘Lelenu [ana jenu] ni . . . kukanyamisa cha Mwene.’ (Tanga A-Efwesu 6:4.) Yehova kakuwahilila muze yisemi akukaula usongwelo uno wa kufumba ana jo, chakuhona kuhana chiteli chacho kuli atu akwo.

2. Usongwelo uka Yehova akuhana kuli ana?

Yehova kanalweze ana ngwenyi: “Ononokenu kuli yisemi jenu.” (Tanga A-Kolosu 3:20.) Muze ana akuvumbika ni kwononokena yisemi jo, kakuvwisa Yehova ni yisemi jo kuwaha. (Yishima 23:22-25) Yesu kahanyine chilweza chipema muze apwile kanuke. Chipwe ngwe kapwile mungunu, nihindu kapwile ni kwononokena ni kuvumbika yisemi jenyi.—Luka 2:51, 52.

3. Kuchi munuhasa kukundama kuli Yehova ngwe usoko?

Nyi uli chisemi, kota unazange hanga ana je azange Yehova ngwe chize yena wakumuzanga. Kuchi muhasa kuchilinga? Ha kulinga yize Mbimbiliya yakwamba: ‘Nukalongese kanawa [maliji a Yehova] kuli ana jenu. Nukaatenge pande hakutwama mu mazuwo jenu, ha kwenda mu jila, ha kupomba chenu, ha kuhinduka chenu.’ (Shimbi Yamuchiali 6:7) ‘Kulongesa’ chinalumbunuka kufumba mwana yisuho yinji hakutwala ku chuma chimwe. Chisoneko chino chinalumbunuka ngwo, watamba kufupa uhashi wa kuhanjika ni ana je hakutwala kuli Yehova mashimbu eswe. Kashika, chili chipema kusa mashimbu hita poso hanga nulinge uwayilo wa mu usoko. Nyi ngwe kushi ni ana, muhasa kuyuka ha kusa mashimbu hita poso hanga ulilongese Liji lia Zambi.

NYINGIKA NAWA

4. Fumba ana je ni zango

Kufumba ana muchihasa kupwa chikalu. Kuchi Mbimbiliya muyihasa kukukwasa? Tanga Tiangu 1:19, 20, mba nushimutwine yihula yino:

• Kuchi yisemi mahasa kusolola zango muze anahanjika ni ana jo?

• Mumu liaka chisemi katambile kufumba mwanenyi muze anevu uli?a

5. Funga ana je

Nyi unazange kufumba ana je, chili chipema kuhanjika ni hita mwana hakutwala ku kulisumbakenya. Chino muchihasa kupwa chikalu. Tala CHINEMA, mba nushimutwine yihula yinahateho.

CHINEMA: Kufunga Ana Jetu ku Yuma Yipi (2:58)

• Mumu liaka chili chikalu kuli yisemi amwe kuhanjika ni ana hakutwala ku kulisumbakenya?

• Kuchi yisemi amwe alumbunwine kuli ana jo hakutwala ku chikuma cha kulisumbakenya?

Ngwe chize uprofeto wambile, hashi ha Satana kuhapiha chinji. Tanga 2 Timoteu 3:1, 13, mba nushimutwine chihula chino:

• Yingulungulu amwe waze anatongola ha versu 13, kali waze akupihisa twanuke. Mba mumu liaka chili chilemu kuli yisemi kuhanjika ni ana jo hakutwala ku kulisumbakenya ni chize atamba kulifunga kuli atu waze akupihisa twanuke?

Unachinyingika nyi?

Yela ja Yehova kakutuhwisa yikwata yinji, yize yakukwasa yisemi kulongesa ana jo hakutwala ku kulisumbakenya, ni kwafunga kuli akwa kupihisa twanuke. Tala chilweza:

• Funga Ana Je (chinema)

• Aprenda do Grande Instrutor, kapitulu 10 ni 32

• “Chize Muhasa Kuhanjika ni Ana je Hakutwala ku Kulisumbakenya” (Laulenu! No. 5 2016)

6. Vumbika yisemi je

CHINEMA: Kuchi Munguhasa Kuhanjika ni Yisemi Jami? (2:19)

• Mumu liaka chili chilemu twanuke hanji akweze kuhanjika ni vumbi kuli yisemi jo?

• Kuchi mukweze mahasa kuhanjika ni yisemi jenyi mu jila yize muyisolola ngwo kakwalemesa?

Tanga Yishima 1:8, mba nushimutwine chihula chino:

• Yika mukweze atamba kulinga muze yisemi jenyi mamutuma hanga alinge yimwe?

7. Wayilenu Yehova mu usoko

Asoko waze akuwayila Yehova, kakusakula mashimbu alita hita poso hanga alinge uwayilo wa mu usoko. Mba kuchi uwayilo wa mu usoko watamba kupwa? Tala CHINEMA, mba nushimutwine yihula yinahateho.

CHINEMA: Maliji Wano—Akapwe mu Mbunge Jenu—Kuhula Asoko (8:04)

• Kuchi asoko mahasa kupwa ni Uwayilo wa mu Usoko poso jeswe?

• Yuma yika chisemi wa lunga mahasa kulinga hanga alivwise kuwaha mu uwayilo wo wa mu usoko? Tala chizulie ku uputukilo wa longeso lino.

• Yuma yika muyihasa kukaliwisa kulilongesela hamuwika?

Ku Izalele ya ku shakulu, Yehova kapwile ni kushimbwila hanga atu mu usoko apwe ni kuhanjeka hakutwala ku Mbimbiliya. Tanga Shimbi Yamuchiali 6:6, 7, mba nushimutwine chihula chino:

• Kuchi muhasa kukaula chiyulo chino?

Yize munuhasa kulinga mu uwayilo wa mu usoko:

• Luliekenu kukunguluka cha chikungulwila.

• Tangenu umwe lusango wa Mbimbiliya ni kumushimutwina mu usoko.

• Nyi uli ni ana waze achili twanuke, chizenu yiheho ya twanuke ha site yetu jw.org.

• Nyi uli ni ana waze anayi ku ukweze, shimutwinenu yikuma hakutwala kuli akweze yize yili ha site jw.org.

• Linjisenu mu lusango wa Mbimbiliya.

• Talenu chimwe chinema ha site jw.org ni kuchishimutwina.

YIZE WALILONGESA

Yehova kanazange hanga yisemi azange, afumbe ni kufunga ana jo. Kanazange hanga ana avumbike yisemi jo. Chikwo nawa, kanazange hanga asoko amuwayile hamuwika.

Kuhitulula

• Kuchi yisemi mahasa kufumba ni kufunga ana jo?

• Kuchi ana mahasa kusolola ngwo kakulemesa yisemi jo?

• Yika asoko mahasa kuyuka nyi masa mashimbu hanga alinge uwayilo wa mu usoko?

HENGWOLA NAWA

Yuma yika muyihasa kukwasa ana je hanga akapwe makulwana ajama?

“Yikuma Yisambano Yize Twanuke Anafupiwa Kunyingika” (Laulenu! No. 2 2019)

Nyingika yiyulo yize Mbimbiliya yakuhana kuli waze akufunga yisemi jo waze hapwa tushinakaji.

“Yika Mbimbiliya Yakwamba Hakutwala ku Kufunga Yisemi Waze Hashinakajiwa?” (Lusango wa ha internet)

Tala chize lunga yoze te kanyingikine kufumba ana jenyi ahashile kupwa chisemi mupema.

Yehova Kakutulongesa Kufunga Usoko Wetu (5:58)

Tala chize yisemi mahasa kukolesa usepa ni ana jo,

“Kuchi Yisemi Mahasa Kupwa Masepa ja Ana jo?” (Kaposhi wa Kutalila 1 wa Novembro, 2011)