Shina Wakushimbwila “Limbo Lize Lili ni Fundamentu” Yamwenemwene?

 1. Yiyulo yika mandumbu anji akukwata, nawa mumu liaka?

TUVUMBI twa Zambi anji, kanahichika yuma yinji hanga ase Wanangana wa Zambi kulutwe. Mandumbu anji a mapwo ni a malunga, kanakwate chiyulo cha kununga twamishi. Waze alimbata, kanalitwamina kusema. Asoko anji, kanashiwisa mwono wo. Mba mumu liaka akukwata yiyulo yacho? Mumu kanazange kulihana chinji mu mulimo wa Yehova. Ayo kakuwahilila ni yize ali nayo, nawa kakufuliela ngwo, Yehova maaha yeswayo anahono. Shina mandumbu waze akukwata yiyulo yacho kumeza kaliseha limwe tangwa? Ka. Mumu liaka tunambe chocho? Tunambe chocho, mumu Yehova kafungile tuvumbi twenyi ku mashimbu a kunyima. Chakutalilaho, iye kawahishile Apalahama “tato ya waze eswe akufuliela.”—Roma 4:11.

 2. (a) Kulita ni A-Hepreu 11:8-10, 16, mumu liaka Apalahama ahichikile mbonge ya Ure? (b) Yika mutulilongesa ha mutwe uno?

² Apalahama kapwile ni mwono upema mu mbonge ya Ure, alioze, yasakula kuhichika mwono wacho. Mumu liaka? Mumu te kakushimbwila “limbo lize lili ni fundamentu” yamwenemwene. (Tanga A-Hepreu 11:8-10, 16.) “Limbo” lika lienalio? Yipikalo yika Apalahama apwile nayo muze te anashimbwila kutunga cha limbo liacho? Kuchi mutuhasa kwimbulula chilweza cha Apalahama, ni cha akwa-Kristu ha mashimbu jetu waze anembulula chilweza chenyi?

 3. Limbo lize Apalahama apwile ni kushimbwila yika?

³ Limbo lize Apalahama apwile ni kushimbwila, lili Wanangana wa Zambi. Wanangana wacho, kanauyulu kuli Yesu ni akwa-Kristu akuwayisa 144,000. Paulu kavulukile Wanangana wacho ngwo, “limbo lia Zambi ya mwono, Yerusaleme ya mwilu.” (Hepre. 12:22; Uso. 5:8-10; 14:1) Yesu kalongesele tumbaji twenyi ete Wanangana wacho mu yilemba, hanga wize ulinge upale wa Zambi hano hashi ngwe chize unalingi mu malilu.—Mateu 6:10.

 4. Kulita ni Uputukilo 17:1, 2, 6, yika Apalahama te ananyingika hakutwala ku limbo hanji Wanangana uze Zambi alakenyene?

⁴ Shina Apalahama kanyingikine sango jeswe hakutwala ku chize te Wanangana wa Zambi muupwa? Ka. Ha miaka yinji kunyima, sango ja Wanangana japwile ‘chijimbikilo chahengama.’ (Efwe. 1:8-10; Kolo. 1:26, 27) Alioze Apalahama kanyingikine ngwenyi, amwe a ku munyachi wenyi te mapwa mianangana. Yehova mwene mwe wayilakenyene kuli Apalahama. (Tanga Uputukilo 17:1, 2, 6.) Ufulielo uze Apalahama apwile nawo ha yilakenyo ya Zambi, wapwile ngwe kanamono yoze mapwa Mwanangana mu Wanangana wa Zambi, hanji ngwetu Mesaya. Kashika Yesu ambile kuli A-Yunda ha matangwa jenyi ngwenyi: “Kulwenu Apalahama walikwijile ha kumona tangwa liami; iye walimwene mba wawahilile.” (Yoa. 8:56) Yino yinasolola pundu ngwo, Apalahama kanyingikine ngwenyi, munyachi wenyi te muulinga umwe Wanangana ni ukwaso wa Yehova. Nawa yashimbwila kuli Yehova hanga amanunune chilakenyo chacho.

 5. Kuchi tunanyingika ngwetu, Apalahama kapwile ni kushimbwila limbo lize Zambi alakenyene?

⁵ Kuchi Apalahama asolwele ngwenyi, kanashimbwila limbo hanji Wanangana uze Zambi alakenyene? Chitangu, Apalahama kakakwashile unguvulu wa atu. Iye kanungine ni kutwama ku yihela yeka ni yeka, kashika kakakwashile wanangana niumwe wa atu. Chikwo nawa, kakesekele kusa wanangana wenyi mwene. Alioze, yanunga ni kwononokena Yehova ni kushimbwila ngwenyi, mamanununa chilakenyo chenyi. Ha kulinga chino, iye kasolwele ngwenyi kakufuliela chinji muli Yehova. Tutalenu yipikalo yize apalikile ni yize mutuhasa kulilongesa ha chilweza chenyi.

 6. Mbonge ya Ure kuchi yapwile?

⁶ Mbonge ya Ure kuze Apalahama apwile, te yipema chinji, yakufunga kanawa. Mbonge yacho, yapwile mukachi ka yipanga yisuku-yisuku, nawa te yatwama mukachi ka ngiji jitatu. Atu a mu mbonge ya Ure, te kalongoloka chinji ha sona. Kota atu kapwile ni kulinga mingoso yinji mu mbonge yacho, mumu akwa-kushikulwola kanakawanamo mikanda yinahanjika hakutwala ku mingoso. Mazuwo a mu mbonge yacho, kapwile akutunga ni tijolu, ni yikalakala yakukwita ulombo utoma. Mazuwo amwe kapwile ni yipatulo 13 hanji 14 yize te yikwete yiize mu mambango ni hashi ha kululieka ni mawe.

 7. Mumu liaka Apalahama te atamba kufuliela ngwenyi, Yehova te mamufunga hamwe ni usoko wenyi?

⁷ Apalahama kafulielele ngwenyi, Yehova te mamufunga hamwe ni usoko wenyi. Mumu liaka tunambe chocho? Mumu iye ni mukwo-pwo Sara, kahichikile mbonge yo yipema yaya ni kutwama mu mambalaka ku Kanana. Iye ni usoko wenyi, te kechi kutwama nawa mu mbonge yakutunga ni tijolu, yipanga yisuku-yisuku hanji yakujingilika ni ngiji. Hachino, te muchihasa kupwa chashi kwalinga upi kuli akwa-kole jo.

 8. Yika yalingiwile kuli apalahama ha limwe shimbu?

⁸ Apalahama kalingile upale wa Zambi, chipwe chocho te kakupalika mu yipikalo. Hakupalika cha mashimbu, mu mbonge yize Yehova atumine Apalahama, yimupwa kapunga. Yichipwa chikalu kuli Apalahama kulisa usoko wenyi. Hachino, yalukila ku Engitu hanga atwameko ha amwe mashimbu. Muze aheteleko, Falau mwanangana wa Engitu, yamutambula pwo. Alioze, ni ukwaso wa Yehova, Falau yafunyishina Apalahama mukwo-pwo. Shina muhasa kunyonga chize Apalahama evwile shimbu te kanda achimufunyishina pwo lienyi?—Uputu. 12:10-19.

 9. Kapinda muka wapwile mu usoko wa Apalahama?

⁹ Chikwo nawa, mu usoko wa Apalahama mwapwile kapinda munji. Mukwo-pwo Sara kapwile mumba. Ayo kanungine ni kapinda wacho ha miaka yinji. Kashika, Sara yahana ndungo yenyi Hekare kuli Apalahama apwe pwo lienyi hanga aasemene ana. Alioze muze Hekare apwile ni ufumba, yaputuka kulelesa Sara. Yuma yiyikala chinji mu usoko wacho, Sara yaputuka kupinjisa Hekare, chocho Hekare yachina ku zuwo.—Uputu. 16:1-6.

10. Yika yalingiwile kuli Ishemali ni Izake yize yesekele ufulielo wa Apalahama?

¹⁰ Hakupalika cha mashimbu, Sara yaka ufumba, hachino, yasemena Apalahama mwana wa lunga yoze avulukile ngwo, Izake. Apalahama te kakuzanga chinji ana jenyi eswe aali, Ishemali ni Izake. Alioze, amu Ishemali te akuhungumiona Izake, chocho Apalahama yamuhuma hamwe ni naye. (Uputu. 21:9-14) Kulutwe, Yehova yeta kuli Apalahama hanga ahane mwanenyi Izake ngwe mulambu. (Uputu. 22:1, 2; Hepre. 11:17-19) Ha yikuma yino yaali, Apalahama te katamba kufuliela ngwenyi, Yehova mamanununa yilakenyo yize alingile hakutwala kuli ana jenyi.

11. Mumu liaka Apalahama anakashimbwila kuli Yehova ni uhomboloji?

¹¹ Ku mwono wenyi weswe, Apalahama kalilongesele kushimbwila muli Yehova ni uhomboloji. Muze Apalahama ni usoko wenyi akatukile ku Ure, kota te kali ni miaka kuhiana 70. (Uputu. 11:31–12:4) Apalahama katwamine mu mambalaka ni kwenda-nda mu chifuchi cha Kanana ha miaka yinji. Iye kafwile ni miaka 175. (Uputu. 25:7) Alioze, kakamwene kumanunuka cha chilakenyo cha Yehova chakuhana chifuchi chacho kuli munyachi wenyi. Nawa kakamwene chize asele fundamento ya limbo, we Wanangana wa Zambi. Chipwe chocho, Mbimbiliya yinambe ngwo Apalahama ‘yafwa ni ushinakaji upema.’ (Uputu. 25:8) Chipwe ngwe Apalahama kapwile ni kapinda munji ku mwono wenyi, nihindu kanungine ni ufulielo ukolo ni kushimbwila muli Yehova ni uwahililo. Mumu liaka Apalahama ahashile kunyongonona? Mumu Yehova kamufungile ku mwono wenyi weswe ni kumumona ngwe sepa lienyi.—Uputu. 15:1; Iza. 41:8; Tia. 2:22, 23.

12. Yika tunashimbwila, nawa yika mutulilongesa?

¹² Chizechene ngwe Apalahama, ni yetu tunashimbwila limbo lize lili ni fundamentu yamwenemwene. Alioze, yetu kutushi kushimbwila tangwa lize makatunga limbo liacho. Mumu Wanangana wa Zambi waputukile kuyula mu malilu chize ha mwaka 1914. (Uso. 12:7-10) Alioze, tunashimbwila Wanangana wacho hanga uyule hano hashi. Shimbu yino kanda yichilingiwa, twatamba kupalika mu kapinda munji ngwe yoze apalikile Apalahama ni Sara. Shina tuvumbi twa Yehova musono, kanahase kwimbulula chilweza cha Apalahama? Sango jinji ja ku mwono wa mandumbu jize akutuhwisa ha Tuposhi, jakusolola ngwo mandumbu anji musono no kakusolola ufulielo ni uhomboloji ngwe Apalahama ni Sara. Tutalenu sango jimwe ni kumona yize mutuhasa kulilongesaho.

13. Yika walilongesa ha sango ja ku mwono wa ndumbu Bill?

¹³ Echa yuma yimwe hanga ulihane chinji mu mulimo wa Zambi. Nyi tunazange limbo lia Zambi, hanji Wanangana wenyi upwe ha chihela chitangu ku mwono wetu, twatamba kwecha yuma yimwe mba tumuvwise kuwaha ngwe chize alingile Apalahama. (Mateu 6:33; Marku 10:28-30) Tutalenu chilweza cha ndumbu Bill Walden.b Ha mwaka 1942, Bill yalilongesa engenharia ku shikola yinene ya mu Estados Unidos, chocho yaputuka kulilongesa Mbimbiliya ni Yela ja Yehova. Longeshi yenyi yamulweza ngwenyi, atayize umwe mulimo hanyima liahwisa shikola, alioze Bill yalituna. Iye yalweza longeshi yenyi ngwenyi, shimbu alilongese chinji kanazange kulihana mu mulimo wa Zambi. Hakupalika cha amwe mashimbu, nguvulu yasanyika Bill hanga apwe swalale. Ni vumbi lieswe yalituna, hachino nguvulu yamupatwila hanga afwete 10,000 dolar ni kulinga miaka yitano mu zuwo lia ususu, alioze muze alingile miaka yitatu yamutusula. Hakupalika cha mashimbu, yamusanyika ku shikola ya Ngiliate, muze ahwishile shikola, yaya ngwe mishionaliu mu África. Hanyima lia kumbata Eva, yanunga ni kukalakala chimuwika mu África. Hakupalika cha mashimbu, ayo yafuna ku Estados Unidos hanga afunge naye ya Bill. Ha yuma yeswe yize yalingiwile ku mwono wenyi, Bill yamba ngwenyi: “Ngunawahilila chinji ha kunyingika ngwami, nakulingila Yehova ha miaka kuhiana 70. Kashika ngunamusakwilila chinji ha kungukwasa hanga ngusakule mulimo uno upema.” Shina unazange kusa mulimo wa shimbu lieswe ha chihela chitangu ku mwono we?

14-15. Yika walilongesa ha lusango wa ndumbu Aristotelis ni mukwo-pwo?

¹⁴ Nyingika ngwo, muupwa ni yipikalo ku mwono we. Chilweza cha Apalahama chatulongesa ngwetu, chipwe waze akuzachisa mwono wo weswe hanga alingile Yehova no kakupalika mu yipikalo. (Tia. 1:2; 1 Petu. 5:9) Tutalenu yize yalingiwile kuli Aristotelis.c Kamupapachishile ha mwaka 1946 ku Grécia, nawa ha mwaka 1952 yambisa ndumbu Eleni yoze wapwile ni zango linji mu mulimo wa Zambi. Alioze Eleni yayiza, muze amupimine, yamuwana ni hute mu wongo. Hute liacho kalichijile, alioze muze alimbachile, yilifuna nawa. Mandotolo yamupasula ni kulichiza, chipwe chocho mujimba yiumulekumuka nawa yapwa ni kapinda wa kuhanjika. Iye yanunga ni kusolola zango mu mulimo wa Zambi, chipwe ngwe kapwile ni kuyiza hamwe ni kwahungumiona ha mashimbu jacho.

¹⁵ Ndumbu Aristotelis kafungile mukwo-pwo ha miaka 30. Ha miaka yacho, iye yakalakala ngwe mukulwana mu chikungulwila, yakalakala mu chizavu cha komite yakululieka kukunguluka cha Mbonge, nawa yakwasa kutunga Zuwo lia kukunguluka cha Mambonge. Ha mwaka 1987, Eleni yalilemeka muze te anambujola. Iye kalingile miaka yitatu chakuhona kulisunga, chocho yafwa kwenyi. Aristotelis yamba hakutwala ku yeswe yize yalingiwile ku mwono wenyi ngwenyi: “Ha miaka yeswayi, napalika mu kapinda munji ni kapinda wa susumuku, kashika natamba kununga ni kunyongonona chakuhona kwecha chuma nichimwe chinguhongese. Chipwe chocho, Yehova nihindu kakungwaha tachi hanga ngununge ni kunyongonona mu kapinda yono mweswe.” (Samu 94:18, 19) Yehova kakuzanga chinji atu waze akusa tachi hanga amulingile chipwe ngwe kakupalika mu yipikalo!

16. Chiyulo chika chipema Ndumbu Knorr ahanyine kuli mukwo-pwo?

¹⁶ Lihulikile ha kutalatala cha kulutwe lia matangwa. Apalahama kapwile ni kulihulikila ha yiwape yize te mazuka kuli Yehova, chino chamukwashile kukumba yipikalo. Ndumbu Audrey, kasele tachi hanga anyongonone chipwe ngwe lunga lienyi mutangu Nathan Knorr kafwile ni musongo wa câncer, nawa lunga lienyi wamuchiali Glenn Hyde yapwa ni musongo avuluka ngwo Alzheimer.d Iye yamba ngwenyi, yize yamukwashile yili maliji waze ndumbu Knorr ambile shimbu te kanda achifwa. Yamba ngwenyi: “Nathan kangwiwulwile ngwo: ‘Nyi twafwa, kutalatala chetu chili chamwenemwene, muze makatuhindwisa, kutuchi kamona nawa lamba.’ Hachino, yangukolweza ngwenyi: ‘Tala yuma yize mukazuka kulutwe.’ . . . Yamba nawa ngwenyi: ‘Nunga ni kukalakala, zachisa mwono we hanga ukwase akwenu. Chino muchikukwasa hanga ununge ni kuwahilila.’” Chino chili chiyulo chipema, chakununga ni kukalakala ha kukwasa akwetu ni kununga ni ‘kuwahilila mu kutalatala.’—Roma 12:12.

17. (a) Yuma yika tuli nayo yize muyitukwasa kulihulikila ha kutalatala chetu? (b) Kuchi kukaula chiyulo chili ha Mika 7:7 muchitukwasa kuzuka yiwape ya kulutwe lia matangwa?

¹⁷ Musono, tuli ni yuma yinji yize muyitukwasa kulihulikila ha kutalatala chetu. Yuma yeswe yize yinalingiwa musono, yinasolola pundu ngwo, tuli ha matangwa a kusula a chifuchi chino. Kwasala hakehe, kutuchi kashimbwila nawa ngwetu limbo lize lili ni fundamentu yamwenemwene liyule hashi heswe. Yimwe ya ku yiwape yize mutukapwa nayo yili, uhindukilo wa atu waze twazanga chinji. Ha mashimbu jacho, Yehova makawahisa Apalahama mumu lia uhomboloji ni ufulielo wenyi, ha kumuhindwisa hano hashi hamwe ni usoko wenyi. Shina muukapwako hanga ukaasambilile? Ewa, muukapwako, nyi mwimbulula Apalahama, ha kwecha yuma yimwe hanga use Wanangana wa Zambi kulutwe, kununga ni kufuliela muli Yehova chipwe ngwe unapalika mu yipikalo, ni kushimbwila muli iye ni uhomboloji weswe.—Tanga Mika 7:7.